● పశ్చిమలో అడ్డదారులు తొక్కుతున్న టీడీపీ ● యథేచ్ఛగా డబ్బులు, వెండి సామగ్రి పంపకం గోపాలపట్నం: ఓటమి భయంతో విశాఖ పశ్చిమంలో టీడీపీ నాయకులు నీచ రాజకీయాలకు తెరలేపారు. గతంలో ఆర్పీలకు బంగారు ఆభరణాలు ఇవ్వగా.. ఇప్పుడు డ్వాక్రా గ్రూపు అధ్యక్ష కార్యదర్శులకు వెండి గిన్నెలు అందిస్తున్నారు. అక్కడితో ఆగకుండా డ్వాక్రా గ్రూపు మహిళలతో సమావేశాలు ఏర్పాటు చేసి.. వారికి భోజనాలు పెడుతున్నారు. డ్వాక్రా పుస్తకాల మొదటి పేజీ జిరాక్స్‌ ఇస్తే డబ్బులు ఇస్తామంటూ ప్రలోభ పెడుతున్నారు. ప్రతీ వార్డులో స్థానిక నాయకులతో వీటిని సేకరించే కార్యక్రమాలు చేస్తున్నారు. ఇది ఎన్నికల నిబంధనలకు విరుద్ధమని తెలిసినా.. ఓటమి భయంతో అడ్డదారులు తొక్కుతున్నారు. ఇందుకు డాక్‌ స్వచ్ఛంద సంస్థ కూడా సహకరిస్తుందని తెలుస్తోంది. గ్రూపుల్లో మహిళల వివరాలు, వారికి ఎక్కడ ఓటు ఉంది, వారు ఏఏ పార్టీకి చెందిన వారు తదితర వివరాలు ఇస్తున్నట్లు సమాచారం. దీనిపై పలువురు తీవ్రస్థాయిలో మండిపడుతున్నారు. టీడీపీ నాయకుల తాయిలాలను వ్యతిరేకిస్తున్న వారిపై బెదిరింపులకు దిగుతున్నారు. కాగా.. పశ్చిమ టీడీపీ నాయకులపై ఎన్ని ఆరోపణలు వస్తున్నా.. ఎన్నికల అధికారులు కనీసం చర్యలు తీసుకోవడం లేదని పలువురు ఆగ్రహం వ్యక్తం చేస్తున్నారు. ఓటర్లకు గడియారాల పంపిణీ కంచరపాలెం: జీవీఎంసీ 57వ వార్డు ఊర్వశి కూడలి, ఐటీటీ జంక్షన్‌, మర్రిపాలెం ప్రాంతాల్లో ఓటర్లను ప్రలోభపెడుతూ టీడీపీ నాయకులు గడియారాలను పంచిపెట్టారు. చంద్రబాబు, పశ్చిమ ఎమ్మెల్యే అభ్యర్థి గణబాబు చిత్రపటాలతో సిద్ధం చేసిన గడియారాలను ఆ పార్టీ వార్డు అధ్యక్షుడు పెంటకోట అజయ్‌బాబు ఓటర్లకు తాయిలాలుగా అందించారు. తమ ఎమ్మెల్యే అభ్యర్థికి ఓటు వేయాలని గడియారాలను అందిస్తూ దర్జాగా ప్రచారం చేస్తున్నా.. ఎన్నికల పర్యవేక్షణ అధికారులు ఏం పట్టనట్టుగా వ్యవహరిస్తున్నారని పలువురు ఆరోపిస్తున్నారు.

