సెలవులను ఎంజాయ్ చేసేందుకు విదేశాలకు వెళుతున్నారా? అయితే ఫారెక్స్ కార్డ్ గురించి మరిన్ని సంగతులను తెలుసుకోండి! భారతీయులు విదేశాలను సందర్శించడం ఇటీవల అధికమైంది. ఫారిన్ ప్రయాణానికి బయల్దేరేముందు సిద్ధం చేసుకోవాల్సిన తప్పనిసరి జాబితాలో విదేశీ కరెన్సీకి అత్యంత ప్రాధాన్యత ఉంది. సంప్రదాయ రీతిలో ట్రావెలర్ చెక్కులను, విదేశీ కరె న్సీని తీసుకెళ్లడం కంటే ఉత్తమమైన ఆప్షన్‌గా ప్రీపెయిడ్ ఫారెక్స్ కార్డ్‌ను ఎంపిక చేసుకోవచ్చు. ఇది సురక్షితమైనదే కాకుండా సౌకర్యవంతంగా కూడా ఉంటుంది. డెబిట్,  క్రెడిట్ కార్డ్‌లా పనిచేసే ఫారెక్స్ కార్డ్‌ను విదేశీ ఎటీఎంలలో వినియోగించవచ్చు. కనీస లావాదేవీ చార్జీలే వర్తిస్తాయి. అంతేకాకుండా కరెన్సీల్లో హెచ్చుతగ్గుల నుంచి కూడా రక్షణ లభిస్తుంది.
 
  మల్టీ కరెన్సీ కార్డ్‌లు మేలు
  మల్టీ కరెన్సీ ప్లాటినం ఫారెక్స్‌ప్లస్ కార్డ్‌లను తీసుకుంటే మరిన్ని సౌకర్యాలు లభిస్తాయి. హెచ్‌డీఎఫ్‌సీ బ్యాంక్ మాత్రమే ఫారెక్స్ కార్డ్‌పై 18 రకాల విదేశీ కరెన్సీలను ఆఫర్ చేస్తోంది. ఇలాంటి కార్డ్ ఉంటే రకరకాల దేశాలను సందర్శించేటపుడు రకరకాల కరెన్సీలను తీసుకెళ్లాల్సిన అవసరం తప్పుతుంది. తద్వారా క్రాస్ కరెన్సీ చార్జీలనుంచి తప్పించుకోవచ్చు. ఉదాహరణకు హెచ్‌డీఎఫ్‌సీ బ్యాంక్ జారీ చేసే మల్టీ కరెన్సీ కార్డ్... యూరప్‌లో ఆరు దేశాల కరెన్సీలను ఆఫర్ చేస్తోంది. ఈ కార్డ్‌లను బ్యాంకు బ్రాంచీలలోనే కాకుండా నెట్ బ్యాంకింగ్ ద్వారా ఆన్‌లైన్‌లో కూడా కొనుగోలు చేయవచ్చు. రిటైలర్లేకాకుండా కార్పొరేట్ సంస్థలు కూడా తమ సిబ్బంది ప్రయాణాలకు వీటినే వినియోగిస్తున్నాయి.
 
  పరిమితికిలోబడే...
  విదేశీ మారక చట్టాలకు అనుగుణంగా అనుమతించిన స్థాయిలో కస్టమర్లు కార్డ్‌లో కరెన్సీని లోడ్ చేసుకోవచ్చు. విదేశీ సందర్శకులైతే ఒక ఆర్థిక సంవత్సరంలో 10,000 డాలర్ల వరకూ అనుమతిస్తారు. బిజినెస్ ప్రయాణికులైతే ట్రిప్‌నకు 25,000 డాలర్లను అనుమతిస్తారు. కరెన్సీ మార్పిడి కోసం బ్రాంచీలకు వెళ్లనక్కర్లేదు. డెబిట్, క్రెడిట్ కార్డ్‌ల మాదిరిగానే ఫారెక్స్ కార్డుతో వస్తువులను కొనుగోలు చేయవచ్చు. ఒకవేళ కార్డ్ పోగొట్టుకుంటే మిగిలిన మొత్తాన్ని నిలిపివేయవచ్చు. కొన్ని సందర్భాల్లో భోజనం, వినోదం వంటి వ్యయాల్లో ఆఫర్లు లభిస్తాయి కూడా.


