లెజెండ్స్ క్రికెట్ లీగ్‌లో మ్యాచ్ ఫిక్సింగ్ క‌ల‌క‌లం రేపింది. మ్యాచ్ ఫిక్సింగ్ ఆరోప‌ణ‌లు కింద ఇద్ద‌రు భారతీయుల‌ను శ్రీలంక పోలీసులు అదుపులోకి తీసుకున్నారు. యోని పటేల్‌, పీ ఆకాష్ అనే ఇద్ద‌రు ఇద్ద‌రు ఇండియ‌న్స్‌ లెజెండ్స్ క్రికెట్ లీగ్‌లో అనాధిక‌ర మ్యాచ్‌ల‌ను ఫిక్స్ చేసేందుకు ప్ర‌య‌త్నించిన‌ట్లు శ్రీలంక పోలీసులు గుర్తించారు. మార్చి 8న, మార్చి 19న కెండీలోని పల్లెకెలే స్టేడియంలో జరిగిన మ్యాచులను ఫిక్స్ చేయడానికి ప్ర‌య‌త్నించిన‌ట్లు ఆరోప‌ణ‌లు వ‌చ్చాయి. ప్రస్తుతం ఈ ఇద్దరు భారతీయులు బెయిల్ మీద బయటికి వచ్చారు. అయితే ఈ కేసు విచారణ ముగిసేవరకూ దేశం వదిలి వెళ్లకుండా వారి పాస్‌పోర్ట్‌లను సీజ్ చేయాల‌ని శ్రీలంక కోర్టు ఆదేశించింది.ఇక లెజెండ్స్ లీగ్ క్రికెట్‌ 2024 టోర్నీ ఫైన‌ల్లో రాజస్తాన్ కింగ్స్,  న్యూయార్క్ సూపర్ స్ట్రైయికర్స్ జ‌ట్లు త‌ల‌ప‌డ్డాయి. రాజస్తాన్ కింగ్స్ జట్టు ఛాంపియ‌న్స్‌గా నిలిచింది. ఫిక్సింగ్ ఆరోపణలు ఎదుర్కొంటున్న ఇద్దరిలో ఒకడైన పటేల్‌, లెజెండ్స్ క్రికెట్ ట్రోఫీ 2024 ఆడిన క్యాండీ కాంప్ ఆర్మీ టీమ్‌కి యజమాని కావ‌డం గ‌మ‌నార్హం. కాగా ఈ ఇద్దరూ మ్యాచ్ ఫిక్సింగ్ చేసేందుకు ప్రయత్నించినట్టుగా న్యూజిలండ్ మాజీ క్రికెటర్ నీల్‌ బ్రూమ్, శ్రీలంక ఛీప్ సెల‌క్ట‌ర్ ఉపుల్ తరంగ.. క్రీడా శాఖ మంత్రిత్వ శాఖ స్పెషల్ ఇగ్వెస్టిగేషన్ యూనిట్‌‌కి ఫిర్యాదు చేశారు.

ఐపీఎల్‌-2024లో భాగంగా ఉప్ప‌ల్‌లోని రాజీవ్ గాంధీ అంత‌ర్జాతీయ స్టేడియం వేదిక‌గా స‌న్‌రైజ‌ర్స్ హైద‌రాబాద్‌, గుజ‌రాత్ టైటాన్స్ జ‌ట్లు త‌ల‌ప‌డ‌నున్నాయి. ఈ మ్యాచ్‌కు వ‌ర్షం అంత‌రాయం క‌లిగించింది.  భారీ వ‌ర్షం కార‌ణంగా ఉప్ప‌ల్ మైదానం ఔట్ ఫీల్డ్ చిత్త‌డిగా మారింది. మైదానాన్ని సిద్ధం చేసే ప‌నిలో గ్రౌండ్ స్టాప్ ప‌డ్డారు.అయితే ఇంకా చిన్నపాటి జల్లు కురుస్తుండ‌డంతో సెంట్ర‌ల్ పిచ్‌ను మాత్రం క‌వ‌ర్స్‌తో క‌ప్పి ఉంచారు. దీంతో టాస్ ఆల‌స్యం కానుంది. ఇక ఈ మ్యాచ్ నిర్వ‌హ‌ణ‌పై హెచ్‌సీఏ అధ్యక్షుడు జగన్ మోహన్ రావు కీల‌క ప్ర‌క‌ట‌న చేశారు. వ‌ర్షం త‌గ్గినా ఔట్ ఫీల్డ్ త‌డిగా ఉండ‌టంతో మైదానాన్ని సిద్దం చేసుందుకు 100 మందికి పైగా గ్రౌండ్ స్టాప్ శ్రమిస్తున్నార‌ని  జగన్ మోహన్ రావు తెలిపారు.  మ్యాచ్‌ నిర్వహణకు రాత్రి 10.30 వరకు సమయం ఉన్నట్లు ఆయ‌న పేర్కొన్నారు. 