సింహాచలం: వరాహ, నారసింహ రూపాలను ఒక్కటిగా చేసుకుని సంవత్సరమంతా చందనం మణుగుల్లో నిత్య రూపంలో దర్శనమిచ్చే సింహాద్రినాథుడి నిజరూప దర్శనం లభించే సమయం ఆసన్నమైంది. వైశాఖ శుద్ధ తదియను పురస్కరించుకుని సింహగిరిపై కొలువైన శ్రీ వరాహ లక్ష్మీ నృసింహస్వామి చందనోత్సవం శుక్రవారం జరగనుంది. ఏడాదిలో కేవలం ఒక్క రోజులోని కొన్ని గంటలు మాత్రమే లభించే ఈ అరుదైన దర్శనాన్ని చేసుకునేందుకు భక్తులు తరలిరానున్నారు. ఈ నేపథ్యంలో జిల్లా యంత్రాంగం భారీ ఏర్పాట్లు చేసింది. స్వామిని దర్శించుకునేందుకు వచ్చే సాధారణ భక్తులకే పెద్దపీట వేస్తూ.. వారికి దర్శనాల్లో ఎలాంటి ఇబ్బందులు కలగకుండా కలెక్టర్‌ ఎ.మల్లికార్జున, సింహాచలం ఈవో ఎస్‌.శ్రీనివాసమూర్తి ఆధ్వర్యంలో అన్ని శాఖల అధికారులు ఏర్పాట్లు చేశారు. ఎన్నికల నియమావళి అమలులో ఉండటంతో ఈసారి ప్రోటోకాల్‌ దర్శనాలు ఇవ్వడం లేదు. వెండి బొరుగులతో చందనం ఒలుపు చందనోత్సవం పురస్కరించుకుని శుక్రవారం తెల్లవారుజామున ఒంటి గంట నుంచి పాంచరాత్ర ఆగమశాస్త్రం ప్రకారం ఆలయ అర్చకులు వైదిక కార్యక్రమాలు ప్రారంభిస్తారు. సుప్రభాతసేవ, విశ్వక్సేన పూజ, పుణ్యాహవాచనం, రుత్విగ్వరణం, కలశారాధన చేస్తారు. అనంతరం వెండి బొరుగులతో స్వామిపై ఉన్న చందనాన్ని తీసి నిజరూపభరితుడిని చేస్తారు. తెల్లవారుజామున 3.30 గంటల నుంచి 4.30 గంటల వరకు దేవస్థానం అనువంశిక ధర్మకర్త కుటుంబ సభ్యులు, దాతలు, జ్యుడీషియల్‌కు అంతరాలయ దర్శనాలు కల్పిస్తారు. తదుపరి అంతరాలయ దర్శనాలు నిలిపివేస్తారు. అందరికీ ఆలయ నీలాద్రిగుమ్మం వద్ద నుంచే లఘు దర్శనం కల్పిస్తారు. ఎలాంటి పూజలు, ఆశీర్వచనాలు ఉండవు. దర్శన స్లాట్‌లు కేటాయింపు ఉదయం 4 గంటల నుంచి ఉచిత దర్శనం, రూ.300, రూ.1000 క్యూల్లో ఉన్న భక్తులకు దర్శనాలు ప్రారంభిస్తారు. ఉదయం 5.30 గంటల నుంచి రూ.1,500 క్యూలో ఉన్న భక్తులకు దర్శనాలు కల్పిస్తారు. రూ.300 టికెట్లకు సంబంధించి ఉదయం 4 గంటల నుంచి సాయంత్రం 6 గంటల వరకు, రూ.1000 టికెట్లకు సంబంధించి ఉదయం 4 గంటల నుంచి సాయంత్రం 4 గంటల వరకు, రూ. 1,500 టికెట్లకు సంబంధించి ఉదయం 5.30 గంటల నుంచి మధ్యాహ్నం 12 గంటల వరకు దర్శన టైమ్‌ స్లాట్‌లు కేటాయించారు. లక్ష మంది భక్తులు వస్తారని అంచనా ఈ సారి లక్ష మంది భక్తులు చందనోత్సవానికి వస్తారని అధికారులు అంచనా వేశారు. అందుకు తగ్గట్టుగా రూ.300 టికెట్లు 20 వేలు, రూ.1000 టికెట్లు 15 వేలు, రూ.1500 టికెట్లు 5 వేలు కలిపి మొత్తం 40 వేలు టికెట్లు మాత్రమే విక్రయించారు. 