● ఎన్నికల విధులు సక్రమంగా నిర్వర్తించాలి ● ఎస్పీ గౌస్‌ ఆలంఆదిలాబాద్‌టౌన్‌: ఈవీఎంల భద్రత పోలీసుల బాధ్యత అని ఎస్పీ గౌస్‌ ఆలం అన్నారు. ఎన్నికల విధులు నిర్వహించనున్న శిక్షణ కానిస్టేబుళ్లు, కేంద్ర బలగాలకు పోలీసు శిక్షణ కేంద్రంలో శుక్రవారం అవగాహన కల్పించారు. ఈ సందర్భంగా ఎస్పీ మాట్లాడుతూ.. ఎన్నికల విధులను సక్రమంగా నిర్వర్తించాలని ఆదేశించారు. పోలింగ్‌ స్టేషన్ల వద్ద, 87 రూట్లలో నిర్వర్తించాల్సిన విధులను వివరించారు. ఏవైన అనుమానాలు ఉంటే ఎప్పటికప్పుడు నివృత్తి చేసుకోవాలని సూచించారు. రాష్ట్రంలో ఎన్నికల సంఘం నిర్ణయించిన సమయం ప్రకారం 13న ఉదయం 7 నుంచి సాయంత్రం 6 గంటల వరకు పోలింగ్‌ జరుగుతుందని పేర్కొన్నారు. ఆయా కేంద్రాల వద్ద ప్రజలను వంద మీటర్ల పరిధిలో గుమిగూడకుండా చూడాలన్నారు. ఓటర్లు ప్రశాంత వాతావరణంలో ఓటు హక్కు వినియోగించుకునేలా చర్యలు చేపట్టాలని తెలిపారు. పోలింగ్‌ కేంద్రంలోకి స్లిప్‌లు, ఐడీకార్డులు ఉన్నవారినే అనుమతించాలన్నారు. ఎండల తీవ్రత నేపథ్యంలో ఓఆర్‌ఎస్‌, మంచినీటిని ఎక్కువగా తాగుతూ ఆరోగ్యాన్ని కాపాడుకోవాలని సూచించారు. సమస్యాత్మక కేంద్రాలు, మావోయిస్టు ప్రభావిత పోలింగ్‌ కేంద్రాల వద్ద అప్రమత్తతో విధులు నిర్వర్తించాలని అన్నారు. పోలింగ్‌ పూర్తయిన తర్వాత స్ట్రాంగ్‌ రూమ్‌ల వద్ద భద్రతలో వినియోగించనున్నట్లు పేర్కొన్నారు. కార్యక్రమంలో అదనపు ఎస్పీలు సమయ్‌జాన్‌రావు, సురేందర్‌ రావు, డీఎస్పీలు బి.ప్రకాశ్‌, జీవన్‌ రెడ్డి, పోతారం శ్రీనివాస్‌, సీఐ సత్యనారాయణ తదితరులు పాల్గొన్నారు.

కైలాస్‌నగర్‌: పార్లమెంట్‌ ఎన్నికల్లో ఓటు హక్కు వినియోగించుకునేందుకు గాను ఎన్నికల సంఘం నిర్దేశించిన 13 రకాల గుర్తింపు కార్డులలో ఏదైనా ఒకదాన్ని తమ వెంట తెచ్చుకోవాలని జిల్లా ఎన్నికల అధికారి, కలెక్టర్‌ రాజర్షిషా ప్రకటనలో తెలిపారు. ఇందులో ఓటరు కార్డు, ఆధార్‌ కార్డు, ఉపాధిహామీ జాబ్‌ కార్డు, ఫొటోతో ఉన్న పోస్టాఫీస్‌ పాస్‌బుక్‌, కార్మిక మంత్రిత్వ శాఖ జారీ చేసిన హెల్త్‌ ఇన్సూరెన్స్‌ స్మార్ట్‌కార్డు, డ్రైవింగ్‌ లైసెన్స్‌, పాన్‌కార్డ్‌, లేబర్‌ గుర్తింపు కార్డు, ఇండియన్‌ పాస్‌పోర్టు, ఫొటోతో కూడిన పెన్షన్‌ డాక్యుమెంట్‌, కేంద్ర, రాష్ట్ర ప్రభుత్వ ఉద్యోగ గుర్తింపు కార్డు, ఎంపీ, ఎమ్మెల్యే, ఎమ్మెల్సీలకు జారీ చేసిన అధికారిక గుర్తింపు కార్డు, దివ్యాంగుల గుర్తింపు కార్డులను ఈసీ నిర్దేశించిందని పేర్కొన్నారు. పోలింగ్‌ కేంద్రాలకు వెళ్లే సమయంలో వీటిలో ఏదైనా ఒక కార్డును తప్పనిసరిగా వెంట తీసుకెళ్లాలని సూచించారు.

