మధురవాడ: భీమిలి టీడీపీ అభ్యర్థి గంటా శ్రీనివాసరావు ఎన్నికల నియమావళికి తూ ట్లు పొడిచారు. జీవీఎంసీ 5వ వార్డు వైఎస్సార్‌ కాలనీ, గాయత్రీ మెడికల్‌ కళాశాల సమీపంలోని పవన్‌ మిత్ర అపార్ట్‌మెంట్‌ వద్ద రాత్రి 10 గంటల తర్వాత కూడా ఎన్నికలు ప్రచారం నిర్వహించారు. వైఎస్సార్‌ కాలనీలో టీడీపీ నాయకులు రాత్రి 10 గంటలకు బాణసంచా కాల్చారు. తర్వాత రోడ్డు మధ్యలోనే ఫొటోలు దిగుతూ గంటా అభివాదం చేశారు. రాత్రి 10.15 గంటలకు పక్కనే ఉన్న పవన్‌ మిత్ర అపార్ట్‌మెంట్‌లోకి వెళ్లి ప్రచారం చేశారు. 10.25 గంటలకు వైఎస్సార్‌ కాలనీలో మహిళలతో ముచ్చటించి గ్రూప్‌ ఫొటో దిగారు. అర గంట పాటు ఎన్నికల నిబంధనలు ఉల్లంఘించి గంటా ప్రచారం నిర్వహించినా అధికారులు, పోలీసులు ఇటువైపు కన్నెత్తి చూడలేదు.

మహరాణిపేట: ఎన్నికల సమయంలో అభ్యర్థులతోపాటు ఆర్థిక లావాదేవీలు, ఖర్చులు, ఇతర వ్యయాలపై పటిష్ట నిఘా ఉంచాలని జిల్లా అధికారులను రాష్ట్ర వ్యయ పరిశీలకులు నీనా నిగం ఆదేశించారు. ఎన్నికల కమిషన్‌ నిబంధనల మేరకు ప్రతి ఒక్కరూ బాధ్యతగా పనిచేయాల్సి ఉందని స్పష్టం చేశారు. విశాఖ పార్లమెంట్‌ వ్యయ పరిశీలకులు రంగ రాజన్‌, భీమిలి, తూర్పు, దక్షిణ అసెంబ్లీ నియోజకవర్గాల వ్యయ పరిశీలకులు సౌమ్య పాండేజైన్‌, ఉత్తర, పశ్చిమ, గాజువాక, పెందుర్తి అసెంబ్లీ నియోజకవర్గాల వ్యయ పరిశీలకులు అక్తా జైన్‌తో కలిసి శుక్రవారం జిల్లాలో నీనా నిగం పర్యటించారు. కలెక్టరేట్‌ సమావేశ మందిరంలో నియోజకవర్గాల వారీగా సమీక్షా సమావేశాలు నిర్వహించారు. ఈ సందర్భంగా ఆమె మాట్లాడుతూ ఆర్థిక లావాదేవీలు, నగదు బట్వాడా, బహుమతులు, ఇతర వస్తువుల తరలింపు, మద్యం రవాణా తదితర అంశాలపై నిరంతర పర్యవేక్షణ ఉండాలని సూచించారు. అధికారులందరితో నిష్పక్షపాతంగా వ్యవహరిస్తూ ఎన్నికలను అత్యంత పారదర్శకంగా ప్రశాంత వాతావరణంలో నిర్వహించేందుకు కృషి చేయాలన్నారు. సమాచార లోపం తలెత్తకుండా చర్యలు తీసుకోవాలని సూచించారు. ఏమైనా సందేహాలుంటే రాష్ట్ర, జిల్లా స్థాయి ఎన్నికల అధికారులతో సంప్రదింపులు చేసి నివృత్తి చేసుకోవాలన్నారు. నిబంధనలు ఉల్లంఘిస్తే కఠిన చర్యలు : పార్టీలు గానీ, అభ్యర్థులు గానీ అనధికారికంగా ఒక్క రూపాయి కూడా ఖర్చు చేయడానికి వీలులేదని, వారు చేసే ఆర్థిక లావాదేవీలపై నిరంతర పర్యవేక్షణ ఉండేలా చర్యలు తీసుకోవాలని నీనా నిగం చెప్పారు. నిబంధనలు ఉల్లంఘించిన వారిపై కఠిన చర్యలు తీసుకోవాలని ఆదేశించారు. ప్రత్యేక గ్రీవెన్స్‌ కమిటీ ద్వారా సాధారణ పౌరుల నుంచి జప్తు చేసిన నగదును ఆధారాలు పరిశీలించి త్వరితగతిన వెనక్కి ఇచ్చేయాలని సూచించారు. జిల్లా ఎన్నికల అధికారి, కలెక్టర్‌ డాక్టర్‌ ఎ.