ఆరిలోవ : ఇందిరాగాంధీ జూ పార్కులో ఈనెల 21న సమ్మర్‌ క్యాంప్‌ ప్రారంభంకానున్నట్లు జూ క్యూరేటర్‌ నందనీ సలారియా ఒక ప్రకటనలో తెలిపారు. ఈ క్యాంప్‌ల్లో చిన్నారులకు అరుదైన అనుభూతిని అందించే విధంగా వివిధ రకాల కార్యక్రమాలు చేపట్టనున్నట్లు పేర్కొన్నారు. ఈ క్యాంప్‌ రెండు విడతల్లో జరుగుతుందన్నారు. మొదట విడత బ్యాచ్‌ 5 నుంచి 11 సంవత్సరాల మధ్య పిల్లలకు ఈనెల 21 నుంచి 25 వరకు.. రెండో విడత బ్యాచ్‌ 12 నుంచి 18 సంవత్సరాల మధ్య పిల్లలకు ఈనెల 28 నుంచి జూన్‌ 1 వరకు నిర్వహించనున్నట్లు ఆమె పేర్కొన్నారు. ఇందులో భాగంగా అరుదైన పక్షి జాతులు గురించి తెలుసుకోవడానికి పరిశోధనలు, బర్డ్‌ వాచ్‌, ‘గైడెడ్‌ జూ టూర్‌’ పేరుతో జూలో ఉన్న వివిధ జాతుల వన్యప్రాణులు గురించి వివరిస్తారన్నారు. దీంతో పాటు జూలో వన్యప్రాణులకు అందిస్తున్న వైద్య సేవలు, జూలో వెటర్నరీ ఆస్పత్రి పరిశీలన తదితర కార్యక్రమాలు ఈ సమ్మర్‌ క్యాంప్‌లో నిర్వహిస్తామన్నారు. దీని కోసం రిజిస్ట్రేషన్‌ ఫీజు రూ.500 చెల్లించాలన్నారు. రిజిస్ట్రేషన్‌ చేసుకొని పాల్గొన్న ప్రతివారికీ కిట్‌ అందిస్తామన్నారు. ఆసక్తి గలవారు 9440810213 నంబర్‌ను సంప్రదించి పేర్లు నమోదు చేసుకోవాలని ఆమె సూచించారు.

కంచరపాలెం (విశాఖ): స్థానిక జిల్లా ఉపాధి కార్యాలయం నేషనల్‌ కెరీయర్‌ సర్వీస్‌ సెంటర్‌లో ఎస్సీ, ఎస్టీ ఉద్యోగ అన్వేషికులకు పలు కోర్సుల్లో జూలై 1 నుంచి ఉచితంగా ఏడాది పాటు శిక్షణ ఇవ్వనున్నట్లు జిల్లా ఎస్సీ, ఎస్టీ సబ్‌ రీజినల్‌ ఎంప్లాయ్‌మెంట్‌ అధికారి నిట్టాల శ్యామ్‌ సుందర్‌ ఒక ప్రకటనలో తెలిపారు. కాంపిటేటివ్‌ పరీక్షలకు తర్ఫీదు శిక్షణ, ‘ఓ’లెవెల్‌ కంప్యూటర్‌ ట్రైనింగ్‌, హార్డ్‌వేర్‌ ట్రైనింగ్‌, కంప్యూటర్‌ అప్లికేషన్‌, బిజినెస్‌, అకౌంటింగ్‌లో శిక్షణ, సైబర్‌ సెక్యూర్‌ వెబ్‌ డెవలప్‌మెంట్‌ అసోసియేట్‌లో శిక్షణ తరగతులు నిర్వహించనున్నట్లు పేర్కొన్నారు. ఏడాది కాలం శిక్షణ ఉంటుందని, ఇంటర్‌ పూర్తిచేసిన 18 నుంచి 30 ఏళ్ల గల వారు అర్హులని తెలిపారు. ఆసక్తి గల వారు జూన్‌ 15లోపు https;//dbtscst. ncs.gov.in/users/signup వెబ్‌సైట్‌లో రిజిస్ట్రేషన్‌ చేసుకోవాలని కోరారు.

