● టీవీవీపీ కమిషనర్‌ అజయ్‌కుమార్‌ నిర్మల్‌చైన్‌గేట్‌: తెలంగాణ వైద్య విధాన పరిషత్‌ ఆస్పత్రుల్లో మౌలిక వసతులు కల్పిస్తామని టీవీవీపీ కమిషనర్‌ డాక్టర్‌ అజయ్‌కుమార్‌ అన్నారు. జిల్లా కేంద్రంలోని డీసీహెచ్‌ఎస్‌ కార్యాలయంలో టీవీ వీపీ ఆస్పత్రుల మెడికల్‌ ఆఫీసర్లతో గురువారం రివ్యూ నిర్వహించారు. ఈ సందర్భంగా ఆయా ఆస్పత్రుల్లో అందుతున్న సేవలను అడిగి తెలుసుకున్నా రు. మెరుగైన వైద్యం అందించేందుకు కావాల్సిన సౌకర్యాలపై చర్చించారు. పేషెంట్‌ సర్వీస్‌ విషయంలో ఇనిస్టిట్యూట్‌ పరిధిలోని సివిల్‌, శానిటేషన్‌, ప్లంబింగ్‌ పనులకు సంబంధించి సమస్యలు పరిష్కరిస్తామన్నారు. రోగులకు ఇబ్బందులు కలుగకుండా వైద్యవిధాన పరిషత్‌ ఆస్పత్రుల్లో మెరుగైన సేవలు అందిస్తామన్నా రు. సమావేశంలో డీసీహెచ్‌ఎస్‌ దేవేందర్‌రెడ్డి, భైంసా ఏరియా ఆస్పత్రి సూపరింటెండెంట్‌ కాశీనాథ్‌, ఖానాపూర్‌ సీహెచ్‌సీ సూపరింటెండెంట్‌ వంశీమాధవ్‌, ముధోల్‌ సీహెచ్‌సీ సూపరింటెండెంట్‌విజయానంద్‌ పాల్గొన్నారు. వర్క్‌ ఆర్డర్‌ ఇప్పించాలని వినతి నిర్మల్‌చైన్‌గేట్‌: తెలంగాణ వైద్యవిధాన పరిషత్‌ ఆధ్వర్యంలో విధులు నిర్వహించిన ఔట్‌సో ర్సింగ్‌ సిబ్బందికి డీఎంయూ పరిధిలోని జిల్లా ప్రధాన ఆసుపత్రిలో పనిచేయడానికి వర్క్‌ ఆర్డర్‌ ఇప్పించాలని తెలంగాణ వైద్య విధాన పరిషత్‌ కమిషనర్‌ డాక్టర్‌ అజయ్‌కుమార్‌కు వినతిపత్రం అందజేశారు. 17 ఏళ్లుగా జిల్లా, మెటర్నిటీ ఆస్పత్రుల్లో పనిచేస్తున్న తమ వర్క్‌ ఆర్డర్‌ మార్చితో ముగిసిందని తెలిపారు.

కుంటాల: జిల్లాలో వరి ధాన్యం కొనుగోళ్లను వేగవంతం చేయాలని జిల్లా సహకార అధికారి నర్సయ్య సూచించారు. మండలంలోని అంబకంటి గ్రామంలోని పీఏసీఎస్‌ ఆధ్వర్యంలో ఏర్పాటు చేసిన ధాన్యం కొనుగోలు కేంద్రాన్ని గురువారం పరిశీలించారు. తేమశాతం నిబంధనల మేరకు వచ్చాకే రైతులు ధాన్యం కేంద్రాలకు తీసుకురావాలని సూచించారు. కొనుగోలు చేసిన ధాన్యాన్ని రైస్‌ మిల్లులకు తరలించాలని ఆదేశించారు. దళారీ వ్యవస్థ నిర్మూలించేందుకు జిల్లా వ్యాప్తంగా 92 కొనుగోలు కేంద్రాలను ఏర్పాటు చేసినట్లు తెలిపారు. రైతులకు అన్ని వసతులు కల్పించాలని నిర్వాహకులను ఆదేశించారు. ఆయన వెంట సీఈవో నాగభూషణం, కార్యదర్శి శ్రీనివాస్‌రెడ్డి ఉన్నారు.