మల్లికార్జున, నగర పోలీస్‌ కమిషనర్‌ డా.ఎ.రవిశంకర్‌, ఎంసీసీ నోడల్‌ అధికారి, జీవీఎంసీ కమిషనర్‌ సీఎం సాయికాంత్‌ వర్మ, ఏడీసీ కె.ఎస్‌.విశ్వనాథన్‌, జిల్లా రెవెన్యూ అధికారి కె.మోహన్‌కుమార్‌, ఇతర విభాగాల ఉన్నతాధికారులు ఆయా విభాగాల ఆధ్వర్యంలో చేపట్టిన చర్యల గురించి ఆమెకు వివరించారు. క్షేత్రస్థాయిలో చర్యలు, సేవలు కలెక్టర్‌ మల్లికార్జున మాట్లాడుతూ 11 చోట్ల చెక్‌ పోస్టులు పెట్టామని, ఇప్పటి వరకు వస్తు, ధన రూపంలో రూ.4.92 కోట్ల నగదును సీజ్‌ చేశామని తెలిపారు. మొత్తం 110 రకాల బృందాలు క్షేత్రస్థాయిలో పనిచేస్తున్నాయని, నగదు తరలింపు, మద్యం రవాణాపై నిఘా ఉంచుతున్నాయని వివరించారు. 24/7 పనిచేసేలా కంట్రోల్‌ రూమ్‌ నుంచి సేవలందిస్తున్నామని పేర్కొన్నారు. 16 మంది నోడల్‌ అధికారులను నియమించామని, 502 క్రిటికల్‌ పోలింగ్‌ కేంద్రాలను గుర్తించామని, 1,457 కేంద్రాల్లో వెబ్‌ కాస్టింగ్‌ పెట్టేందుకు ఏర్పాట్లు చేశామన్నారు. సీ–విజిల్‌ ద్వారా 388 వినతులు రాగా.. 285 వినతులను నిర్ణీత సమయంలో పరిష్కరించామని తెలిపారు. ప్రవర్తనా నియమావళి ఉల్లంఘించిన ఘటనల్లో 59 ఎఫ్‌ఐఆర్‌లు నమోదయ్యాయన్నారు. బాధ్యతగా ఎన్నికల విధులు జిల్లా అధికారులతో రాష్ట్ర వ్యయ పరిశీలకులు నీనా నిగం నియోజకవర్గాల వారీగా సమీక్షలు

● టీడీపీలో కొనసాగుతున్న సీట్ల ఫైట్‌ ● మాడుగుల అభ్యర్థిగా పైలా నామినేషన్‌ ● మాడుగుల అభ్యర్థిగా 22న నామినేషన్‌ వేస్తానని బండారు ప్రకటన ● పాడేరు నుంచి నామినేషన్‌ వేసిన కిల్లో రమేష్‌ నాయుడు ● టికెట్‌ మార్చి గిడ్డి ఈశ్వరికి ఇస్తారంటూ జోరందుకున్న ప్రచారం ● అరకులో చంద్రబాబుపై యుద్ధం ప్రకటించిన సివేరి అబ్రహం ● అదే బాటలో దొన్నుదొర.. నామినేషన్‌ వేసేందుకు సిద్ధం సాక్షి, విశాఖపట్నం: వెన్నుపోటుకు బ్రాండ్‌ అంబాసిడర్‌గా మారిన టీడీపీ అధినేత చంద్రబాబు టికెట్ల కేటాయింపు విషయంలోనూ అదే పద్ధతి పాటిస్తున్నారు. తొలుత ప్రకటించిన అభ్యర్థులను మార్చుతారన్న సంకేతాలు రావడంతో ఆ పార్టీ నేతలు అధినేత తీరుపై మండిపడుతున్నారు. మరో వైపు నామినేషన్లు వేసిన తర్వాత కూడా అభ్యర్థులను మార్చుతారన్న సంకేతాలు రావడంతో భంగపడ్డ నాయకులు టీడీపీ రెబల్స్‌గా బరిలోకి దిగడానికి సిద్ధమయ్యారు. మాడుగుల, పాడేరు, అరకు.. ఇలా ప్రతిచోటా రెబెల్స్‌ మోగుతున్నాయి. దీంతో తిరుగుబావుటా ఎగరేసిన వారికి తాయిళాలు.. నామినేటెడ్‌ పదవులు ఇస్తామని జపిస్తున్నా.. చంద్రబాబు మాటలు నమ్మడం లేదు. అసలు ఎన్ని పదవులు ఉంటాయి.. ఒకే పదవి ఎంత మందికి ఇస్తారు.. అని భావించిన టికెట్‌ రాని టీడీపీ నేతలు రెబల్స్‌గా బరిలో దిగుతామని స్పష్టం చేస్తున్నారు. మరికొన్ని చోట్ల టికెట్‌ ఆశించి భంగపడిన వారంతా లోలోపల రగిలిపోతున్నారు. బండారు ఇన్‌.. పైలా అవుట్‌ ! మాడుగుల టికెట్‌ పైలా ప్రసాద్‌కు కేటాయించారు. దీంతో ఆయన శుక్రవారం నామినేషన్‌ దాఖలు చేశారు. అయితే భీ పారం ఇవ్వకముందే.. బండారు సత్యనారాయణమూర్తి తనకే టికెట్‌ ఇస్తారని నియోజకవర్గంలోకి ఎంట్రీ ఇచ్చారు. దీంతో పైలాకు చంద్రబాబు వెన్నుపోటు పొడిచారనే ప్రచారం సాగుతోంది. ఒకే వేళ తన సీటు మార్చితే లోకల్‌గా ఉన్న గవిరెడ్డి లేదా కుమార్‌కు ఇచ్చినా తాను సహకరిస్తాను తప్పా ఎక్కడి నుంచో వచ్చిన బండారుకు సహకరించే ప్రసక్తే లేదని స్పష్టం చేశారు. నామినేషన్‌ వేసి అధిష్టానానికి హెచ్చరికలు జారీ చేశారు. తనను కాదని బండారుకి టికెట్‌ ఇస్తే.. ఆయన బండారం బయటపెట్టి.. ఎలా నెగ్గుతారో చూస్తానంటూ సవాల్‌ విసిరారు. అరకులో డబుల్‌ ధమాకా.. అరకు నియోజకవర్గంలో టీడీపీకి రెబల్‌ పోటు తప్పేలా లేదు. రాష్ట్రంలోనే మొట్టమొదటగా చంద్రబాబు ప్రకటించిన టికెట్‌ అరకులోయే. ఈ స్థానంలో టీడీపీ తరఫున దొన్నుదొర నిలబడుతున్నారంటూ ప్రజలందరి ముందు ప్రకటించారు. చివరికి ఆ టికెట్‌ను బీజేపీకి కేటాయించారు. దీంతో దొన్నుదొర చంద్రబాబుపై యుద్ధం ప్రకటించారు. ఇదే స్థానం కోసం ఆశలు పెట్టుకున్న అబ్రహంను కూడా చంద్రబాబు నడిరోడ్డుపై వదిలేశారు. దీంతో అబ్రహం, దొన్నుదొర ఇద్దరూ చంద్రబాబు తీరుపై రగిలిపోతున్నారు. కూటమి తరఫున బీజేపీ అభ్యర్థి పాంగి రాజారావు శుక్రవారం నామినేషన్‌ దాఖలు చేయగా.. ఇండిపెండెంట్‌ అభ్యర్థిగా అబ్రహం కూడా నామినేషన్‌ వేశారు. దొన్నుదొర కూడా 24న నామినేషన్‌ వేస్తానని ప్రకటించారు. అక్కడా తిరుగుబావుటా...! పాడేరు, రంపచోడవరం నియోజకవర్గాల్లోనూ అసమ్మతి రగులుతోంది. పాడేరు టికెట్‌ ఆశించి భంగపడిన గిడ్డి ఈశ్వరి రెబల్‌గా బరిలోకి దిగుతానంటూ హెచ్చరించారు. అయితే.. కిల్లు రమేష్‌ నాయుడుకు హ్యాండ్‌ ఇచ్చి.. గిడ్డి ఈశ్వరికి టికెట్‌ ఇస్తారనే ప్రచారం జరుగుతోంది. ఒకవేళ బీ–ఫారం ఈశ్వరికి ఇస్తే.. తాను రెబల్‌గా పోటీ చేస్తానని కిల్లు హెచ్చరించారు. రంపచోడవరంలోనూ వంతల రాజేశ్వరి తిరుగుబాటు అభ్యర్థిగా బరిలో నిలిచి.. గెలిచి.. చంద్రబాబు, లోకేష్‌కు తన సత్తా చూపిస్తానని సవాల్‌ విసురుతున్నారు. ఇలా.. ప్రతి చోటా టీడీపీకి రెబల్స్‌ ఉచ్చు బిగుసుకుంటోంది. తిరుగుబాటు చేస్తామన్న నాయకులందర్ని పిలిపించి అధికారంలోకి వస్తే ఎమ్మెల్సీ ఇస్తానంటూ చంద్రబాబు బుజ్జగిస్తున్నారు. బాబు హామీలను గమనించిన అసంతృప్త నేతలు అధికారంలోకి రాక ముందు హ్యాండి ఇచ్చి.. అధికారంలోకి వచ్చిన తర్వాత పట్టించుకోరని మండిపడుతున్నారు. ఎన్నికల్లోనే తాడోపేడో తేల్చుకుంటామని స్పష్టం చేస్తున్నారు.