● అందరికీ కృతజ్ఞతలు ● కలెక్టర్‌ విజయసునీత సాక్షి,పాడేరు: జిల్లాలోని మూడు నియోజకవర్గాలలో సార్వత్రిక ఎన్నికలు ప్రశాంతంగా జరిగాయని జిల్లా ఎన్నికల అధికారి, కలెక్టర్‌ ఎం.విజయ సునీత మంగళవారం ఒక ప్రకటనలో తెలిపారు. ఇందుకు సహకరించిన అన్ని వర్గాల ప్రజలు, వివిధ స్థాయి అధికారులు, ఎన్నికల సిబ్బందికి ఆమె కృతజ్ఞతలు తెలిపారు. ఎక్కడ ఎలాంటి అవాంఛనీయ సంఘటనలు జరగకుండా ప్రశాంత వాతావరణంలో సజావుగా ఎన్నికలు జరిగాయన్నారు. అధికారులు, సిబ్బంది అత్యంత బాధ్యతతో పారదర్శకంగా విధులు నిర్వహించడం అభినందనీయమని ఆమె పేర్కొన్నారు.

● వైఎస్సార్‌సీపీ శ్రేణుల్లో ఉత్సాహం ● రూ.లక్షల నుంచి కోట్లలో బెట్టింగులు ● కొన్నిచోట్ల పందేనికి భూములు కూడా.. ● తేడా రాకుండా ఇరువర్గాల అగ్రిమెంట్లు ● ఓటమి భయంతో కూటమి నాయకుల వెనకడుగుసాక్షి, విశాఖపట్నం: సార్వత్రిక ఎన్నికల్లో వైఎస్సార్‌సీపీ మళ్లీ ప్రభంజనం స్పష్టం కావడంతో ఆ పార్టీ శ్రేణుల్లో ఉత్సాహం ఉరకలేస్తోంది. రెండోసారి వైఎస్‌ జగన్‌మోహన్‌రెడ్డే ముఖ్యమంత్రి కావడం ఖాయమన్న భావన సర్వత్రా వ్యక్తమవుతోంది. సోమవారం జరిగిన పోలింగ్‌ సరళితో పాటు ఎన్నికలకు కొద్ది రోజుల ముందు వివిధ సంస్థలు జరిపిన సర్వేల్లో వైఎస్సార్‌సీపీకే ఓటర్లు పట్టం కట్టబోతున్నారని ఇప్పటికే తేటతెల్లం చేశాయి. దీంతో గెలుపుపై వైఎస్సార్‌సీపీ శ్రేణులతో పాటు పలువురు పందాలకు ముందుకొస్తున్నారు. పల్లెల్లోనే కాదు పట్టణాల్లోనూ భారీగా బెట్టింగులకు దిగుతున్నారు. పందాలపై ఆసక్తి ఉన్న వారు రాష్ట్ర వ్యాప్తంగా ఏ జిల్లాలో ఏ పార్టీకి అనుకూలంగా ఓట్లు పోలయ్యాయన్న దానిపై సోమవారం సాయంత్రం నుంచే తమకున్న పరిచయాలు, ఇతర మార్గాల ద్వారా ఆరా తీయడం మొదలు పెట్టారు. ఏ ప్రాంతంలో, ఏ వర్గం ఓట్లు ఎంతమేర ఎవరికి ఎంత పడ్డాయి? వంటి అంశాలపై మంగళవారం నాటికి నిర్ధారణకు వచ్చారు. ప్రధానంగా వృద్ధులు, మహిళలు, పేద, మధ్య తరగతికి చెందిన ఓటర్లు అత్యధికంగా వైఎస్సార్‌సీపీ వైపే మొగ్గు చూపారు. ఇలా మెజార్టీ అంచనాలన్నీ వైఎస్సార్‌సీపీ గెలుపునే సూచిస్తుండడంతో ఓ నిర్ధారణకు వచ్చిన వీరు బెట్టింగులకు సిద్ధమయ్యారు. సోమవారం వరకు కూటమి గెలుస్తుందని ఊరేగిన వారంతా పోలింగ్‌ జరిగాక వెనక్కి తగ్గారు. ఇప్పుడు బెట్టింగ్‌లకు అంతగా ముందుకు రావడం లేదు. కొన్నిచోట్ల మాత్రం ఇంకా కూటమిపై ఆశలు పెట్టుకున్న వారు పందాలు కాస్తున్నారు. ముఖ్యంగా ఆయా నియోజకవర్గాల్లో బరిలో నిలిచిన అభ్యర్థులకంటే మళ్లీ ముఖ్యమంత్రి ఎవరన్న దానిపైనే బెట్టింగులకు దిగుతున్నారు. కొన్నిచోట్ల రూ.లక్షల్లోను, అక్కడక్కడ రూ.