కడప: జిల్లాలోని మూడు వేర్వేరు ప్రాంతాల్లో జరిపిన దాడుల్లో 14 మంది ఎర్రచందనం స్మగ్లర్లను పోలీసులు అరెస్ట్‌ చేశారు. వారి వద్ద నుంచి 627 కిలోల బరువున్న 41 ‘ఎర్ర’  దుంగలతో పాటు 10 సెల్‌ఫోన్లు, 2 కార్లు, ఓ ద్విచక్రవాహనం స్వాధీనం చేసుకున్నారు. ఈ మేరకు బుధవారం జిల్లా కేంద్రంలోని పోలీస్‌ పరేడ్‌ గ్రౌండ్‌లో జరిగిన విలేకరుల సమావేశంలో ఓఎస్‌డీ సత్య ఏసుబాబు వివరాలు తెలిపారు. పట్టుబడిన వారిలో అంతర్జాతీయ స్మగ్లర్‌ సాహూల్‌భాయ్‌ ప్రధాన అనుచరుడు శివలింగం శ్రీధర్‌తో పాటు అంతర్రాష్ట్ర స్మగ్లర్‌ ఇక్రం భాయ్‌ ఉన్నట్లు ఆయన తెలిపారు. 


 చిన్నగొట్టిగల్లు: చిత్తూరు జిల్లా చిన్నగొట్టిగల్లు మండలం భాకరాపేట అటవీ ప్రాంతంలో అటవీశాఖాధికారులు కూంబింగ్ నిర్వహిస్తుండగా కనికల కొండ వద్ద సుమారు 30 మంది ఎర్రచందనం స్మగ్లర్లు తారసపడ్డారు. అటవీశాఖాధికారులను గమనించిన స్మగ్లర్లు ఎర్రచందనం దుంగలను అక్కడే వదిలి పారిపోయేందుకు ప్రయత్నించారు. దీంతో అధికారులు వెంబడించి ముగ్గురిని పట్టుకున్నారు. స్మగ్లర్లు వదిలేసిన 29 ఎర్రచందనం దుంగలను స్వాధీనం చేసుకున్నారు. పారిపోయిన స్మగ్లర్ల కోసం గాలింపు చర్యలు మమ్మురం చేశారు. కేసు నమోదు చేసి దర్యాప్తు చేస్తున్నారు.