60 వేల మందికి ఉచిత దర్శనం ఏర్పాటుచేసేలా ఏర్పాట్లు చేశారు. రాత్రి 7 గంటల తర్వాత గేట్లు మూసివేత 10వ తేదీ శుక్రవారం రాత్రి 7 గంటల్లోపు మాత్రమే సింహగిరిపై దర్శనాల క్యూల్లోకి భక్తులను అనుమతిస్తారు. రాత్రి 7 గంటలకు క్యూల ప్రవేశ ద్వారాలు మూసివేసి అప్పటి వరకు క్యూల్లో ఉన్న భక్తులకు స్వామి దర్శనం కల్పిస్తారు. సాయత్రం 6 గంటల వరకు మాత్రమే సింహగిరిపైకి బస్సుల్లో భక్తులను అనుమతిస్తారు. ఆ తర్వాత ఖాళీ బస్సులను కొండపైకి పంపించి కొండపై ఉన్న భక్తులను కొండ దిగువకి చేరుస్తారు. 9వ తేదీ గురువారం సాయంత్రం 6 గంటల తర్వాత కూడా భక్తులను కొండపైకి అనుమతించరు. ఏర్పాట్లు ఇలా.. ● సింహగిరికి డ్యూటీలో ఉన్న వారికి మాత్రమే పరిమితంగా పాస్‌లు అందిస్తారు. ● ఈ సారి అడవివరంలోని గురుకుల పాఠశాలకు సమీపంలోని రెండవ ఘాట్‌ రోడ్డు నుంచే బస్సులు సింహగిరికి వెళ్లేలా, తొలి – మిగతా 8లో లక్ష మంది భక్తులు వస్తారని అంచనా తెల్లవారుజామున 4 గంటల నుంచి సర్వ దర్శనం ప్రారంభం సాయంత్రం 6 గంటల తర్వాత సింహగిరిపైకి భక్తులకు అనుమతి లేదు రూ.300, రూ.1000, రూ.1500 టికెట్ల వారికి దర్శన సమయాల స్లాట్‌లు

నియోజకవర్గంలో రూ.22.34 కోట్లతో వార్డుల్లో ప్రధాన రహదారులతో పాటు వీధి రోడ్లు నిర్మించారు. రూ 2.35కోట్లతో చినగదిలి కూడలి నుంచి సూర్యతేజానగర్‌ వరకు అర కిలోమీటర్‌ పొడవున 20 అడుగుల వెడల్పు రోడ్డును 60 నుంచి 80 అడుగుల రోడ్డుగా విస్తరించారు. ● రూ.1.99కోట్లతో హనుమంతవాక, కై లాసగిరి కూడలి వరకు రోడ్డు విస్తరించారు. సుమారు 1,200 మీటర్ల పొడవున్న ఈ రోడ్డును అవరమైనచోట్ల విస్తరించి.. ఇరుపక్కలా కాలువలు, పాత్‌వేలు నిర్మాణం చేపట్టారు. ● రూ.4 కోట్ల జీవీఎంసీ నిధులతో సీతకొండ వద్ద బీచ్‌రోడ్డును విస్తరించారు. సీతకొండ మలుపు వద్ద వైఎస్సార్‌ సీ వ్యూ పాయింట్‌ నుంచి సీతకొండ చివర వరకు సుమారు 400 మీటర్ల పొడవున 30 అడుగుల రోడ్డును 80 అడుగులకు విస్తరించారు. ● రూ.6 కోట్ల వీఎంఆర్డీఏ నిధులతో జాతీయరహదారిపై విశాఖవేలీ స్కూల్‌ కూడలి నుంచి సీతకొండ చివర బీచ్‌రోడ్డు వరకు సుమారు ఒకటిన్నర కిలోమీటర్ల పొడవున డబుల్‌ రోడ్డు నిర్మించారు. ● రూ.7కోట్లతో పెదగదిలి నుంచి అంబేడ్కర్‌ కూడలి, అంబేడ్కర్‌ కూడలి నుంచి సూర్యతేజానగర్‌ వరకు డబుల్‌ రోడ్లు, ఫుట్‌పాత్‌లు, కాలువల పనులు ప్రారంభించారు. ● అన్ని వార్డుల్లోని వీధుల్లో మరో రూ.3 కోట్లతో సీసీ, బీటీ రోడ్లు నిర్మించారు.