కోట్లలోనూ సై అంటున్నారు. ఇంకొన్ని చోట్ల ఏకంగా భూములనే ఫణంగా పెడుతున్నారు. అంతేకాదు.. పందాలు కాసి ఫలితాలు వెలువడ్డాక తేడాలు రాకుండా లిఖిత పూర్వక అగ్రిమెంట్లు చేసుకుంటున్నారు. రూ.లక్షల నుంచి కోట్ల వరకు.. ఉమ్మడి విశాఖపట్నం జిల్లాల్లో పందాల సందడి జోరుగా కనిపిస్తోంది. పెందుర్తి నియోజకవర్గంలో కొంతమంది రూ.5 లక్షల నుంచి 50 లక్షల వరకు బెట్టింగులకు దిగారు. ఇక్కడ మళ్లీ వైఎస్సార్‌సీపీనే అధికారంలోకి వస్తుందని కొందరు, సిటింగ్‌ ఎమ్మెల్యే ఆదిప్‌రాజే రెండోసారి గెలుస్తారని పందాలు కాశారు. ఈ నియోజకవర్గంలోని ఓ గ్రామంలో వైఎస్సార్‌సీపీ, కూటమి నాయకులు తమ పొంట పొలాలను ఫణంగా పెట్టి పందెం వేశారు. ఆ మేరకు సాక్షుల సమక్షంలో స్టాంపు పేపర్లపై ఒప్పంద పత్రాలు రాసుకున్నారు కూడా. అలాగే భీమిలి, విశాఖ తూర్పు, విశాఖ ఉత్తర, విశాఖ పశ్చిమ, గాజువాక, నర్సీపట్నం తదితర నియోజకవర్గాల్లో పందాలు జోరుగా సాగుతున్నాయి. ఈ నియోజకవర్గాల్లో కనీసం రూ.లక్ష నుంచి కోటి వరకు పందాలు నడుస్తున్నాయి. వైఎస్సార్‌సీపీ, కూటమి అభ్యర్థుల మధ్య ఒకింత గట్టి పోటీ ఉన్న చోట్ల ఈ పందాలు మరింతగా కనిపిస్తున్నాయి. అలాంటి నియోజకవర్గాల్లో ఒకటికి రెండింతలు చొప్పున ఇచ్చేలా బెట్టింగులకు సిద్ధమవుతున్నారు. కాగా ఎన్నికల ముందు వరకు పందాలకు కాలు దువ్విన కూటమి శ్రేణులు.. పోలింగ్‌ తర్వాత వెనక్కి తగ్గారు. అదే సమయంలో గెలుపుపై ధీమాతో ఉన్న వైఎస్సార్‌సీపీ అభిమానులు మాత్రం దూకుడుగా ఉన్నారు.

● స్ట్రాంగ్‌రూమ్‌లకు తరలించిన ఈవీఎంలు ● అభ్యర్థుల సమక్షంలో సీళ్లు ● పోలీసు బలగాలతో భారీ బందోబస్తు సాక్షి,పాడేరు: జిల్లాలోని 1021 కేంద్రంలో నిర్వహించిన పోలింగ్‌ ప్రక్రియకు సంబంధించిన ఈవీఎంలను పటిష్ట బందోబస్తు మధ్య స్ట్రాంగ్‌రూమ్‌ల్లో భద్రపరిచారు. పాడేరు,అరకులోయ అసెంబ్లీ స్థానాలకు సంబంధించి ఓట్ల లెక్కింపును పాడేరు ప్రభుత్వ డిగ్రీ కళాశాలలో నిర్వహించనున్నారు. ఇందుకు సంబంధించి స్థానిక డిగ్రీ కళాశాలలో రెండు స్ట్రాంగ్‌ రూమ్‌లన ఏర్పాటుచేశారు. వీటిలో రెండు నియోజకవర్గాలకు సంబంధించి బరిలో ఉన్న అభ్యర్థులు, పార్టీ నేతల సమక్షంలో స్ట్రాంగ్‌ రూమ్‌లకు జిల్లా ఎన్నికల సాధారణ పరిశీలకులు వివేకానందన్‌, కలెక్టర్‌ ఎం.విజయసునీత, పాడేరు,అరకులోయ ఆర్‌వోలు భావన వశిష్ట, వి.అభిషేక్‌ సీళ్లు వేశారు. రంపచోడవరంలోని స్ట్రాంగ్‌ రూమ్‌లో ఈవీఎంలను భద్రపరిచి అన్ని రాజకీయ పార్టీల నేతలు, అభ్యర్థుల సమక్షంలో ఆర్వో ప్రశాంత్‌కుమార్‌ సీళ్లు వేశారు. వీటి వద్ద మూడంచెల భద్రత చేపట్టారు. కేంద్ర, రాష్ట్ర పోలీసు బలగాలు, స్థానిక పోలీసులతో భారీ స్థాయిలో బందోబస్తు ఏర్పాటుచేశారు. సీసీ కెమెరాలను ఏర్పాటుచేశారు.