● బీజేపీ జిల్లా అధ్యక్షుడు శంకర్‌ కై లాస్‌నగర్‌: దేశానికి ప్రధాని నరేంద్రమోదీ పాలనే శ్రీరామరక్ష అని ఆదిలాబాద్‌ ఎమ్మెల్యే పాయల్‌ శంకర్‌ అన్నారు. పార్లమెంట్‌ ఎన్నికల ప్రచారంలో భాగంగా పార్టీ అభ్యర్థి నగేశ్‌కు మద్దతుగా శుక్రవారం జిల్లా కేంద్రంలో రోడ్‌ షో నిర్వహించారు. స్థానిక రాంలీలా మైదానం నుంచి ప్రారంభం కాగా పార్టీ శ్రేణులు భారీగా తరలివచ్చారు. కాషాయ జెండాలు చేతబూని డీజే చప్పుళ్లకనుగుణంగా ఉత్సాహంగా నృత్యాలు చేశారు. ప్రధాన వీధుల గుండా సాగి తిరిగి అక్కడికే చేరుకుంది. ఈ సందర్భంగా ఎమ్మెల్యే మాట్లాడుతూ.. మరోసారి మోదీని ప్రధానిగా చేసేందుకు ప్రజలు సిద్ధంగా ఉన్నారన్నారు. కార్యక్రమంలో నాయకులు ఆదినాథ్‌, విజయ్‌, నగేశ్‌ తదితరులు పాల్గొన్నారు.

● వివరాలు సేకరించిన వైద్యాధికారులుఆదిలాబాద్‌టౌన్‌: గర్భంలో నే శిశువు మృతి.. రూ.80వే ల బిల్లు కోసం ప్రైవేట్‌ ఆస్పత్రి వేధింపులు.. అంటూ ‘మాతృవేదన’ శీర్షికన సాక్షిలో ప్రచురితమైన కథనానికి కలెక్టర్‌ రా జర్షిషా స్పందించారు. నర్సింగ్‌హోంపై విచారణ చేపట్టి నివేదిక సమర్పించాలని జిల్లా వైద్య ఆరోగ్యశాఖ అధికారి నరేందర్‌ రాథోడ్‌ను శుక్రవారం ఆదేశించారు. ఈ మేరకు డిప్యూటీ డీఎంహెచ్‌వో సాధన, వైద్యాధికారి అశోక్‌, మాస్‌ మీడియా అధికారి వెంకట్‌రెడ్డి ద్వారకానగర్‌లో గల టీఎన్జీవో సమీపంలోని ప్రైవేట్‌ నర్సింగ్‌ హోంను పరిశీలించారు. గర్భిణికి సంబంధించిన వివరాలపై ఆరా తీశారు. మేనేజ్‌మెంట్‌ను పిలిచి బిల్లులు ఎంత చెల్లించారు.. ఎంత అడిగారు.. ఆమె ఆరోగ్య పరిస్థితి ఎలా ఉందనే వివరాలు తెలుసుకొని నమోదు చేసుకున్నారు. నివేదికను కలెక్టర్‌కు సమర్పించనున్నట్లు డిప్యూటీ డీఎంహెచ్‌వో పేర్కొన్నారు.

● కేటీఆర్‌పై దాడిని ఖండిస్తున్నాం ● బీఆర్‌ఎస్‌ జిల్లా అధ్యక్షుడు జోగు రామన్నఆదిలాబాద్‌టౌన్‌: బీజేపీకి ఓటమి భయం పట్టుకుందని, పార్లమెంట్‌ ఎన్నికల్లో ఓటమి భయంతో మతవిద్వేషాలు రెచ్చగొట్టే ప్రయత్నాలు చేస్తున్నారని బీఆర్‌ఎస్‌ జిల్లా అధ్యక్షుడు జోగు రామన్న అన్నారు. జిల్లా కేంద్రంలోని పార్టీ కార్యాలయంలో శుక్రవారం విలేకరుల సమావేశం నిర్వహించారు. భైంసాలో నిర్వహించిన రోడ్‌షోలో పార్టీ వర్కింగ్‌ ప్రెసిడెంట్‌ కేటీఆర్‌పై బీజేపీ నాయకులు, కార్యకర్తలు చేసిన దాడిని ఖండిస్తున్నామని అన్నారు. రెచ్చగొట్టి, మతాల మధ్య చిచ్చుపెట్టి గెలవడానికి ప్రయత్నిస్తున్నారని ఆరోపించారు. ఆంజనేయ భక్తులను తాము గౌరవిస్తామని, అయితే ఈ దాడికి పాల్పడింది భక్తుల వేషధారణలో ఉన్న బీజేపీ నాయకులు అని అన్నారు. దేవుడి పేరుతో రాజకీయాలు చేయడం ఎంతవరకు సమంజసమని ప్రశ్నించారు. ఎంపీ అభ్యర్థి గొడం నగేశ్‌ భైంసా మున్సిపల్‌ చైర్మన్‌ ఎన్నికల సమయంలో ఎంఐఎంకు ఓటు వేసిన మాట వాస్తవం కాదా అని అన్నారు. ఈ విషయాన్ని హిందు సంఘాలు ఏవిధంగా సమర్థిస్తాయని ప్రశ్నించారు. తమ పార్టీ అన్ని మతాలకు సమాన గౌరవం ఇస్తుందన్నారు. ఎంపీ అభ్యర్థి సక్కు మాట్లాడుతూ ఎన్నికల వేళ బీజేపీ దాడిని తీవ్రంగా ఖండిస్తున్నామన్నారు. తాను హనుమాన్‌ ఆలయాన్ని దర్శించుకొని నామినేషన్‌ వేసినట్లు గుర్తు చేశారు. విలేకరుల సమావేశంలో బీఆర్‌ఎస్‌ నాయకులు అజయ్‌, రోకండ్ల రమేష్‌, మెట్టు ప్రహ్లాద్‌, భూమన్న, శ్రీనివాస్‌ తదితరులు పాల్గొన్నారు.