రిలయన్స్ జియో పోటీని తట్టుకునేందుకు ప్రభుత్వరంగ సంస్ధ బీఎస్ఎన్ఎల్ మార్కెట్లోకి కొత్త ఆఫర్ తో వచ్చింది. ఆరు నెలల ప్రమోషనల్ ఆఫర్ తో అన్ లిమిటెడ్ బ్రాడ్ బ్యాండ్ కనెక్షన్ ను అందించనున్నట్లు ప్రకటించింది. ఈ మేరకు ప్రకటనను విడుదల చేసిన బీఎస్ఎన్ఎల్.. అన్ లిమిటెడ్ బ్రౌజింగ్ తో పాటు నెలకు 300 జీబీ డేటాను వినియోగదారులు డౌన్ లోడ్ చేసుకోవచ్చని పేర్కొంది. 'బీబీ249' ప్లాను ద్వారా వినియోగదారుడు ఒక జీబీ డేటాకు రూపాయి కంటే తక్కువ చెల్లించినట్లవుతుందని చెప్పింది.
 
 ఈ నెల 9 నుంచి ఈ ఆఫర్ ప్రారంభంకానుందని వెల్లడించింది. ఆరు నెలల ప్రమోషనల్ ఆఫర్ తర్వాత వినియోగదారులు వారికి నచ్చిన రెగ్యులర్ ప్లానుకు మారొచ్చని తెలిపింది. కొత్త ఆఫర్ ద్వారా వినియోగదారులను ఆకర్షించేందుకు అవకాశం కలుగుతుందని చైర్మన్, ఎండీ అనుపమ్ శ్రీవాస్తవ పేర్కొన్నారు. దేశంలో బ్రాడ్ బాండ్ సర్వీసులకు జీబీకి అత్యల్పంగా చార్జ్ చేస్తోంది ఒక్క బీఎస్ఎన్ఎల్ మాత్రమేనని చెప్పారు.