సెమీఫైనల్లో విజయం కోసం వంద శాతం కష్టపడ్డాను. కానీ తుది ఫలితం నిరాశపరిచింది. క్రీడాకారుల కెరీర్‌లో గెలుపోటములు సహజమే. మ్యాచ్‌ అన్నాక ఒకరు గెలుస్తారు, మరొకరు ఓడిపోతారు. మూడు గేమ్‌లు ఆడటం సులువేమీ కాదు. ఇలాంటి మ్యాచ్‌ల్లో రెండు, మూడు పాయింట్లే ఫలితాన్ని శాసిస్తాయి. ఆల్‌ ఇంగ్లండ్‌ టోర్నీతో నేనెంతో నేర్చుకున్నాను. ఈ సీజన్‌లోని తదుపరి  టోర్నమెంట్‌లలో మరింత మెరుగ్గా రాణించేందుకు శ్రమిస్తాను. – ఆల్‌ ఇంగ్లండ్‌ టోర్నీ సెమీస్‌లో ఓటమిపై సింధు 

బర్మింగ్‌హామ్‌: భారీ అంచనాలతో బరిలోకి దిగిన భారత క్రీడాకారులకు ఆల్‌ ఇంగ్లండ్‌ బ్యాడ్మింటన్‌ చాంపియన్‌షిప్‌లో తొలి రోజు మిశ్రమ ఫలితాలు ఎదురయ్యాయి. మహిళల సింగిల్స్‌లో మాజీ రన్నరప్‌ సైనానెహ్వాల్‌... పురుషుల సింగిల్స్‌లో సాయిప్రణీత్‌ తొలి రౌండ్‌లోనే ఇంటిముఖం పట్టగా... ప్రపంచ మూడో ర్యాంకర్‌ కిడాంబి శ్రీకాంత్, పీవీ సింధు మూడు గేమ్‌లపాటు కష్టపడి గట్టెక్కారు.   పురుషుల సింగిల్స్‌ తొలి రౌండ్‌లో బ్రైస్‌ లెవెర్‌డెజ్‌ (ఫ్రాన్స్‌)తో 58 నిమిషాలపాటు జరిగిన జరిగిన మ్యాచ్‌లో శ్రీకాంత్‌ 7–21, 21–14, 22–20తో గెలుపొందాడు. నిర్ణాయక మూడో గేమ్‌లో శ్రీకాంత్‌ 19–20తో ఓటమి అంచుల్లో నిలిచాడు. ఈ స్కోరు వద్ద లెవెర్‌డెజ్‌ మరో పాయింట్‌ సాధించి ఉంటే శ్రీకాంత్‌కు ఓటమి ఎదురయ్యేది. కానీ కీలకదశలో శ్రీకాంత్‌ సంయమనం కోల్పోకుండా ఆడి పాయింట్‌ సాధించి స్కోరును 20–20తో సమం చేశాడు. ఆ తర్వాత వరుసగా రెండు పాయింట్లు గెలిచి గేమ్‌తోపాటు మ్యాచ్‌ను సొంతం చేసుకొని ఊపిరి పీల్చుకున్నాడు. మరో మ్యాచ్‌లో సాయిప్రణీత్‌ 21–13, 15–21, 11–21తో ప్రపంచ నాలుగో ర్యాంకర్‌ సన్‌ వాన్‌ హో (దక్షిణ కొరియా) చేతిలో పోరాడి ఓడిపోయాడు.   మహిళల సింగిల్స్‌ తొలి రౌండ్‌లో 2015 రన్నరప్‌ సైనా నెహ్వాల్‌ 14–21, 18–21తో ప్రపంచ నంబర్‌వన్, డిఫెండింగ్‌ చాంపియన్‌ తై జు యింగ్‌ (చైనీస్‌ తైపీ) చేతిలో ఓటమి చవిచూసింది. తై జు చేతిలో సైనాకిది వరుసగా ఎనిమిదో ఓటమి కావడం గమనార్హం. 2009 తర్వాత ఆల్‌ ఇంగ్లండ్‌ టోర్నీలో సైనా తొలి రౌండ్‌లోనే నిష్క్రమించడం ఇదే తొలిసారి.  మరో మ్యాచ్‌లో సింధు 56 నిమిషాల్లో 20–22, 21–17, 21–9తో పోర్న్‌పవీ చోచువోంగ్‌ (థాయ్‌లాండ్‌)పై గెలిచి ప్రిక్వార్టర్‌ ఫైనల్లోకి అడుగు పెట్టింది. తొలి గేమ్‌ను కోల్పోయిన సింధు ఆ తర్వాత కోలుకొని విజయాన్ని ఖాయం చేసుకుంది. గురువారం జరిగే ప్రిక్వార్టర్‌ ఫైనల్లో నిచావోన్‌ జిందాపోల్‌ (థాయ్‌లాండ్‌)తో సింధు ఆడుతుంది.  మహిళల డబుల్స్‌ తొలి రౌండ్‌లో సిక్కి రెడ్డి–అశ్విని పొన్నప్ప (భారత్‌) జంట 14–21, 13–21తో మత్సుతోమో–తకహాషి (జపాన్‌) జోడీ చేతిలో... మేఘన–పూర్వీషా (భారత్‌) ద్వయం 14–21, 11–21తో షిహో తనకా–యోనోమోటో (జపాన్‌) జోడీ చేతిలో ఓడిపోయాయి. పురుషుల డబుల్స్‌ తొలి రౌండ్‌లో సుమీత్‌ రెడ్డి–మనూ అత్రి (భారత్‌) జంట 20–22, 12–21తో మార్కస్‌ ఎలిస్‌–క్రిస్‌ లాంగ్‌రిడ్జ్‌ (ఇంగ్లండ్‌) జోడీ చేతిలో పరాజయం పాలైంది.   మిక్స్‌డ్‌ డబుల్స్‌ తొలి రౌండ్‌లో సిక్కి రెడ్డి–ప్రణవ్‌ చోప్రా ద్వయం 21–19, 21–13తో మార్విన్‌–లిండా (జర్మనీ) జోడీని ఓడించి ప్రిక్వార్టర్‌ ఫైనల్‌కు చేరింది.    


