గంగావతి రూరల్‌: నగరంలో ఓ సబ్‌ కాంట్రాక్టర్‌ ఆత్మహత్య కలకలం రేపింది. మృతుడి డెత్‌నోట్‌ ఆధారంగా ఏడుగురిపై కొప్పళ నగర పోలీసులు కేసు నమోదు చేశారు. కొప్పళలోని బీటీ పాటిల్‌ నగరలో ఉంటున్న రాజీవ్‌ బడాగే ఆత్మహత్య చేసుకున్నాడు. నాలుగు రోజుల క్రితం ఇతను విషం తాగాడు. కుటుంబ సభ్యులు హుబ్లీలోని కేఐఎం ఆస్పత్రికి తరలించారు. అక్కడ చికిత్స పొందుతూ రాజీవ్‌ మృతి చెందాడు. దీంతో రాజీవ్‌ తండ్రి పోలీసులకు ఫిర్యాదు చేయడంతో ఆత్మహత్యకు ముందు రాజీవ్‌ రాసిన డెత్‌నోట్‌ను పోలీసులు స్వాధీనం చేసుకున్నారు. అందులో ఏడుగురి వ్యకుల పేర్లు రాశారు. వారి వేధింపుల వల్లనే ఆత్మహత్య చేసుకుంటున్నట్లు అందులో పేర్కొన్నారు. ఇక సబ్‌ కాంట్రాక్ట్‌ పనులు పూర్తి చేసినా బిల్లులు రాలేదని, మరి కొందరు బెదిరింపులు కూడా అతని ఆత్మహత్యకు కారణమని రాజీవ్‌ తండ్రి మోహన్‌ పోలీసులకిచ్చిన ఫిర్యాదులో పేర్కొన్నారు.  


 వర్ని: ఆర్థిక ఇబ్బందులతో మిషన్‌ కాకతీయ సబ్‌ కాంట్రాక్టర్‌ వెంకటేశ్వర్‌ రెడ్డి(36) ఆత్మహత్య చేసుకున్నాడు. నిజామాబాద్‌ జిల్లా వర్ని మండల కేంద్రంలోని ఓ లాడ్జీలో పురుగుల మందు తాగి బలవన్మరణానికి పాల్పడ్డాడు. వెంకటేశ్వర్‌ రెడ్డి స్వస్థలం ప్రకాశం జిల్లా చర్లోపల్లి గ్రామం. రెండు నెలల క్రితం నుంచి కోటగిరి మండలం పొతంగల్‌ ప్రాంతంలో మిషన్‌ భగీరథ పనులు చేస్తున్నారు. నిన్న మధ్యాహ్నాం లాడ్జీకి వచ్చినట్లు నిర్వాహకులు తెలిపారు. ఈ ఘటనపై పోలీసులు కేసు నమోదు చేసి దర్యాప్తు చేస్తున్నారు.