ప్రపంచ క్రికెట్‌లో అత్యుత్తమ బ్యాటర్లలో టీమిండియా కెప్టెన్ రోహిత్ శ‌ర్మ ముందు వ‌రుస‌లో ఉంటాడ‌న‌డంలో ఎటువంటి సందేహం లేదు. వ‌ర‌ల్డ్‌క్లాస్ బౌల‌ర్ల‌ను సైతం భ‌య‌పెట్టిన ఘ‌న‌త హిట్‌మ్యాన్‌ది. వ‌న్డే క్రికెట్‌లో రెండు సార్లు డబుల్ సెంచ‌రీ బాదిన ఏకైక మొన‌గాడు రోహిత్ శ‌ర్మనే. అటువంటి రోహిత్ శ‌ర్మ త‌న కెరీర్‌లో ఒక బౌల‌ర్‌కు భ‌య‌ప‌డ్డాడ‌ట‌. అత‌డే ద‌క్షిణాఫ్రికా పేస్ దిగ్గ‌జం డేల్ స్టెయిన్‌. రోహిత్ శ‌ర్మ తాజాగా దుబాయ్ ఐ 103.8 అనే ఛాన‌ల్‌కు ఇంట‌ర్వ్యూ ఇచ్చాడు. ఈ క్ర‌మంలో త‌న కెరీర్‌లో ఎదుర్కొన్న అత్యంత క‌ఠిన‌మైన బౌల‌ర్ ఎవ‌ర‌న్న ప్ర‌శ్న హిట్‌మ్యాన్‌కు ఎదురైంది. అందుకు బ‌దులుగా రోహిత్ శ‌ర్మ‌.. డేల్ స్టెయిన్ అంటూ బ‌దులిచ్చాడు."నేను నా కెరీర్‌లో ఎదుర్కొన్న అత్యంత క‌ఠిన‌మైన బౌల‌ర్ డేల్ స్టేయిన్‌. స్టేయిన్ ప్ర‌త్య‌ర్ధి జ‌ట్టులో ఉంటే నేను బ్యాటింగ్‌కు వెళ్లే ముందు అత‌డి బౌలింగ్ వీడియోలను 100 సార్లు చూసేవాడిని. స్టెయిన్ అద్భుత‌మైన బౌల‌ర్‌. అత‌డొక లెజెండ్‌. అత‌డు బంతిని అద్భుతంగా స్వింగ్ చేయ‌గ‌ల‌డు. అతడి బౌలింగ్‌లో ఆడటాన్ని ఆస్వాదిస్తాన‌ని"  రోహిత్ పేర్కొన్నాడు. 