● ఎస్పీ డాక్టర్‌ జానకీషర్మిలనిర్మల్‌ టౌన్‌: మొబైల్‌ ఫోన్‌ పొతే ఆందోళన వద్దని, సంబధిత పోలీస్‌ స్టేషన్‌లో లేదా మీసేవ ద్వారా ఫిర్యాదు చెయాలని ఎస్పీ డాక్టర్‌ జానకీషర్మిల సూ చించారు. https://www.ceir.gov.in/ వెబ్‌ పోర్టల్‌ ద్వారా ఫోన్‌ ఆచూకీ తెలుసుకోవడం సులభమన్నారు. వివిధ పోలీస్‌ స్టేషన్ల పరిధిలో పోగొట్టుకున్న 87 మొబైల్‌ ఫోన్లను సీఈఐఆర్‌ వెబ్‌సైట్‌ ద్వారా గుర్తించి స్వాధీనం చేసుకున్నట్లు తెలిపారు. వాటిని బాధితులకు ఎస్పీ కార్యాలయంలో గురువారం అందజేశారు. అనంతరం ఎస్పీ మాట్లాడు తూ.. మార్కెట్‌లో చౌకగా వస్తుందని, సెకండ్‌ హాండ్‌ ఫోన్లు కొనేముందు సీఈఐఆర్‌ వెబ్‌సైట్‌లో ఆ ఫోన్‌ ఐఎంఈఐ నంబర్‌ నమోదు చేసుకోవాలన్నా రు. దొంగతననికి లేదా ఫోన్‌లను వెతికి పెట్టడానికి జిల్లా పోలీస్‌ యంత్రాంగం ఇప్పటికే పలు రకాల సాంకేతిక అంశాలను ఉపయోగిస్తుందని తెలిపారు. ఇప్పటి వరకు 697 ఫోన్లను రికవరీ చేసినట్లు పేర్కొన్నారు. కార్యక్రమంలో ఐటీ కోర్‌, వివిధ పోలీస్‌ స్టేషన్లకు చెందిన సిబ్బంది పాల్గొన్నారు.

నిర్మల్‌: పార్లమెంట్‌ ఎన్నికల ప్రచారం చివరి అంకానికి చేరింది. శుక్ర, శనివారాలు మాత్రమే ప్రచా రానికి గడువు మిగిలింది. ఎన్నికల కమిషన్‌ నిబంధనల ప్రకారం శనివారం సాయంత్రం ఆరుగంటలతో ప్రచారానికి ఫుల్‌స్టాప్‌ పడనుంది. దీంతో ‘సమయం లేదు మిత్రమా..’ అంటూ పార్టీలు పరుగులు పెడుతున్నాయి. అభ్యర్థులు హడావుడిగా అడుగులు వేస్తున్నారు. రెండురోజుల సమయాన్ని సద్వి నియోగం చేసుకోవడానికి ప్రయత్నిస్తున్నారు. ఉరుకులు.. పరుగులు.. పట్నం, పల్లె నిద్ర లేవకముందే.. ఎన్నికల రథాలు గల్లీల్లోకి వచ్చేస్తున్నాయి. అభ్యర్థుల పాటలే నిద్రలేపుతున్నాయి. ఒక పార్టీ వెనుక మరొకటి వరుసగా ఊళ్లల్లోకి దూసుకు వస్తున్నాయి. ఉదయం ఊరంతా ఉపాధి పనులకు వెళ్తే.. అభ్యర్థులు, నేతలూ అ క్కడికే వెళ్లి వాళ్లతో ముచ్చట పెడుతున్నారు. తమకే ఓటువేసి గెలిపించాలని కోరుతున్నారు. ప్రచార గడువు దగ్గర పడుతుండటంతో అభ్యర్థులు, నేతలు వేకువ జామునే సిద్ధమవుతున్నారు. ఐదుపది మంది అనుచరులు, కార్యకర్తలు రాగానే ‘చలో.. చలో..’ అంటూ ప్రచారానికి పరుగుదీస్తున్నారు. ఉదయం నుంచి రాత్రి వరకు ప్రచారంలోనే గడిపేస్తున్నారు. ఎర్రటి ఎండలోనే ఊళ్లను చుట్టేస్తున్నారు. వడివడిగా అడుగులు వేస్తూ.. పరుగులాంటి నడకతో.. ఇంటింటికీ వెళ్తున్నారు. స్వయంగా ఓటర్లను కలిసి తనను గెలిపించాలంటూ అభ్యర్థిస్తున్నారు. గ్రూపులుగా విడిపోయి.. ప్రచారం చివరి అంకంలో పార్టీల నాయకులు గ్రూపులుగా విడిపోయి పనులు చక్కబెడుతున్నారు. ఊళ్లల్లో అధికసంఖ్యలో ఉన్నవర్గాల వద్దకు వెళ్తున్నారు. వారితో సమావేశమవుతూ తమ అభ్యర్థిని గెలిపించాలని కోరుతున్నారు. తమ నుంచి ఏం ఆశిస్తున్నారో తెలుసుకుంటూ సాధ్యమైన వరకు పని పూర్తిచేస్తున్నారు. లేనిపక్షంలో గెలిచిన తర్వాత పనులు చేసి పెడతామంటూ హామీలిస్తున్నారు. ప్రలోభాలు తక్కువే.. అసెంబ్లీ ఎన్నికలతో పోలిస్తే పార్లమెంట్‌ పోరులో ప్రలోభాలు తక్కువే కనిపిస్తున్నాయి. నియోజకవర్గ పరిధితోపాటు ఓటర్ల సంఖ్య ఎక్కువగా ఉండటంతో ఎవరికీ ఏం ఇవ్వలేమంటూ పార్టీలు ఖాళీ చేతులు చూపుతున్నాయి. కొన్ని ప్రభావిత వర్గాలు, వ్య క్తులను మాత్రం ప్రలోభ పెడుతున్నాయి. ప్రచారం ముగిసిన తర్వాత 48 గంటలు ఎలా ఉండాలి.. ఏం చేయాలి.. అనేదానిపైనా చర్చించుకుంటున్నాయి. ప్రచారానికి ఇంకా రెండు రోజులే.. హడావుడి పెంచిన పార్టీలు ప్రతీ ఓటరును కలుస్తున్న నేతలు ప్రలోభాలకు గుట్టుగా ఏర్పాట్లు!ఈరోజు, రేపే చాన్స్‌..ఎన్నిక ముగిసే సమయానికి 48 గంటల ముందు నుంచే ప్రచారాన్ని ముగించాల్సి ఉంటుంది. ఈనెల 13 సాయంత్రం 6 గంట ల వరకు పోలింగ్‌ కొనసాగనుంది. ఈప్రకా రం శనివారం సాయంత్రం 6 గంటల వరకు ప్రచారానికి అవకాశం ఉంటుంది. ఇప్పటికే దాదాపు జిల్లాలోని మూడు నియోజకవర్గాల్లో ఎంపీ అభ్యర్థులు ప్రచారం పూర్తి చేశారు. ఇంకా మిగిలిన గ్రామాలు, మండలాల్లో ఆయా పార్టీల నేతలు చక్కర్లు కొడుతున్నారు. ఏ ఊరిని, ఏ ఇంటినీ వదలకుండా పార్టీలు ప్రచారవేగాన్ని పెంచుతున్నాయి.

నిర్మల్‌ శివాజీ చౌక్‌లో కేటీఆర్‌ కార్నర్‌ మీటింగ్‌కు హాజరైన జనంనిర్మల్‌: ‘మొన్నటి అసెంబ్లీ ఎన్నికల్లో మీకు కరెంట్‌ కావాలా..! కాంగ్రెస్‌ కావాలా..! అని అడిగినం. కాంగ్రెస్‌ను నమ్మి మోసపోయిండ్రు. ఆరు గ్యారంటీలు అని అరచేతిలో వైకుంఠం చూపించిండు రేవంతు. ఆడబిడ్డల ఖాతాల్లో రూ.2,500, పెళ్లికి తులంబంగారం ఇస్తామన్నడు ఇచ్చిండా..? రైతురుణ మాఫీ ఇస్తామని తారీఖులు మార్చిండు తప్ప.. మాఫీ చేసిండా..? అందుకే కాంగ్రెస్‌ను నమ్మి రెండోసారి మోసపోవద్దు. పార్లమెంట్‌ ఎన్నికల్లో 13 ఎంపీ సీట్లు బీఆర్‌ఎస్‌ను గెలిపిస్తే.. మళ్లీ కేసీఆర్‌ సర్కారే వస్తుంది..’ అని నిర్మల్‌లో బీఆర్‌ఎస్‌ వర్కింగ్‌ ప్రెసిడెంట్‌ కేటీఆర్‌ అన్నారు. జిల్లా కేంద్రంలోని శివాజీచౌక్‌లో గురువారం రాత్రి నిర్వహించిన కార్నర్‌ మీటింగ్‌లో మాట్లాడారు. తులం బంగారం ఇస్తామని నరికిన రేవంత్‌రెడ్డి తులం ఇనుము కూడా ఇవ్వడని చెప్పారు. పదేళ్లలో బీజేపీ ఏమిచ్చింది.. పదేళ్లు కేంద్రంలో అధికారంలో ఉన్న బీజేపీ ఏమిచ్చిందని కేటీఆర్‌ ప్రశ్నించారు. ఆర్మూర్‌–నిర్మల్‌–ఆదిలాబాద్‌ రైల్వేలైన్‌ ఇవ్వలేదని, ఆదిలాబాద్‌లో సిమెంట్‌ పరిశ్రమ తెరిపించలేదని ఆరోపించారు. నమో అంటే.. నమ్మించి మోసం చేసేటోడు..అని ప్రధాని నరేంద్రమోదీని ఉద్దేశించి అన్నారు. పదేళ్లకిందట తాము అధికారంలోకి రాగానే ప్రతీ ఒక్కరి ఖాతాల్లో రూ.15 లక్షలు వేస్తామని, 20 కోట్ల ఉద్యోగాలు ఇస్తామని చెప్పాడు.. ఇచ్చాడా.. అని ప్రశ్నించారు. గుడి కట్టినం.. ఓటేయుండ్రి అని బీజేపీ ఇదొక్కటే చెబుతుందన్నారు. అలాగైతే కేసీఆర్‌ యాదాద్రిలాంటి ఎన్నో గుడులతోపాటు కాళేశ్వరం లాంటి ఆధునిక దేవాలయాలను నిర్మించాడన్నారు. మోదీ ప్రభుత్వం పదేళ్లలో పిల్లల మనసులో మత విద్వేషం నింపారని ఆరోపించారు. మళ్లీ వాళ్లను రానిచ్చేది లేదు.. అధికారంలో ఉన్నప్పుడు పదవులను, అధికారాన్ని అనుభవించినవాళ్లు ఇప్పుడు పార్టీ ఓడిపోగానే కాంగ్రెస్‌లోకి జంప్‌ అయ్యారని మాజీమంత్రి ఇంద్రకరణ్‌రెడ్డిని ఉద్దేశించి కేటీఆర్‌ అన్నారు. తొమ్మిదేళ్లు మంత్రి పదవిని అనుభవించి జంప్‌ కొట్టాడన్నారు. కష్టం రాగానే పారిపోయేటోడు ఏం నాయకుడని, ఈ వయసులో అవసరమా.. అని పేర్కొన్నారు. మళ్లీ బీఆర్‌ఎస్‌ అధికారంలోకి వస్తుందన్నారు. అప్పుడు తిరిగి వీరిని ఎట్టి పరిస్థితుల్లో రానిచ్చేది లేదని స్పష్టంచేశారు. సోషల్‌మీడియాలో పంచాయితీలు అవసరం లేదని, 13 ఎంపీ సీట్లు గెలిపిస్తే మళ్లీ కేసీఆర్‌ సర్కారే వస్తుందన్నారు. ఆదిలాబాద్‌లో ఆత్రం సక్కును గెలిపిస్తే నిర్మల్‌లోనే క్యాంప్‌ ఆఫీస్‌ పెడతారని చెప్పారు. గెలిపిస్తే.. పోరాడుతా.. ఆదిలాబాద్‌ ఎంపీగా గెలిపిస్తే.. ఇక్కడి ప్రజల సమస్యలను పరిష్కరించేదాకా కొట్లాడుతానని బీఆర్‌ఎస్‌ ఎంపీ అభ్యర్థి ఆత్రం సక్కు అన్నారు. బీజేపీ, కాంగ్రెస్‌లు ఆదిలాబాద్‌ నియోజకవర్గానికి ఏం చేయలేవని ఆరోపించారు. తమ ప్రభుత్వమే అభివృద్ధి చేసిందని చెప్పారు. ఈసారి ఎంపీగా గెలిపిస్తే.. కేంద్రంతో కొట్లాడి అభివృద్ధి చేస్తామని హామీ ఇచ్చారు. కార్నర్‌ మీటింగ్‌లో నిర్మల్‌ జిల్లాపరిషత్‌ చైర్‌పర్సన్‌ విజయలక్ష్మి, బోథ్‌ ఎమ్మెల్యే అనిల్‌జాదవ్‌, మాజీమంత్రి జోగురామన్న, నిర్మల్‌, ఖానాపూర్‌ ఇన్‌చార్జిలు రాంకిషన్‌రెడ్డి, జాన్సన్‌నాయక్‌, జెడ్పీటీసీ సభ్యురాలు జానుబాయి, కోఆప్షన్‌ సభ్యుడు డాక్టర్‌ సుభాష్‌రావు, పట్టణాధ్యక్షుడు మారుగొండ రాము తదితరులు పాల్గొన్నారు.