జగదాంబ : జీవీఎంసీ 35వ వార్డు సైలాడ పైడితల్లి కల్యాణ మండపం 77వ పోలింగ్‌ బూత్‌ వద్ద టీపీడీ–జనసేన, వైఎస్సార్‌సీపీ నాయకుల మధ్య వాగ్యుద్ధం, తోపులాట జరిగింది. పోలింగ్‌ సమయం ముగిసిపోవడం పోలీసులు బయట గేట్లు మూసివేశారు. అయితే అక్కడే ఉన్న టీడీపీ–జనసేన నాయకులు బయట ఉన్న కొందరు ఓటర్లను లోపలికి పంపించి ఓట్లు వేయించే ప్రయత్నం చేశారు. విషయం తెలుసుకున్న వైఎస్సార్‌సీపీ నాయకులు దీనిని అడ్డుకున్నారు. దీంతో టీడీపీ–జనసేన, వైఎస్సార్‌సీపీ నాయకుల మధ్య ఘర్షణ చెలరేగింది. ఒకరినొకరు తోసుకున్నారు. సుమారు గంటసేపు ఈ హడావుడి కొనసాగింది. ఈ నేపథ్యంలో ఎమ్మెల్యే అభ్యర్ధి వాసుపల్లి గణేష్‌కుమార్‌ అటుగా వచ్చారు. దీంతో టీడీపీ–జనసేన నాయకులు పెద్ద ఎత్తున నినాదాలు చేశారు. వాసుపల్లి కారుకు అడ్డంగా నిల్చుని ముందుకెళ్లకుండా అడ్డగించారు. విషయం తెలుసుకున్న డీసీపీ సత్తిబాబు సిబ్బందితో సంఘటనా స్థలానికి చేరుకుని పరిస్థితిని అదుపులోకి తీసుకొచ్చారు. టీడీపీ–జనసేన, వైఎస్సార్‌సీపీ నాయకుల మధ్య ఘర్షణ ఎమ్మెల్యే అభ్యర్థి వాసుపల్లి కారు అడ్డగింత డీసీపీ రాకతో సద్దుమణిగిన వ్యవహారం

విశాఖ సిటీ: వృద్ధులు, మహిళలతో పాటు యువతీ, యువకులు సైతం ఉత్సాహంగా ఓటు హక్కు వినియోగించుకున్నారు. ముఖ్యంగా గత ఎన్నికల కంటే అత్యధిక సంఖ్యలో యువ ఓటర్లు ఈసారి ఓటింగ్‌లో పాల్గొన్నారు. ఉన్నత విద్య, ఉద్యోగాల నిమిత్తం ఇతర రాష్ట్రాల్లో ఉన్న వారు సైతం ఈ ఎన్నికల్లో తమ ఓటు హక్కు వినియోగించుకోవడానికి ఆసక్తి చూపించారు. పోలింగ్‌ కేంద్రాల్లో ఉత్సాహంగా స్నేహితులతో కలిసి కూలైన్లలో నిలబడి సందడి చేశారు. కొన్ని మోడల్‌ పోలింగ్‌ కేంద్రాల్లో ఏర్పాటు చేసిన సెల్ఫీ స్టాండ్స్‌ వద్ద సెల్ఫీలు దిగారు. అలాగే తొలిసారిగా తమ చూపుడు వేలుకు అంటిన సిరా చుక్కతో సెల్ఫీ తీసుకొని సోషల్‌ మీడియాలో పెట్టుకొని సంబరపడ్డారు.

ఎంవీపీ కాలనీ: జీవీఎంసీ 18వ వార్డుకు చెందిన ఓ టీడీపీ నాయకుడు అత్యుత్సాహం ప్రదర్శించాడు. ఎన్నికల నియమావళి పక్కన పెట్టి ఎంవీపీ కాలనీ అప్పుఘర్‌కు చెందిన టీడీపీ నాయకుడు పోలవరపు అప్పారావు సోషల్‌ మీడియాలో ఎన్నికల ప్రచారం నిర్వహించారు. సోమవారం ఉదయాన్నే సమత కళాశాల పోలింగ్‌ స్టేషన్‌కు వెళ్లి టీడీపీ అభ్యర్థి వెలగపూడికి ఓటు వేశానని ప్రచారం చేశారు. 48 గంటల ముందు నుంచి ప్రచారం నిలిపేయాలనే కచ్చితమైన నిబంధన ఉంది. అయితే టీడీపీకి ఓటు వేశానని సిరా ఇంకుతో కూడిన వేలు చూపు సోషల్‌ మీడియాలో పోస్టు పెట్టి ఆయన నిబంధనలు ఉల్లంఘించారు. నిబంధనలకు విరుద్ధంగా వ్యవహరించిన అప్పారావుపై చర్యలు తీసుకోవాలని ఇతర పార్టీల నాయకులు డిమాండ్‌ చేశారు. ఈ మేరకు ఎన్నికల అధికారులకు సైతం ఫిర్యాదు చేసినట్లు వెల్లడించారు. నిబంధనలు తుంగలోకి తొక్కి సోషల్‌ మీడియా ప్రచారం వెలగపూడికి ఓటేయాలంటూ ఓటర్లకు ప్రలోభాలు

