గాంధీనగర్‌(విజయవాడసెంట్రల్‌): స్వాతంత్య్ర సమరయోధుడు, కురువృద్ధుడు అడుసుమిల్లి వేణుగోపాలరావు, ఆయన సతీమణి అడుసుమిల్లి హనుమారత్నం తమ ఇంటి వద్దే ఓటు హక్కు వినియోగించుకున్నారు. విజయవాడ సెంట్రల్‌ నియోజకవర్గ పరిధిలో సత్యనారాయణపురానికి చెందిన అడుసుమిల్లి వేణుగోపాలరావు, అడుసుమిల్లి హనుమారత్నం దంపతులు ఓటు హక్కును వినియోగించుకోవాలన్న ఉత్సాహం ఉన్నప్పటికీ బయటకు రాలేని పరిస్థితి. భారత ఎన్నికల సంఘం 85 ఏళ్లు పైబడిన వృద్ధులు, 40శాతానికి పైగా వైకల్యం ఉన్న వికలాంగులకు హోం ఓటింగ్‌ అవకాశం కల్పించడంతో ఈ దంపతులు హోం ఓటింగ్‌కు దరఖాస్తు చేసుకున్నారు. గురువారం నియోజకవర్గ పరిధిలో అధికారులు హోం ఓటింగ్‌ చేపట్టారు. ఇందులో భాగంగా వేణుగోపాలరావు ఇంటి వద్దే ఓటు హక్కు వినియోగించుకున్నారు. ఆదర్శంగా తీసుకోవాలి.. ప్రజాస్వామ్య పరిరక్షణ ప్రతి ఒక్కరి బాధ్యతని చాటిచెప్పిన ధీరుడు.. స్వాతంత్య్ర సమరయోధుడు, అడుసుమిల్లి వేణుగోపాలరావు హోం ఓటింగ్‌ ద్వారా ఓటు హక్కు వినియోగించుకొని ఓటర్లకు స్ఫూర్తిదాయకంగా నిలిచారని ఎన్టీఆర్‌ జిల్లా ఎన్నికల అధికారి, కలెక్టర్‌ ఢిల్లీరావు అన్నారు. ఈ వృద్ధ దంపతులను ప్రతి ఒక్కరూ ఆదర్శంగా తీసుకొని ఈ నెల 13న జరిగే సార్వత్రిక ఎన్నికల్లో తప్పక ఓటు హక్కు వినియోగించుకోవాలని కలెక్టర్‌ ఢిల్లీరావు కోరారు. ఓటర్లకు స్ఫూర్తి అని కితాబునిచ్చిన కలెక్టర్‌ ఢిల్లీరావు

గాంధీనగర్‌(విజయవాడసెంట్రల్‌): విజయవాడ నగరానికి చెందిన ఫొటోగ్రాఫర్‌ గోలి వెంకట శివకుమార్‌కు ఫ్రాన్స్‌ దేశ ప్రతిష్టాత్మక అవార్డు ఇంటర్నేషనల్‌ ఫెడరేషన్‌ ఆఫ్‌ ఫొటోగ్రఫిక్‌ ఆర్ట్స్‌ దక్కింది. గురువారం విజయవాడ చాంబర్‌ ఆఫ్‌ కామర్స్‌ హాలులో విజయవాడ ప్రొఫెషనల్‌ ఫొటోగ్రాఫర్స్‌ వెల్ఫేర్‌ అసోసియేషన్‌ ఆధ్వర్యంలో గోలి వెంకట శివకుమార్‌కు సత్కార సభ జరిగింది. అసోసియేషన్‌ సభ్యులు ఫ్రాన్స్‌ దేశ అవార్డు గెలుచుకున్న శివకుమార్‌ను ఘనంగా సత్కరించారు. ఈ సందర్భంగా అసోసియేషన్‌ అధ్యక్షుడు కమ్మిలి రవికుమార్‌ మాట్లాడుతూ శివకుమార్‌ తమ అసోసియేషన్‌ జీవిత కాల సభ్యుడు కావడం గర్వకారణమని సభ్యులు పేర్కొన్నారు. ఫ్రాన్స్‌ దేశ అవార్డు దక్కించుకుని నగరానికే వన్నె తెచ్చారన్నారు.