విశాఖ లీగల్‌ : వివాహేతర సంబంధం నేపథ్యంలో ఓ వ్యక్తిని హత్య చేసేందుకు యత్నించిన నిందితునికి ఐదేళ్ల జైలు శిక్ష, రూ.10 వేలు జరిమానా విధిస్తూ నగరంలోని రెండో అదనపు జిల్లా న్యాయస్థానం న్యాయమూర్తి ఎం.వెంకటరమణ శుక్రవారం తీర్పునిచ్చారు. జరిమానా చెల్లించని పక్షంలో అదనంగా ఆరు నెలలు సాధారణ జైలు శిక్ష అనుభవించాలని ఆ తీర్పులో పేర్కొన్నారు. ఇన్‌చార్జి పబ్లిక్‌ ప్రాసిక్యూటర్‌ కాండ్రేగుల జగదీశ్వరరావు అందించిన వివరాలు ఇలా ఉన్నాయి. నిందితుడు డోలా సాయి (23) నగరంలోని టూటౌన్‌ పోలీస్‌ స్టేషన్‌ పరిధిలో కొబ్బరితోట నివాసి. రౌడీ షీటర్‌గా స్థానికంగా పెత్తనం చెలాయించేవాడు. ఓ మహిళతో వివాహేతర సంబంధం పెట్టుకున్న సాయి... ఆ బంధానికి సదరు మహిళ భర్త అడ్డం వస్తున్నాడని పలుమార్లు అతడిని హెచ్చరించాడు. అయినా మాట వినకపోవడంతో 2018 అక్టోబర్‌ 20న అతని మెడపై కత్తితో సాయి బలంగా గాయపరిచాడు. బాధితుని ఫిర్యాదు మేరకు రెండో పట్టణ పోలీసులు డోలా సాయిపై కేసు నమోదు చేశారు. విచారణ జరిపిన న్యాయమూర్తి నేరం రుజువు కావడంతో పైవిధంగా తీర్పు చెప్పారు.

సింహాచలం: సింహగిరి కల్యాణ సిరిని సంతరించుకుంది. చైత్రశుద్ధ ఏకాదశి వేళ శ్రీ వరాహ లక్ష్మీనృసింహస్వామి వార్షిక కల్యాణోత్సవం శుక్రవారం రాత్రి నయనానందకరంగా జరిగింది. శ్రీ మహా విష్ణువు అవతారమైన వరాహ లక్ష్మీ నృసింహస్వామిని పెళ్లి కుమారుడిగా, శ్రీదేవి, భూదేవి అమ్మవార్లను పెళ్లి కుమార్తెలుగా దర్శించిన భక్తులు తన్మయులయ్యారు. కొట్నాల ఉత్సవంతో శ్రీకారం పాంచరాత్ర ఆగమ శాస్త్రాన్ని అనుసరించి కల్యాణోత్సవ ఘట్టాలను ఆలయ అర్చకులు శుక్రవారం మధ్యాహ్నం 3 గంటలకు ప్రారంభించారు. తొలుత ఆలయ నీలాద్రి గుమ్మం వద్ద అర్చకులు, ముత్తయిదువలు పసుపుకొమ్ములను దంచి కొట్నాల ఉత్సవాన్ని నిర్వహించారు. తదుపరి ముక్కోటి దేవతలకు కల్యాణోత్సవ ఆహ్వానాన్ని పలు కుతూ అలయ ధ్వజస్తంభం వద్ద అర్చకులు గరుడాళ్వార్‌ చిత్రపటాన్ని ఎగరవేసి ధ్వజారోహణ నిర్వహించారు. రసవత్తరంగా ఎదురు సన్నాహోత్సవం స్వామి వారి ఉత్సవమూర్తి గోవిందరాజస్వామిని బంగారురంగు పల్లకీలో.. శ్రీదేవి, భూదేవి అమ్మవార్లను ముత్యాల పల్లకీలో కొలువుదీర్చారు. ఈ పల్లకీలను సింహగిరి మాడవీధుల్లో చెరొకవైపు తీసుకెళ్లి పశ్చిమ మాడ వీధిలో జోడు భద్రాల వద్ద ఎదురెదురుగా ఏర్పాటు చేసిన వేదికలపై అధిష్టింపజేశారు. స్వామివారు, అమ్మవార్ల