 వ్యాపార అవసరాల రీత్యా కావొచ్చు లేదా విహార యాత్రలకు వెళ్లినప్పుడు కావొచ్చు.. విదేశీ పర్యటనలకి వెళ్లినప్పుడు మన కరెన్సీ అక్కడ చెల్లుబాటు కాదు కాబట్టి ఆయా దేశాల కరెన్సీ చాలా అవసరం పడుతుంది. డాలర్లు, యూరోలను వెంట తీసుకెళ్లినా అన్ని చోట్లా అవి మార్పిడి కాకపోవచ్చు కూడా. క్రెడిట్ కార్డులు, ట్రావెలర్స్ చెక్కులు ఉన్నా.. వాటికి ఉండే పరిమితులు వాటికి ఉన్నాయి.
 
 నగదు వెంట తీసుకెడితే దొంగల భయం ఒకటి ఉంటుంది. ఇలాంటి సందర్భాల్లోనే అక్కరకొచ్చేది సురక్షితమైన మల్టీ కరెన్సీ కార్డు.
 విదే శీ పర్యటనల్లో కొనుగోళ్లు జరిపేందుకు, అక్కడి ఏటీఎంలలో ఆయా దేశాల కరెన్సీలో నగదు విత్‌డ్రా చేసుకునేందుకు.. ఇలా అనేక రకాలుగా ఈ మల్టీ కరెన్సీ కార్డు ఉపయోగపడుతుంది. ఇది ప్రీపెయిడ్ కార్డులాంటిది.
 
 ఈ కార్డు ఖాతాలో డాలర్లు, పౌండ్లు, యూరోలు జమ చేసుకుని, విదేశాల్లో పర్యటించినప్పుడు ఆయా దేశాల కరెన్సీలో లావాదేవీలు జరిపేందుకు ఉపయోగించుకోవచ్చు.  సాధారణంగా ఉద్యోగ రీత్యా విదేశాల్లో ఉండే వారు తరచుగా వివిధ దేశాల్లో పర్యటిస్తుండే వారి కోసం మల్టీ కరెన్సీ ట్రావెల్ కార్డులను రూపొం దించారు. హెచ్‌డీఎఫ్‌సీ బ్యాంక్, యాక్సిస్, ఐఎన్‌జీ వైశ్యా వంటి పలు ప్రైవేట్ రంగ బ్యాంకులు ఈ కార్డులను ఇస్తున్నాయి. ప్రయాణించబోయే విమానం టికెట్, పాస్‌పోర్టు, పాన్ కార్డు నంబరు లాంటి వివరాలు మొదలైనవి ఇస్తే   చాలు కార్డు చేతికి వచ్చేస్తుంది.
  
 క్రెడిట్ కార్డుతో పోలిస్తే ఈ మల్టీ కరెన్సీ కార్డులో ప్రయోజనాలు అనేకం.  ఇంటర్నేషనల్ క్రెడిట్ కార్డులకు వార్షిక ఫీజులు చాలా భారీగా ఉంటాయి. ఇదే కాకుండా కొనుగోళ్లు లాంటివి జరిపినప్పుడు సందర్భాన్ని బట్టి లావాదేవీ ఫీజులు. ప్రీపెయిడ్ మల్టీ కరెన్సీ కార్డుల్లో ఈ సమస్యలు ఉండవు. ఇక, క్రెడిట్ కార్డులతో చెల్లింపులు జరిపినప్పుడు విదేశీ మారక విలువ కూడా కీలక పాత్ర పోషిస్తుంటుంది. విదేశీ మారకం విలువలు తరచూ హెచ్చు తగ్గులకు లోనవుతుంటాయన్న సంగతి తెలిసిందే. 
 
 మనం కొనుగోలు చేసిన రోజున మన దేశ కరెన్సీతో పోలిస్తే ఆ దేశ కరెన్సీ విలువ అధికంగా ఉంటే ఆ మేరకు మనం ఎక్కువ చెల్లించాల్సి వస్తుంది. అదే మల్టీ కరెన్సీ కార్డుల విషయంలో కరెన్సీ హెచ్చుతగ్గుల బాదరబందీ ఉండదు. కార్డు తీసుకున్న రోజే కరెన్సీ మారకం విలువ ఇంత ఉంటుందని ముందుగానే నిర్ణయిస్తారు.ప్రత్యేకమైన పిన్ నంబరు కలిగి ఉండే ఈ కార్డులు సురక్షితమైనవి. ఒకవేళ పోగొట్టుకున్నా 48 గంటల్లోగా మరో కార్డు అందుతుంది.