TV
కర్నూలు(జిల్లా పరిషత్): నంద్యాల ఎమ్మెల్యే భూమా నాగిరెడ్డిని అక్రమంగా అరెస్టు చేయడంపై హైకోర్టును ఆశ్రయిస్తామని కర్నూలు, కోడుమూరు ఎమ్మెల్యేలు ఎస్వీ మోహన్‌రెడ్డి, మణిగాంధి అన్నారు. అధికార పార్టీ ఆదేశాల మేరకు తప్పుడు కేసులు పెట్టి అరెస్టు చేసిన పోలీసులు ఇబ్బంది పడక తప్పదన్నారు. మంగళవారం స్థానిక భాగ్యనగర్‌లోని వైఎస్‌ఆర్‌సీపీ కార్యాలయంలో ఏర్పాటు చేసిన విలేకరుల సమావేశంలో వారు మాట్లాడారు.
అధికార పార్టీ నాయకులు పోలీసులపై ఒత్తిడి తీసుకొచ్చి అక్రమంగా భూమా నాగిరెడ్డిపై హత్యాయత్నం, ఎస్సీ,ఎస్టీ అట్రాసిటీ కేసు పెట్టడమే గాకుండా రౌడీషీటు బనాయించారన్నారు. మున్సిపల్ కౌన్సిల్ సమావేశాల్లో ప్రజాసమస్యలు లేవనెత్తే సమయంలో వాగ్వాదపడటం సాధారణమని భూమా నాగిరెడ్డి కౌన్సిల్ హాలులోకి ఆయుధాలు తీసుకెళ్లలేదని, ఎవరినీ చంపే ప్రయత్నమూ చేయలేదని, అలాంటి వ్యక్తిపై ఇన్ని కేసులు ఎలా బనాయిస్తారని ప్రశ్నించారు.
రాష్ట్ర చరిత్రలో ఒక ఎమ్మెల్యేపై ఇన్ని కేసులు బనాయించడం ఇదే మొదటిసారన్నారు. బయట ఎక్కడో జరిగిన సంఘటనకు కూడా భూమాను బాధ్యున్ని చేశారన్నారు. మూడుసార్లు ఎంపీగా, మూడు సార్లు ఎమ్మెల్యేగా ఎన్నికయ్యారని, ఆయనపై ఎలాంటి కేసులు కూడా లేవన్నారు. వైఎస్‌ఆర్‌సీపీ ఎమ్మెల్యేలు, కార్యకర్తలను భయభ్రాంతులకు గురిచేసేందుకే భూ మాను అక్రమంగా అరెస్టు చేశారని విమర్శిం ్డచారు.
రైతురుణమాఫీ, డ్వాక్రా సంఘాల రుణమాఫీ, పింఛన్లు, రేషన్‌కార్డుల్లో కోత, నిరుద్యోగులకు భృతి, ఇంటింటికి ఓ ఉద్యోగం వంటి హామీలను నెరవేర్చలేక, వాటిపై ఆందోళన చేస్తారన్న భయంతో అక్రమ అరెస్టులకు సిద్ధపడుతున్నారని విమర్శించారు. అధికార పార్టీల నాయకులు చెప్పినట్లు వ్యవహరిస్తే ప్రజల్లో పోలీసులపై నమ్మకం పోతుందని, తద్వారా సమాజంలో లా అండ్ ఆర్డర్ దెబ్బతింటుందన్నారు.
వైఎస్‌ఆర్‌సీపీ నాయకుడు కొత్తకోట ప్రకాష్‌రెడ్డి మాట్లాడుతూ రాష్ట్రాన్ని సింగపూర్, టోక్యో చేస్తానని ప్రకటించే చంద్రబాబు బ్రిటిష్ పాలనను తలపిస్తున్నారని విమర్శించారు. జిల్లాలో యథేచ్ఛగా అక్రమ ఇసుక, మైనింగ్, కల్తీ మద్యం రవాణా జరుగుతున్నా పోలీసులు వాటిపై చర్య లు తీసుకోవడం లేదన్నారు. సమావేశంలో మాజీ కార్పొరేటర్లు తోట వెంకటకృష్ణారెడ్డి, నరసింహులు యాదవ్ పాల్గొన్నారు.