● మెరిసిన విశాఖ విద్యార్థులు ● రాష్ట్ర స్థాయిలో ఇద్దరికి ఒకటో ర్యాంకు ● టాప్‌టెన్‌ ర్యాంకుల్లో ముగ్గురికి చోటు ● 12,147 మందిలో 10,813 మంది ఉత్తీర్ణత విశాఖ విద్య/తగరపువలస: పాలిటెక్నిక్‌ డిప్లమో కోర్సుల్లో ప్రవేశాలకు నిర్వహించిన ప్రవేశ పరీక్ష(పాలిసెట్‌–2024)లో జిల్లా విద్యార్థులు సత్తా చాటారు. జిల్లాకు చెందిన ఎక్కువ మంది విద్యార్థులు అర్హత సాధించడంతో పాటు ర్యాంకుల సాధనలోనూ టాప్‌లో నిలిచారు. సాంకేతిక విద్యాశాఖ అధికారులు బుధవారం పాలిసెట్‌ ఫలితాలు ప్రకటించారు. జిల్లా నుంచి 12,147 మంది ప్రవేశ పరీక్షకు హాజరు కాగా.. వీరిలో 10,813 మంది అర్హత సాధించారు. తద్వారా జిల్లాలో 89.02 శాతం ఉత్తీర్ణత నమోదైనట్లు అధికారులు వెల్లడించారు. బాలబాలికల వారీగా చూసిన ట్లయితే 7,265 మంది బాలురు పరీక్ష రాయగా, 6,379 మంది (87.80 శాతం) అర్హత సాధించారు. 4,882 మంది బాలికలు పరీక్ష రాయగా, వీరిలో 4434 మంది (90.82 శాతం) ఉత్తీర్ణులయ్యారు. పాస్‌ పర్సంటేజీలో రాష్ట్ర సగటు 87.61 శాతం కాగా.. విశాఖ జిల్లాలో అంతకుమించి (89.02 శాతం)ఉత్తీర్ణత నమోదు చేసుకోవడం విశేషం. ఈ ఏడాది రాష్ట్రంలో జిల్లా నుంచే ఎక్కువ మంది పాలిసెట్‌కు హాజరుకాగా.. అదే స్థాయిలో అర్హత సాధించడం విశేషం. సిరినివాస్‌ అన్నమరాజు నగర్‌(కొమ్మాది)కు చెందిన పోతుల జ్ఞాన హర్షిత, సంగివలస శశి స్కూల్‌ విద్యార్థి శీలం శ్రీరామ్‌ భవదీప్‌ రాష్ట్రస్థాయి ఒకటో ర్యాంకును కై వసం చేసుకున్నారు. శీలం ఐశ్వర్య రాష్ట్ర స్థాయిలో ఏడో ర్యాంకు దక్కించుకుంది. జిల్లాలో 6,730 సీట్లు జిల్లాలో ప్రభుత్వ, ప్రైవేట్‌ యాజమాన్యాల పరిధిలోని 15 పాలిటెక్నిక్‌ కాలేజీల్లో 6,730 సీట్లు అందుబాటులో ఉన్నాయి. అత్యధికంగా మెకానికల్‌ 1,716 సీట్లు, ఆ తర్వాత సీఎంఈ 1,419, ఈఈఈ 1,321, ఈసీఈ బ్రాంచిలో 990 సీట్లు ఉన్నాయి. జిల్లా విద్యార్థులకు టాప్‌ కాలేజీల్లోనే సీట్లు లభిస్తాయని ప్రభుత్వ పాలిటెక్నిక్‌ కాలేజీ ప్రిన్సిపాల్‌, జిల్లా నోడల్‌ అధికారి డాక్టర్‌ కె.నారాయణరావు వెల్లడించారు. ప్రసిద్ధ ఐఐటీలో చదువుతా.. పాలిసెట్‌లో 120 మార్కులతో స్టేట్‌ ఫస్ట్‌ ర్యాంక్‌ వచ్చింది. సీబీఎస్‌ఈ 10వ తరగతి పరీక్షలు రాసి ఫలితాల కోసం వేచి చూస్తున్నాను. దేశంలోనే పేరు పొందిన ఐఐటీలో చదవాలనుకుంటున్నాను. మా నాన్న అప్పలనాయుడు బోయిపాలెం జెడ్పీ హైస్కూల్‌లో సోషల్‌ అసిస్టెంట్‌గా, అమ్మ ప్రగతి చోడవరం నీటి పారుదల శాఖలో డివిజనల్‌ అసిస్టెంట్‌గా పనిచేస్తున్నారు. సబ్జెక్ట్‌పై అవగాహన కారణంగా ప్రత్యేకంగా ప్రిపేర్‌ కాలేదు. – పోతుల జ్ఞానహర్షిత, కొమ్మాది