పెనమలూరు: టీడీపీ, జనసేన పార్టీల నుంచి పలువురు నేతలు వైఎస్సార్‌ సీపీలో చేరారు. పెనమలూరు సెంటర్‌లో గురువారం జరిగిన కార్యక్రమంలో రాష్ట్ర గృహనిర్మాణ శాఖ మంత్రి, వైఎస్సార్‌ సీపీ పెనమలూరు నియోజకవర్గ ఎమ్మెల్యే అభ్యర్థి జోగి రమేష్‌ ఆధ్వర్యంలో వివిధ గ్రామాలకు చెందిన నేతలు పార్టీలో చేరారు. జోగి రమేష్‌ వారికి పార్టీ కండువా కప్పి సాద రంగా ఆహ్వానించారు. వైఎస్సార్‌ సీపీలో అన్ని వర్గాల వారికి గుర్తింపుతో పాటు ప్రాధాన్యం ఉంటుందన్నారు. వంశీ సమక్షంలో చేరిన 70 మంది యువకులు గన్నవరం: ఉంగుటూరు మండలం పెద్ద అవుటపల్లి శివారు రామకృష్ణాపురానికి చెందిన 70 మంది యువకులు ఇందుపల్లి శ్యామ్‌ నేతృత్వంలో వైఎస్సార్‌ సీపీలో చేరారు. వీరందరూ వీఎన్‌ పురం కాలనీలో వైఎస్సార్‌ సీపీ ఎమ్మెల్యే అభ్యర్థి వంశీమోహన్‌ సమక్షంలో గురువారం పార్టీ కండువాలు కప్పుకున్నారు. ఈ సందర్భంగా వంశీమోహన్‌ మాట్లాడుతూ.. అభివృద్ధి, సంక్షేమ పాలనను కొనసాగించేందుకు వైఎస్సార్‌ సీపీ ప్రభుత్వాన్ని మళ్లీ అధికారంలోకి తీసుకురావాలని కోరారు. వంశీమోహన్‌ను గజమాలతో సత్కరించారు. పార్టీ నేతలు దారం దుర్గావరప్రసాద్‌, ముతకన రాంబాబు తదితరులు పాల్గొన్నారు.

వన్‌టౌన్‌(విజయవాడపశ్చిమ): కేంద్రంలో పదేళ్లు అధికారంలో ఉన్న బీజేపీ నేతృత్వంలోని మోదీ ప్రభుత్వం ఆంధ్రప్రదేశ్‌కు అన్ని విధాలా అన్యాయం చేసిందని.. అందుకే మోదీని ఈ ఎన్నికల్లో ప్రజలు గద్దె దించాలని సీపీఐ రాష్ట్ర కార్యదర్శి కె. రామకృష్ణ పిలుపునిచ్చారు. నగరంలోని పాతబస్తీలో ఉన్న లెనిన్‌భవన్‌లో గురువారం ఏర్పాటు చేసిన మీడియా సమావేశంలో రామకృష్ణ మాట్లాడారు. ప్రధాని మోదీ 2014, 2019, 2024 ఎన్నికల సందర్భంగా ప్రచారం నిమిత్తం రాష్ట్రానికి వచ్చి ఏపీ అభివృద్ధికి ఎలాంటి ప్రకటన చేయకుండా కేవలం మాయ మాటలు చెప్పి, రోడ్‌ షోలు చేసి వెళుతున్నారని విమర్శించారు. 2019లో తిట్టిన వారినే ఇప్పుడు పక్కన పెట్టుకుని మోదీ మాట్లాడుతున్నారని చెప్పారు. మోదీ 2014లో రాష్ట్రంలో నిర్వహించిన ఎన్నికల ప్రచార సభలో జాతీయ స్థాయిలో ఎన్డీఏ అధికారంలోకి వస్తే ఆంధ్రప్రదేశ్‌ విభజన చట్టంలో నిర్ధేశించిన ఏపీకి ప్రత్యేక హోదా, కడపలో స్టీల్‌ ప్లాంట్‌ ఏర్పాటు, వెనుకబడిన జిల్లాలకు ప్రత్యేక ప్యాకేజీ, రామాయపట్నం పోర్టు నిర్మాణం వంటి ఇతర విభజన హామీలు అమలు చేస్తామని హామీ ఇచ్చారని గుర్తు చేశారు. కార్పొరేట్‌ వ్యక్తి సుజనాచౌదరి విజయవాడ పశ్చిమ నియోజకవర్గం నుంచి బీజేపీ ఎమ్మెల్యేగా పోటీ చేయటం సరికాదన్నారు. విజ్ఞులైన ప్రజలు ఆలోచన చేసి ఓట్లు వేయాలన్నారు. సుజనాచౌదరి ఇచ్చే డబ్బు సంచులకు ఆశపడి విజయవాడ ప్రతిష్టతను మంటగలపవద్దన్నారు. ఎన్నికల సమన్వయ కమిటీ కన్వనర్‌ దోనేపూడి శంకర్‌, నగర కార్యదర్శి జి. కోటేశ్వరరావు, రాష్ట్ర కార్యవర్గ సభ్యులు పెన్మెత్స దుర్గాభవాని పాల్గొన్నారు.

విజయవాడ వాసులను ముంపు నుంచి రక్షించేందుకు వీలుగా రక్షణ గోడలు నిర్మించారు. కనకదుర్గమ్మ వారధి నుంచి కోటి నగర్‌ వరకు వాల్‌ పనులు పూర్తి అయ్యాయి. వారధి నుంచి పద్మావతి ఘాట్‌ వరకూ గోడ నిర్మాణ పనులు పూర్తయ్యాయి. రూ.500కోట్లతో చేపట్టిన కృష్ణా నది రిటైనింగ్‌ వాల్‌ పనులను, వివిధ ప్రాంతాల్లో రూ.239కోట్లతో సీవెజ్‌ ట్రీట్‌మెంట్‌ నిర్మాణం పనులను ముఖ్యమంత్రి వైఎస్‌ జగన్‌ మార్చి నెలలో ప్రారంభించారు. ముంపు సమస్యకు శాశ్వత పరిష్కారం..