టీ20 వ‌ర‌ల్డ్‌క‌ప్‌-2024కు స‌మ‌యం ద‌గ్గ‌ర‌ప‌డుతుండ‌డంతో ఇంగ్లండ్ క్రికెట్ బోర్డు త‌మ జ‌ట్టు ఆట‌గాళ్ల‌ను ఐపీఎల్‌-2024 నుంచి వెన‌క్కి పిలిచిన సంగ‌తి తెలిసిందే. ఈ క్ర‌మంలో ఇంగ్లండ్ ప‌రిమిత ఓవ‌ర్ల కెప్టెన్ జాస్ బట్లర్ (రాజస్థాన్ రాయల్స్), ఫిల్ సాల్ట్ (కోల్‌కతా నైట్ రైడర్స్), విల్ జాక్స్ (రాయల్ ఛాలెంజర్స్ బెంగళూరు), రీస్ టోప్లీ (ఆర్సీబీ) సామ్ కుర్రాన్ (పంజాబ్ కింగ్స్) స్వ‌దేశానికి ప‌య‌న‌మ‌య్యారు.టీ20 వ‌ర‌ల్డ్‌క‌ప్‌-2024 స‌న్న‌హాకాల్లో భాగంగా ఇంగ్లండ్ జ‌ట్టు మే 22 నుంచి నాలుగు మ్యాచ్‌ల సిరీస్‌లో పాకిస్తాన్‌తో త‌ల‌ప‌డ‌నుంది. ఈ సిరీస్‌కు ముందు త‌మ ఆట‌గాళ్ల‌కు విశ్రాంతి ఇవ్వాలనే ఉద్దేశ్యంతో 10 రోజుల ముందే స్వ‌దేశానికి రావాల‌ని తమ ఆట‌గాళ్ల‌ను ఈసీబీ ఆదేశించింది. అయితే ప్లే ఆఫ్స్‌కు ముందు స్టార్ ప్లేయ‌ర్లు ఈ ఏడాది సీజ‌న్ నుంచి వైదొల‌గ‌డం ఆ జ‌ట్ల‌కు పెద్ద ఎద‌రుదెబ్బ‌గానే చెప్పుకోవాలి. బుధవారం పంజాబ్ కింగ్స్‌తో జ‌రిగిన మ్యాచ్‌లో 5 వికెట్ల తేడాతో రాజ‌స్తాన్ రాయ‌ల్స్ ఓట‌మి పాలైంది. ఈ మ్యాచ్‌లో రాజ‌స్తాన్ జ‌ట్టులో బ‌ట్ల‌ర్ లేని స్పష్టంగా కన్పించింది. మరోవైపు  ఆర్సీబీ ప్లే ఆఫ్స్ రేసులో నిలబడాలంటే మే 17న సీఎస్‌కేతో డూ ఆర్‌డై మ్యాచ్‌లో తలపడనుంది. గత కొన్ని మ్యాచ్‌ల నుంచి ఆర్సీబీ విజయాల్లో కీలక పాత్ర పోషిస్తున్న విల్ జాక్స్.. సీఎస్‌కేతో మ్యాచ్‌కు దూరం కావడం కచ్చితంగా ఆర్సీబీపై ప్రభావం చూపిస్తోంది. ఈ నేపథ్యంలో సీజన్ పూర్తికాకుండానే మధ్యలోనే వైదొలుగుతున్న విదేశీ ఆటగాళ్లపై మాజీ భారత ఆల్ రౌండర్ ఇర్ఫాన్ పఠాన్ మండిపడ్డాడు. ‘‘ఉంటే పూర్తి సీజన్‌కి అందుబాటులో ఉండండి లేదా అసలు రావద్దు!’’ అంటూ ఎక్స్ వేదికగా పఠాన్ ఫైరయ్యాడు. 

భారత ఫుట్‌బాల్‌ దిగ్గజం సునిల్‌ ఛెత్రి 39 ఏళ్ల వయసులో అంతర్జాతీయ కెరీర్‌కు ముగింపు పలకాలని నిర్ణయించుకున్నట్లు తెలిపాడు. ఈ మేరకు .. గురువారం (మే 16) ప్రకటన విడుదల చేశాడు. తన ఇంటర్నేషనల్‌ కెరీర్‌లో సునిల్‌ ఛెత్రి మొత్తంగా 150 మ్యాచ్‌లలో 94 గోల్స్ సాధించాడు.  భారత ఫుట్‌బాల్‌ కెప్టెన్‌గానూ సునిల్‌ ఛెత్రి సేవలు అందించాడు.సునిల్‌ ఛెత్రి వ్యక్తిగత జీవితం గురించి కొంతమందికి మాత్రమే తెలుసు. అతడి లవ్‌స్టోరీ గురించి ఈ కథనంలో తెలుసుకుందాం.  సునిల్‌ ఛెత్రి తన కోచ్‌, భారత మాజీ ఆటగాడు సుబ్రతా భట్టాచార్య కుమార్తె సోనం భట్టాచార్యను ప్రేమించి పెళ్లి చేసుకున్నాడు. తన ప్రేమ కథ గురించి సునిల్‌ ఛెత్రి గతంలో హ్యూమన్స్‌ ఆఫ్‌ బాంబేకి ఇచ్చిన ఇంటర్వ్యూలో వెల్లడించాడు.  ‘‘నాకు అప్పుడు 18 ఏళ్లు. ఆమెకు 15 ఏళ్లు. వాళ్ల నాన్న గురించి అందరితో గొప్పగా చెప్పేవారు.ఆమె వాళ్ల నాన్న దగ్గరి నుంచి నా నా నెంబర్‌ దొంగతనం చేసి.. నాకు మెసేజ్‌లు పంపేది. ‘నేను సోనం.. నేను మీకు వీరాభిమానిని. మిమ్మల్ని కలవాలని అనుకుంటున్నాను’ అని సందేశాలు పంపించేది.నాకు మాత్రం అప్పటికి తనెవరో తెలియదు. అయితే, ఆమె మాట్లాడే విధానం నచ్చి ఓ రోజు తనను కలవాలని నిర్ణయించుకున్నా. తనని చూడగానే ఇంత చిన్నపిల్లా నాకు మెసేజ్‌లు పంపేది అనుకున్నా. ‘నువ్వింకా చిన్నదానివి. వెళ్లి బుద్ధిగా చదువుకో’ అని చెప్పి వెళ్లిపోయా.అయితే, తన మెసేజ్‌లకు రిప్లై ఇవ్వడం మాత్రం మానలేకపోయా. రెండున్నర నెలల తర్వాత మా కోచ్‌ ఫోన్‌ పనిచేయడం లేదని.. ప్రాబ్లం ఏమిటో చూడాలని నాకు ఇచ్చారు. అప్పుడు మా కోచ్‌ వాళ్ల కూతురి నంబర్‌, నాకు మెసేజ్‌లు చేసే అమ్మాయి నంబర్‌ ఒకేలా అనిపించింది.అప్పుడే నాకు అర్థమైంది తను మరెవరో కాదు మా కోచ్‌ కూతురేనని! వెంటనే సోనంకు కాల్‌ చేసి.. ఈ విషయం గురించి మీనాన్నకు తెలిస్తే నా కెరీర్‌ ముగిసిపోతుంది. ఇక చాలు అని చెప్పేశా.అప్పుడు సోనం నాకు సారీ చెప్పింది. అయితే, విధి రాత మరోలా ఉంది. తను నా మనసులో అలాగే ఉండిపోయింది. ఆమెతో మాట్లాడాలని, మెసేజ్‌ చేయాలని మా మనసు తహతహలాడేది. సీక్రెట్‌గా కలిసేవాళ్లం. నా బిజీ షెడ్యూల్‌ కారణంగా ఏడాదిలో రెండు మూడుసార్లు మాత్రమే నేరుగా కలిసేందుకు వీలయ్యేది.సినిమాకు వెళ్లి రెండు టికెట్లు కొని.. ఒకటి తనకోసం కౌంటర్‌ దగ్గరే వదిలేసి వెళ్తే తను వచ్చి తీసుకునేది. చాలా ఏళ్లపాటు అలాగే ప్రేమలో మునిగితేలాం.నా కెరీర్‌తో పాటు మా ప్రేమ కూడా ట్రాక్‌లో పడింది. సరైన వయసు వచ్చిన తర్వాత పెళ్లి చేసుకోవాలని నిర్ణయించుకున్నాం.ఈ విషయం గురించి మా కోచ్‌తో మాట్లాడాలని నిర్ణయించుకున్నా. కానీ ధైర్యం చాల్లేదు. ఎలాగోలా ధైర్యం తెచ్చుకుని ‘సర్‌.. నేను మీ అమ్మాయిని ప్రేమిస్తున్నా’ అని చెప్పాను. ఆయన వెంటనే అవునా.. సరే అంటూ వాష్‌రూంలోకి వెళ్లిపోయారు. కాసేపటికి వచ్చి మాకు గ్రీన్‌సిగ్నల్‌ ఇచ్చేశారు.ఆతర్వాత కొన్ని నెలలకు మా పెళ్లి జరిగింది. 13 ఏళ్లు ప్రేమించుకుని పెళ్లి చేసుకున్నాం. తనే నా ధైర్యం.సపోర్ట్‌ సిస్టం. ప్రతి అడుగులోనూ నా వెంటే ఉంటుంది. తను లేకుంటే నేను లేను. ఇప్పటికీ తను నాకు వీరాభిమానే!’’ అని సునిల్‌ ఛెత్రి  తెలిపాడు. కాగా సునిల్‌- సోనం జంటకు 2023లో కుమారుడు జన్మించాడు.