 హైదరాబాద్‌: తెలంగాణ బ్యాడ్మింటన్‌ సంఘం ఉపాధ్యక్షుడు వి. చాముండేశ్వరీనాథ్‌కు అరుదైన అవకాశం దక్కింది. వచ్చే నెలలో జరిగే ప్రతిష్టాత్మక ‘ఆల్‌ ఇంగ్లండ్‌ టోర్నీ’కి ఆయన భారత జట్టు తరఫున పరిశీలకుడిగా నియమితులయ్యారు. భారత బ్యాడ్మింటన్‌ సంఘం (బాయ్‌) చాముండికి ఈ బాధ్యతలు అప్పగించింది. ఈ మెగా టోర్నమెంట్‌లో భారత్‌ నుంచి 11 మంది షట్లర్లు పాల్గొంటున్నారు.
 
 మార్చి 7 నుంచి 12 వరకు బర్మింగ్‌హామ్‌లో ఈ టోర్నీ జరుగుతుంది. మాజీ ఫస్ట్‌ క్లాస్‌ క్రికెటర్‌ అయిన చాముండి ప్రస్తుతం హైదరాబాద్‌ బ్యాడ్మింటన్‌ సంఘం అధ్యక్షుడిగా కూడా వ్యవహరిస్తున్నారు. గతంలో ఆయన ఇంగ్లండ్‌లోనే జరిగిన 2009 టి20 క్రికెట్‌ ప్రపంచ కప్‌లో భారత జట్టుకు మేనేజర్‌గా వ్యవహరించారు.