మధురవాడ: మధురవాడ మల్లయ్యపాలెం పోలింగ్‌ కేంద్రంలో వైఎస్సార్‌ సీపీ రీజినల్‌ కో–ఆర్డినేటర్‌, రాజ్యసభ సభ్యుడు వై.వి.సుబ్బారెడ్డి సోమవారం తన ఓటు హక్కును వినియోగించుకున్నారు. ఈ సందర్భంగా ఆయన మీడియాతో మాట్లాడుతూ ప్రజాస్వామ్య దేశంలో ప్రజలంతా బాధ్యతగా తరలి వచ్చి ఓటు వేయడం మంచి పరిణామన్నారు. ఓటర్లు ఎండలో, తగిన తాగునీరు లేక ఇబ్బందులు పడుతున్నట్టు తన దృష్టికి తీసుకొచ్చారన్నారు. అధికార యంత్రాంగం తగిన ఏర్పాట్లు చేయాలని కోరా రు. ఆయన వెంట వైఎస్సార్‌ సీపీ వార్డు అధ్యక్షుడు పోతిన హనుమంతురావు, నాయకులు కుడితి రామారావు, వంకాయల మారుతీ ప్రసాద్‌, జగ్గుపిల్లి నరేష్‌, అల్లాడ లింగేశ్వరరావు, అల్లాడ వెంకటరావు, బగాది లక్ష్మణ తదితరులు పాల్గొన్నారు. పోలింగ్‌ కేంద్రం పరిశీలన జీవీఎంసీ 5వ వార్డు మారికవలసలోని ఆర్‌జీకే పోలింగ్‌ కేంద్రాన్ని వైఎస్సార్‌ సీపీ ఎంపీ అభ్యర్థి బొత్స ఝాన్సీలక్ష్మి, ఎమ్మెల్యే అభ్యర్థి ముత్తంశెట్టి శ్రీనివాసరావు పరిశీలించారు. ఈ సందర్భంగా బొత్స ఝాన్సీ మాట్లాడుతూ టీడీపీ అభ్యర్థి గంటా శ్రీనివాసరావు పోలింగ్‌ కేంద్రాల్లోకి పార్టీ కండువాతో ప్రవేశించి ఓటర్లను ప్రభావితం చేశారని, అతనిపై అధికారులు చర్యలు తీసుకోవాలని డిమాండ్‌ చేశారు. ఐదో వార్డు అధ్యక్షుడు పోతిన హనుమంతురావు పాల్గొన్నారు.

తాటిచెట్లపాలెం: వేసవి సీజన్‌ దృష్ట్యా, ఎన్నికల నేపథ్యంలో ప్రయాణికుల రద్దీని తగ్గించేందుకు ఈస్ట్‌ కోస్ట్‌ రైల్వే వాల్తేర్‌ డివిజన్‌ పరిధిలో పలు ప్రత్యేక రైళ్లు నడుపుతున్నట్లు సీనియర్‌ డివిజనల్‌ కమర్షియల్‌ మేనేజర్‌ కె.సందీప్‌ ఒక ప్రకటనలో తెలిపారు. ప్రత్యేక రైళ్ల వివరాలిలా.. ● ఎస్‌ఎంవీటి బెంగళూరు–ఖుర్దారోడ్‌(06253) సమ్మర్‌ స్పెషల్‌ ఈ నెల 21వ తేదీ రాత్రి 11 గంటలకు బెంగళూరులో బయల్దేరి మరుసటి రోజు సాయంత్రం 5.48 గంటలకు దువ్వాడ చేరుకుని, 5.50 గంటలకు బయల్దేరి 23న ఉదయం 11 గంటలకు ఖుర్దారోడ్‌ చేరుకుంటుంది. ● తిరుగు ప్రయాణంలో ఖుర్దారోడ్‌–ఎస్‌ఎంవీటీ బెంగళూరు(06254) స్పెషల్‌ రైలు ఖుర్దారోడ్‌లో 23వ తేదీ మధ్యాహ్నం ఒంటి గంటకు బయల్దేరి మరుసటి రోజు తెల్లవారు 4.58 గంటలకు దువ్వాడ చేరుకుని, అక్కడ నుంచి 5 గంటలకు బయల్దేరి 24న రాత్రి 10.40 గంటలకు బెంగళూరు చేరుకుంటంది. ● విశాఖపట్నం–సికింద్రాబాద్‌ (08589) స్పెషల్‌ ఈ నెల 14వ తేదీ సాయంత్రం 4.15 గంటలకు బయల్దేరి ముసటి రోజు ఉదయం 6.15 గంటలకు సికింద్రాబాద్‌ చేరుకుంటుంది. ● తిరుగు ప్రయాణంలో సికింద్రాబాద్‌–విశాఖపట్నం(08590) స్పెషల్‌ సికింద్రాబాద్‌లో ఈ నెల 15న బుధవారం ఉదయం 10.30 గంగటలకు బయల్దేరి అదే రోజు రాత్రి 11.30 గంటలకు విశాఖపట్నం చేరుకుంటుంది.