సాక్షి, సిటీబ్యూరో: దేశ సినీరంగ పరిశ్రమలో ప్రస్తుత తెలుగు సినిమా స్థాయికి పునాది వేసింది ఆనాటి సామాజిక విలువల్ని, నటనా కౌశలాన్ని ప్రతిబింబించిన సినిమాలే. ప్రస్తుతం సక్సెస్‌, బిజినెస్‌, స్టార్‌ ఇమేజ్‌ మాయలో పడిపోయి సినిమా ఆత్మ, ఆర్థత కోల్పోతోంది. ఇలాంటి తరుణంలో రాష్ట్ర భాషా సాంస్కృతిక శాఖ ఆధ్వర్యంలో ఇప్పటి వరకు ప్రపంచ వ్యాప్తంగా వివిధ భాషల్లో విడుదలైన ఉత్తమ చిత్రాలను తెలుగు సినీ ప్రేమికులకు చేరవేసేందుకు 2018 జనవరి 7వ తేదీన ‘సండే సినిమా’ (ఎ విండో టూ వరల్డ్‌ సినిమా) కార్యక్రమాన్ని చేపట్టింది. ఇందులో భాగంగా రవీంద్రభారతి వేదికగా పైడి జయరాజ్‌ ప్రివ్యూ థియేటర్‌లో ప్రదర్శిస్తున్న ఉత్తమ చిత్రాలు నేటితరం యువ దర్శకులకు కొత్త ఆలోచనా ధోరణిని పెంపొందిస్తూ స్థానిక కథలను సినిమాలుగా రూపొందించుకునేలా ప్రభావితం చేస్తున్నాయి. నూతన దర్శకులను, రచయితలను, టెక్నీషియన్లను మెయిన్‌ స్ట్రీమ్‌ సినిమా వైపు నడిపించడంలోనూ ఈ ‘సండే సినిమా’కు ప్రత్యేక స్థానం ఉంది. ఈ నెల 12వ తేదీన ‘డ్రీమ్స్‌’ సినిమాతో 200 వారాలను సండే సినిమా పూర్తి చేసుకుంది. కార్యక్రమం చేపట్టిన తర్వాత రాష్ట్ర భాషా సాంస్కృతిక శాఖ ప్రోత్సాహంతో స్థానిక యువ సినీ ప్రేమికులు వినూత్న కథాంశాలతో సినిమాలు రూపొందించి ప్రత్యేక గుర్తింపు పొందారు. తెలంగాణ సంస్కృతి, సంప్రదాయాలు, జీవన స్థితిగతులే ఆధారంగా సినిమాలను తెరకెక్కించి ప్రతిభను ప్రపంచానికి చూపిస్తున్నారు.

రవీంద్ర భారతిలో 2018 జనవరి 7 నుంచి రాష్ట్ర సాంస్కృతిక శాఖ ఆధ్వర్యంలో ఉత్తమ చిత్రాల ప్రదర్శన

తెలుగు సినిమా సాంస్కృతిక పునర్‌వైభవానికి కృషి

ఈ మట్టిని ముట్టుకుంటే కథ వస్తది..

‘తెలంగాణ మట్టిని ముట్టుకుంటే కథ వస్తది.. మనిషిని ముట్టుకుంటే సినిమా అయితది’..! మూస ధోరణిలో సినిమాలు, షార్ట్‌ఫిల్మ్‌లు తీసున్న యువ సినీ ఔత్సాహికులకు మంచి కథాంశాలను చూపించాలన్న ఉద్దేశ్యంతో సండే సినిమాను ప్రారంభించాం. ప్రపంచ సినిమా చరిత్రను, గమనాన్ని మార్చిన సినిమాలు ప్రదర్శించాం. నిపుణులతో ఆ సినిమాలపై చర్చా కార్యక్రమాన్ని ఏర్పాటు చేసి యూట్యూబ్‌, ఫేస్‌ బుక్‌ ద్వారా ఇతర ప్రాంతాల్లోని సినీ అభిమానులకు చేరవేస్తున్నాం. నవతరం దర్శకులు ఈ వేదిక నుంచి స్ఫూర్తి పొందుతూ.. మూలకథ, స్క్రీన్‌ ప్లే, ఎమోషన్‌, సీనిక్‌ ఆర్డర్‌ తదితర అంశాల్లో అవగాహన పొంది వినూత్నమైన లఘుచిత్రాలు, సినిమాలు రూపొందిస్తున్నారు. రాబోయే రోజుల్లో మరిన్ని మంచి సినిమాలు చూపించేందుకు రాష్ట్ర భాషా సాంస్కృతిక శాఖ ముందుంటుంది. – మామిడి హరిక్రిష్ణ,

తెలంగాణ భాషా సాంస్కృతిక సంచాలకులు