నార్పల: డెంగీ జ్వరంతో మూడురోజులుగా అనంతపురం ఆస్పత్రిలో చికిత్స పొందుతున్న నార్పల మండలం బి.పప్పూరుకు చెందిన దండువారిపల్లి బాలన్న (65) బుధవారం మృతి చెందాడు. ఇతనికి భార్య, ఇద్దరు కుమారులు ఉన్నారు.


 పుట్టపర్తి అర్బన్‌: గొడవపడొద్దని సర్దిచెప్పబోయిన వృద్ధుడిని తాగుబోతు బలంగా తోసేశాడు. రాయిపై పడటంతో బలమైన దెబ్బ తగిలి వృద్ధుడు ప్రాణం విడిచాడు. అర్బన్‌ సీఐ బాలసుబ్రమణ్యం రెడ్డి తెలిపిన మేరకు.. పుట్టపర్తిలోని గోపురం వీధిలో గల అపార్ట్‌మెంట్‌లో నివసిస్తున్న మిలటరీ వెంకటేష్‌ (64), వాచ్‌మన్‌ కేశవ, ట్యాక్సీ డ్రైవర్‌ సురేష్‌బాబు శనివారం రాత్రి గొడవపడ్డారు. మిలటరీ వెంకటేష్‌ భార్య జయలక్ష్మి వచ్చి సర్దిచెప్పి పంపింది. అనంతరం అర్ధరాత్రి 12.30 గంటల సమయంలో సురేష్‌బాబు పూటుగా మద్యం తాగొచ్చి మరోసారి వాచ్‌మన్‌తో గొడవకు దిగాడు. నిద్రాభంగమైన మిలటరీ వెంకటేష్‌ అపార్ట్‌మెంట్‌ మెంట్‌ కిందకు వచ్చి గొడవపడొద్దని ఇద్దరినీ మందలించాడు.
 
 తాగిన మైకంలో ఉన్న సురేష్‌బాబు బలంగా తోసేయడంతో రాయిపై పడిన వెంకటేష్‌ తలకు బలమైన గాయమై అపస్మారకస్థితికి చేరుకున్నాడు. కుటుంబ సభ్యులు వెంటనే సత్యసాయి ఆస్పత్రికి తరలించారు. పరీక్షించిన వైద్యులు ఆయన అప్పటికే వెంకటేష్‌ మృతి చెందినట్లు ధ్రువీకరించారు. ఆదివారం పోస్ట్‌మార్టం అనంతరం స్వగ్రామం బుక్కపట్నం మండలం అగ్రహారం తీసుకెళ్లి అంత్యక్రియలు నిర్వహించారు. దాడికి కారణమైన సురేష్‌బాబును అరెస్టు చేశామని సీఐ బాలసుబ్రమణ్యంరెడ్డి తెలిపారు.


 తాడిమర్రి (ధర్మవరం) : తాడిమర్రి మండలం కునుకుంట్లలో భూమే కాటమయ్య(65) వడదెబ్బకు గురై బుధవారం ఉదయం మరణించినట్లు బంధువులు తెలిపారు. గ్రామంలోని పులివెందుల బ్రాంచ్‌ కెనాల్‌ ఒడ్డున ఉన్న ఓసూరమ్మ ఆలయంలో పూజారిగా పని చేస్తున్న ఆయన.. ఉదయమే ఆలయానికి వెళ్లి అమ్మవారికి ప్రత్యేక పూజలు చేశారు. తరువాత 11.45 గంటలకు ఇంటికొచ్చారు. రాగానే తీవ్ర అస్వస్థతకు గురయ్యారు. ఆస్పత్రికి తరలించేలోపే మృతి చెందినట్లు వివరించారు. మృతునికి భార్య లక్ష్మీనారాయణమ్మ, ఇద్దరు కూతుర్లు, ఇద్దరు కుమారులు ఉన్నారు. వైద్యాధికారి రవికాంత్, ఎంపీహెచ్‌ఈఓలు వెంకటయ్య, మనోహర్, పీహెచ్‌ఎన్‌ చంద్రకళ, ఆరోగ్య కార్యకర్తలు గ్రామానికి వెళ్లి ఘటనపై ఆరా తీశారు.


 అగళి (మడకశిర) : అగళి మండలం రామనపల్లిలో తపాలా శాఖకు చెందిన రిటైర్డ్‌ ఉద్యోగి రుద్రప్ప(65) వడదెబ్బకు గురై గురువారం మృతి చెందినట్లు బంధువులు తెలిపారు. ఎండవేడిమితో కాళ్లు, చేతుల్లో బొబ్బలు వచ్చాయన్నారు. ఈ నేపథ్యంలో ఉదయం కూడా పనులు చేస్తుండగా తీవ్ర అస్వస్థతకు గురైన ఆయన అక్కడే సొమ్మసిల్లిపడిపోయాడన్నారు. ఆస్పత్రికి తరలించేలోపే కన్నుమూశాడని వివరించారు.