వైభవాన్ని, గొప్పతనాన్ని చాటిచెబుతూ జరిగిన ఎదురు సన్నాహోత్సవం ఆద్యంతం రసవత్తరంగా సాగింది. ఆలయ అర్చకులు పూలదండలతో నృత్యాలు చేస్తూ ఎదురు సన్నాహోత్సవాన్ని రక్తి కట్టించారు. వ్యాఖ్యాతలుగా రావులపాలే నికి చెందిన కందుకూరి రామకృష్ణ సూర్యనారాయణ, కందుకూరి సత్య సూర్యనారాయణమూర్తి వ్యవహరించారు. నేత్రపర్వం..రథోత్సవం సింహగిరి మాడ వీధుల్లో స్వామివారి రథోత్సవం నిర్వహించారు. రథంలో ఉన్న స్వామివారిని దేవస్థానం అనువంశిక ధర్మకర్త పూసపాటి అశోక్‌గజపతిరాజు తొలి దర్శనం చేసుకున్నారు. అనంతరం జాలరి పెద్ద కదిరి లక్ష్మణరావు రథ సారథిగా నిలిచి రథ కదలికలను సూచిస్తుండగా, లక్ష్మీదేవి అమ్మవారి బంధువులుగా జాలర్లు రథం నడిపే బాధ్యతలు చేపట్టారు. అశేష భక్తజన సందోహం రథాన్ని తాళ్లతో లాగి పరవశించారు. విశాఖ శ్రీ శారదాపీఠాధిపతి స్వరూపానందేంద్ర సరస్వతి, ఉత్తరాధికారి స్వాత్మానందేంద్ర సరస్వతి, నగర పోలీస్‌ కమిషనర్‌ రవిశంకర్‌, దేవస్థానం ట్రస్ట్‌బోర్డు మాజీ సభ్యులు సభ్యులు గంట్ల శ్రీనుబాబు, వారణాసి దినేష్‌రాజ్‌ తదితరులు స్వామిని దర్శించుకున్నారు. కనులపండువగా కల్యాణోత్సవం సింహగిరిపై ఉన్న నృసింహ మండపంలో రాత్రి 10.30 గంటల నుంచి వార్షిక కల్యాణోత్సవం జరిపించారు. స్వామివారిని, అమ్మవార్లను నృసింహ మండపంలోకి తీసుకొచ్చి, భారీ ఎత్తున ఏర్పాటు చేసిన కల్యాణ వేదికపై కొలువుదీర్చి కల్యాణోత్సవాన్ని వైభవంగా నిర్వహించారు. తదుపరి భక్తులకు ముత్యాల తలంబ్రాలు, ప్రసాదం అందజేశారు. దేవస్థానం స్థానాచార్యులు టి.పి.రాజగోపాల్‌, ప్రధానార్చకులు గొడవర్తి శ్రీనివాసాచార్యులు, ఇరగవరపు రమణాచార్యులు, పురోహిత అలంకారి కరి సీతారామాచార్యులు, అర్చకులు, వేదపండితులు కార్యక్రమాన్ని నిర్వహించారు. సింహాచలం దేవస్థానం ఈవో ఎస్‌.శ్రీనివాసమూర్తి ఆధ్వర్యంలో ఏర్పాట్లు చేశారు. సీపీ రవిశంకర్‌ ఆధ్వర్యంలో పోలీసులు బందోబస్తు నిర్వహించారు. డీసీపీ సత్తిబాబు, నార్త్‌ ఏసీపీ అన్నెపు నర్సింహమూర్తి బందోబస్తు ఏర్పాట్లు పర్యవేక్షించారు. అలరించిన సాంస్కృతిక కార్యక్రమాలు రథోత్సవంలో సాంస్కృతిక కార్యక్రమాలు ఆకట్టుకున్నాయి. విజయనగరం జిల్లా గాజులరేగకు చెందిన దాసరి రాము ట్రూప్‌ పులివేషాలు, విజయనగరం జిల్లా వేపాడకు చెందిన సింహాద్రి అప్పన్న గరిడి నృత్యం, విశాఖలోని దువ్వాడకు చెందిన నూకాంబిక ట్రూప్‌ కోలాటం, వడ్లపూడికి చెందిన వెంకట పరమేశ్వరి అన్నమయ్య సంఘం మహిళల కోలాటం, కూర్మాన్నపాలేనికి చెందిన శ్రీ బాలాజీ త్రిశక్తి కోలాటం సంఘం మహిళలు చేసిన నృత్యం, మాధవధారకు చెందిన లలిత వైభవ కోలాటం, విజయనగరానికి చెందిన పులివేషాలు విశేషంగా ఆకట్టుకున్నాయి. కనువిందుగా ఎదురు సన్నాహోత్సవం వైభవంగా రథోత్సవం పరవశించిన భక్తజనం సింహగిరికి కల్యాణ సిరి కల్యాణోత్సవంలో పాల్గొన్న భక్తులుమహిళల సాంస్కృతిక ప్రదర్శన

● వైఎస్సార్‌సీపీలోకి చేరిన టీడీపీ ఆనందపురం మండల అధ్యక్షుడు బొద్దాపు శ్రీను ● ఆహ్వానించిన వైఎస్సార్‌ సీపీ రీజినల్‌ కో ఆర్డినేటర్‌ వైవీ సుబ్బారెడ్డి మధురవాడ : సార్వత్రిక ఎన్నికలు కీలక దశకు చేరుకున్న వేళ పలువురు వైఎస్సార్‌ సీపీలో చేరారు. మధురవాడ ఐటీ సెజ్‌ జంక్షన్‌ వద్ద గల వైవీ సుబ్బారెడ్డి నివాసంలో ఇద్దరు కీలక నాయకులు శుక్రవారం పార్టీలో చేరారు. ఎమ్మెల్యే ముత్తంశెట్టి శ్రీనివాసరావు, వైఎస్సార్‌సీపీ నాయకుడు తోట రాజీవ్‌, దాట్ల పెద్దబాబు ఆధ్వర్యంలో టీడీపీ ఆనందపురం మండల అధ్యక్షుడు బొద్దాపు శ్రీను, నాయకులు బొద్దాపు ప్రసాద్‌, పతివాడ శ్రీనివాస్‌ అనుచరులతో కలిసి పార్టీలో చేరారు. అలాగే 32 ఏళ్లపాటు మావోయిస్టు పార్టీలో కీలకంగా పనిచేసిన సీనియర్‌ నాయకుడు, అల్లూరి సీతారామరాజు జిల్లా హుకుంపేట మండలం మొళియాపుట్టుకు చెందిన చడ్డా భూషణం పార్టీలో చేరారు. వీరికి వైఎస్సార్‌సీపీ రీజినల్‌ కో ఆర్డినేటర్‌ వైవీ సుబ్బారెడ్డి పార్టీ కండువాలు కప్పి సాదరంగా ఆహ్వానించారు. ఈ సందర్భంగా వైవీ సుబ్బారెడ్డి మాట్లాడుతూ సీఎం వైఎస్‌ జగన్‌మోహన్‌ రెడ్డి మరోసారి ముఖ్యమంత్రి అవుతారన్నారు. పార్టీలో చేరిన వారికి సముచిత స్థానం కల్పిస్తామని, వారికి ఎప్పటికీ గౌరవం తగ్గదని చెప్పారు. గత ఐదేళ్లలో సీఎం జగన్‌ అమలు చేసిన సంక్షేమ పథకాలు పేదరికాన్ని తగ్గించడంతోపాటు పేదలకు విద్య, వైద్యం, ఇళ్లు వంటి వాటిని చేరువ చేశాయన్నారు. సమాజానికి మేలు చేస్తున్న కార్యక్రమాలు, సంక్షేమ పాలన, అభివృద్ధి కార్యక్రమాలకు ఆకర్షితులై పలువురు వైఎస్సార్‌సీపీలో చేరుతున్నట్టు చెప్పారు. కార్యక్రమంలో వైఎస్సార్‌సీపీ పాడేరు నియోజకవర్గ పరిశీలకురాలు పీలా వెంకటలక్ష్మి, భీమిలి మార్కెట్‌ కమిటీ చైర్మన్‌ యలమంచిలి సూర్యనారాయణ, వైఎస్సార్‌సీపీ యువజన విభాగం రీజినల్‌ కో ఆర్డినేటర్‌ ముత్తంశెట్టి నందేశ్‌బాబు పాల్గొన్నారు.

