సాక్షి,చైన్నె: ఎంజీఎం హెల్త్‌ కేర్‌లో 11 నెలల శిశువుకు కాలేయ మార్పిడి శస్త్ర చికిత్సను విజయవంతంగా నిర్వహించారు. గురువారం ఈ వివరాలను ఎంజీఎం వైద్యులు డాక్టర్‌ త్యాగరాజన్‌ శ్రీనివాసన్‌, డాక్టర్‌ కార్తీక్‌ మదివానన్‌ మీడియాకు వివరించారు. ఒడిశాకు చెందిన ఓ దంపతులకు జన్మించిన 11 నెలల శిశువు కాలేయ కేన్సర్‌తో బాధ పడుతున్నట్టు వైద్యులు గుర్తించారు. ఈ శిశువును శస్త్ర చికిత్స నిమిత్తం చైన్నెకు తీసుకొచ్చారు. ఎంజీఎం ఆస్పత్రిలో కొద్ది రోజుల క్రితం 40 మంది వైద్యులతో కూడిన బృందం 16 గంటల పాటు సంక్లిష్టమైన శస్త్ర చికిత్సను నిర్వహించింది. ఈ శిశువుకు తమిళనాడుకు చెందిన 42 ఏళ్ల దాత నుంచి కాలేయం సేకరించారు. ఈ దాత కాలేయం పెద్దది కావడంతో దాని స్వరూపం తగ్గించేందుకు, సంరక్షించేందుకు ఆధునిక విధానాన్ని అనుసరించి 11 నెలల శిశువుకు కాలేయ మార్పిడి శస్త్ర చికిత్సను విజయవంతం చేశామని వైద్యులు వివరించారు. ఎంజీఎం హెల్త్‌ కేర్‌ సీఈఓ హరీష్‌ మణియన్‌ పాల్గొన్నారు.
TV