● చందనోత్సవానికి పటిష్ట ఏర్పాట్లు ● రాజకీయపరమైన ప్రోటోకాల్‌ దర్శనాల్లేవ్‌.. ● కలెక్టర్‌ మల్లికార్జున వెల్లడి మహారాణిపేట: సాధారణ భక్తులకు పెద్దపీట వేస్తూ.. గత అనుభవాలను దృష్టిలో పెట్టుకుని ఈ ఏడాది చందనోత్సవానికి పటిష్ట ఏర్పాట్లు చేసినట్లు కలెక్టర్‌ డాక్టర్‌ ఎ.మల్లికార్జున వెల్లడించారు. అంతరాలయ దర్శనాలు రద్దు చేశామని, ఎలాంటి రాజకీయపరమైన ప్రోటోకాల్‌ దర్శనాలు కూడా ఉండవని స్పష్టం చేశారు. కలెక్టరేట్‌లోని వీసీ హాలులో పోలీస్‌ కమిషనర్‌ డాక్టర్‌ ఎ.రవిశంకర్‌తో కలిసి బుధవారం ఆయన అప్పన్న చందనోత్సవం ఏర్పాట్లను వివరించారు. భక్తులకు ఎలాంటి అసౌకర్యం కలగకుండా పటిష్ట ఏర్పాట్లు చేశామని, ఇందులో భాగంగా ఆరు కిలోమీటర్ల మేర బారికేడ్లు వేశామన్నారు. క్యూలో భక్తుల రద్దీ ఎక్కువ కాకుండా కొన్ని చోట్ల హోల్డింగ్‌ పాయింట్లు పెట్టామన్నారు. భక్తులకు తాగునీరు అందించేందుకు 160 ప్రాంతాలను గుర్తించి చర్యలు చేపట్టామన్నారు. క్యూలో ఎండ వేడిమి లేకుండా సుమారు 29,500 మంది భక్తులకు సరిపడా షామియానాలు ఏర్పాటు చేశామని వివరించారు. టికెట్లను స్కాన్‌ చేసేందుకు అనువుగా స్కానర్లను సమకూర్చామని, టికెట్లు రీ సైక్లింగ్‌ జరగకుండా చర్యలు చేపట్టామన్నారు. లైన్ల మధ్యలో ఎవరూ చొరబడకుండా తగిన జాగ్రత్తలు చేపట్టామన్నారు. 250 బయోటాయిలెట్లు, 60 వైద్య శిబిరాలు ఏర్పాటు చేసినట్లు వివరించారు. సుమారు లక్ష నుంచి లక్షా యాభై వేల వరకు భక్తులు రావొచ్చని అంచనా వేశామని, ఆ మేరకు పటిష్ట ఏర్పాట్లు చేశామని కలెక్టర్‌ పేర్కొన్నారు. అన్ని విభాగాల సమన్వయంతో చందనోత్సవాన్ని విజయవంతంగా నిర్వహిస్తామని చెప్పారు. 10వ తేదీ తెల్లవారుజామున 3.30 నుంచి 4.30 గంటల వరకు అనువంశిక ధర్మకర్తలు, దేవదాయ శాఖ నుంచి పట్టు వస్త్రాలు సమర్పించే వారికి మాత్రమే అంతరాలయ దర్శనాలు ఉంటాయన్నారు. ఏర్పాట్లను పర్యవేక్షించేందుకు ప్రత్యేక కమాండ్‌ కంట్రోల్‌ రూమ్‌ ఏర్పాటు చేశామని, ఇందులో పది శాఖల అధికారులు ఉంటారన్నారు. రాజకీయ ప్రచారాలు చేస్తే కఠిన చర్యలు తప్పవు చందనోత్సవం సందర్భంగా వచ్చే భక్తులను ప్రభావితం చేసేలా ప్రచారాలు చేస్తే సంబంధిత వ్యక్తులపై కఠిన చర్యలు తీసుకుంటామని కలెక్టర్‌ మల్లికార్జున హెచ్చరించారు. మతపరమైన ప్రాంతాల్లో ఎలాంటి రాజకీయ ప్రచారాలు చేయకూడదని స్పష్టం చేశారు. దీని పర్యవేక్షించేందుకు అనువుగా ఎంసీసీ బృందాలను నియమిస్తామన్నారు. ట్రాఫిక్‌ సమస్యలు లేకుండా ప్రత్యేక చర్యలు గతంలో జరిగిన సంఘటనలు దృష్టిలో ఉంచుకుని ట్రాఫిక్‌ సమస్యలు లేకుండా ప్రత్యేక చర్యలు చేపట్టామని పోలీసు కమిషనర్‌ డాక్టర్‌ ఎ.రవిశంకర్‌ తెలిపారు. కొండ దిగువన, కొండపైన రెండు పోలీసు కంట్రోల్‌ రూంలు ఏర్పాటు చేశామన్నారు. ఎక్కడిక్కడ సీసీ కెమెరాలు ఏర్పాటు చేసి ఎలాంటి అవాంఛనీయ ఘటనలు చోటు చేసుకోకుండా పటిష్ట ఏర్పాట్లు చేసినట్లు వివరించారు. ఏర్పాట్లను పర్యవేక్షించేందుకు సీనియర్‌ పోలీసు అధికారులను నియమించామన్నారు. సమావేశంలో ఈవో శ్రీనివాసమూర్తి, చీఫ్‌ ఫెస్టివల్‌ ఆఫీసర్‌, ఏడీసీ రామచంద్రమోహన్‌, ఇతర అధికారులు పాల్గొన్నారు.