మహారాణిపేట: అసెంబ్లీ, పార్లమెంట్‌ బ్యాలెట్‌ పత్రాల ముద్రణ పూర్తయింది. కొన్ని అసెంబ్లీ నియోజకవర్గాల బ్యాలెట్‌ పత్రాలు ఇప్పటికే విశాఖకు చేరుకున్నాయి. పార్లమెంట్‌ నియోజకవర్గ బ్యాలెట్‌ పత్రాలు కర్నూలు జిల్లా ప్రభుత్వ ప్రింటింగ్‌ కార్యాలయం నుంచి శనివారం విశాఖకు చేరే అవకాశం ఉంది. విశాఖ పార్లమెంట్‌ పరిధిలో మొత్తం 45,350 బ్యాలెట్‌ పత్రాలు ముద్రణ పూర్తి చేశారు. పది శాతం రిజర్వ్‌, ఒక్కో పోలింగ్‌స్టేషన్‌లో టెండర్‌ ఓటింగ్‌ కోసం అదనంగా 20 బ్యాలెట్‌ పత్రాలు కలిపి ఆర్డర్‌ ఇచ్చారు. విశాఖపట్నం పార్లమెంట్‌ నియోజకవర్గం పరిధిలో 1,962 పోలింగ్‌ స్టేషన్లు ఉన్నాయి. ఎస్‌.కోట అసెంబ్లీలో 270 పోలింగ్‌ స్టేషన్లు, విశాఖ తూర్పు 293, విశాఖ దక్షిణం 237, విశాఖ ఉత్తరం 295, విశాఖ పశ్చిమం 222, గాజువాకలో 306 పోలింగ్‌ స్టేషన్లు ఉన్నాయి. విశాఖ పార్లమెంట్‌ స్థానానికి మొత్తం 33 మంది పోటీ చేస్తున్నారు. ఒక ఈవీఎంలో 16 మంది, రెండో ఈవీఎంలో మరో 16 మంది, మరో ఈవీఎంలో మరొకరు, నోటా ఉంటుంది.

ఫార్మాసిటీలో ఐదుగురు కార్మికులకు అస్వస్థత మల్కాపురం: వైద్యులుగా స్థిరపడాలని ఎన్నో కలలగన్నారు. చదువు కోసం జిల్లాలు దాటి విశాఖ వచ్చారు. శుక్రవారం తెల్లవారుజామున జరిగిన రోడ్డు ప్రమాదంలో ఒకరు మృతి చెందగా.. మరో ఇద్దరు ప్రాణాలతో కొట్టుమిట్టాడుతున్నారు. వివరాలు ఇలా.. గుంటూరు జిల్లా పిడుగురాళ్ల ప్రాంతానికి చెందిన షేక్‌జానీ, అనంతపురం ప్రాంతానికి చెందిన సత్యకుమార్‌, శ్రీకాకుళానికి చెందిన ప్రమోద్‌లు కొమ్మాదిలోని గాయత్రి మెడికల్‌ కళాశాలలో మెడిసన్‌ ప్రథమ సంవత్సరం చదువుతున్నారు. ఈ ముగ్గురు ఒకే ద్విచక్రవాహనంపై యారాడ, గంగవరం బీచ్‌కు శుక్రవారం తెల్లవారుజామున బయలుదేరారు. మల్కాపురం పోలీసు స్టేషన్‌ రోడ్డు నుంచి సింథియా వైపు వెళుతుండగా షిప్‌యార్డ్‌ కమర్షియల్‌ కాంప్లెక్స్‌ సమీపంలో ఆగి ఉన్న ట్రాక్టర్‌ను ఢీకొట్టారు. ఈ సంఘటనలో షేక్‌జానీ అక్కడికక్కడే దుర్మరణం చెందగా.. సత్యకుమార్‌, ప్రమోద్‌కు తీవ్రంగా గాయపడ్డారు. ఈ ప్రాంతంలో డివైడర్‌ పనులు జరుగుతున్నాయి. తవ్విన వ్యర్థాలను తరలించేందుకు అక్కడ ట్రాక్టర్‌ నిలిపారు. ఇది గుర్తించని యువకులు ట్రాక్టర్‌ను ఢీకొట్టారు. తీవ్రంగా గాయపడిన వారిని కేజీహెచ్‌లో చేర్పించారు. ప్రస్తుతం వారి పరిస్థితి విషమంగా ఉంది. షేక్‌జానీ మృతదేహాన్ని కేజీహెచ్‌ మార్చురీకి తరలించారు. జరిగిన సంఘటనపై విచారణ జరుపుతున్నామని మల్కాపురం ఇన్‌చార్జ్‌ సీఐ దాశరథి చెప్పారు. మరో ఇద్దరి పరిస్థితి విషమం ఆగి ఉన్న ట్రాక్టర్‌ను ఢీకొనడంతో ఘటన

ఎంవీపీకాలనీ: వైఎస్సార్‌సీపీతో ముస్లింలది విడదీయరాని బంధమని ఎంపీ, పార్టీ రీజినల్‌ కో ఆర్డినేటర్‌ వైవీ సుబ్బారెడ్డి అన్నారు. వెంకోజీపాలెం సీఎంఆర్‌ ఫంక్షన్‌ హాల్‌లో శుక్రవారం రాత్రి ముస్లింల ఆత్మీయ సమావేశం నిర్వహించారు. ముఖ్య అతిథిగా ఆయన మాట్లాడుతూ రాష్ట్రంలో ముస్లిం రిజర్వేషన్లు తీసుకొచ్చిన ఘనత దివంగత వైఎస్సార్‌కు దక్కుతుందన్నారు. ఆయన అడుగుజాడల్లోనే సీఎం జగన్‌ ముస్లింల సంక్షేమానికి విశేష కృషి చేస్తున్నారని తెలిపారు. రాష్ట్రంలో ముస్లింల రాజకీయ ప్రాధాన్యం పెంచేందుకు పెద్ద ఎత్తున కృషి చేస్తున్నారన్నారు. ఇందులో భాగంగానే గత ఎన్నికల కంటే ప్రస్తుత సార్వత్రిక ఎన్నికల్లో ముస్లింలకు ఎక్కువ అసెంబ్లీ సీట్లు కేటాయించినట్లు చెప్పారు. 2019లో 5 కేటాయిస్తే, 2024లో ఆ సంఖ్యను 7కు పెంచారన్నారు. ముస్లింలకు అన్ని రకాల సంక్షేమ పథకాలను జగన్‌ ప్రభుత్వం అందిస్తోందన్నారు. ఈ మేలును గుర్తుంచుకుని ఎన్నికల్లో ముస్లింలంతా వైఎస్సార్‌సీపీకి అండగా నిలవాలని కోరారు. వైఎస్సార్‌సీపీ తూర్పు ఎమ్మెల్యే అభ్యర్థి ఎంవీవీ సత్యనారాయణ మాట్లాడుతూ రాష్ట్రంలోని అన్ని వర్గాల ప్రజల అభ్యున్నతికి సీఎం వైఎస్‌ జగన్‌ చిత్తశుద్ధితో పనిచేస్తున్నారన్నారు. మానవీయత, నిజాయితీ, నిస్వార్థానికి ప్రతీకగా నిలిచే ముస్లింలు.. రాష్ట్రానికి, ప్రజలకు మంచి చేస్తున్న సీఎం జగన్‌కు అండగా నిలవాలన్నారు. రాష్ట్ర మైనారిటీ సెల్‌ అధ్యక్షుడు ఫరూఖీ, వీఎంఆర్‌డీఏ చైర్మన్‌ సనపల చంద్రమౌళి, బోణి శివరామకృష్ణ, 53వ వార్డు కార్పొరేటర్‌ బర్కత్‌ అలీ, ఎ.షరీఫ్‌, అటవీ కార్పొరేషన్‌ డైరెక్టర్‌ గుజ్జు వెంకటరెడ్డి, పలువురు ముస్లిం నాయకులు, వైఎస్సార్‌సీపీ నాయకులు పాల్గొన్నారు. వారి ఆకాంక్షలు నెరవేరుస్తాం ఆత్మీయ సమావేశంలో రాజ్యసభ సభ్యుడు వైవీ సుబ్బారెడ్డి

మహారాణిపేట: విశాఖ పార్లమెంట్‌ నియోజకవర్గ స్థానం పరిధిలో వినియోగించనున్న ఈవీఎంల సప్లిమెంటరీ ర్యాండమైజేషన్‌ ప్రక్రియ పూర్తయ్యింది. ఇది వరకే ర్యాండమైజేషన్‌ పూర్తయినప్పటికీ పార్లమెంట్‌ బరిలో 33 మంది అభ్యర్థులు పోటీ పడుతున్న నేపథ్యంలో అదనంగా బ్యాలెట్‌ యూనిట్‌ వినియోగిస్తున్న క్రమంలో శుక్రవారం కలెక్టర్‌ డాక్టర్‌ ఎ.మల్లికార్జున, సాధారణ పరిశీలకుడు అమిత్‌శర్మ.. రాజకీయ పార్టీల అభ్యర్థుల సమక్షంలో కలెక్టరేట్‌ వీసీ హాల్‌లో ఈ ప్రక్రియను పూర్తి చేశారు. ఎన్నికల కమిషన్‌ నిబంధనల మేరకు పార్లమెంట్‌ నియోజకవర్గ పరిధిలోని 1,962 పోలింగ్‌ కేంద్రాల్లో వినియోగించేందుకు అనువుగా ఆన్‌లైన్‌ విధానం ద్వారా ఈవీఎంలను కేటాయించారు. కార్యక్రమంలో ఈవీఎంల నోడల్‌ అధికారి టి.ప్రవీణ, ఎన్నికల సెల్‌ అధికారి మూర్తి, ఇతర అధికారులు పాల్గొన్నారు.