ధర రూ.40 లక్షలు
 న్యూఢిల్లీ: జర్మనీకి చెందిన దిగ్గజ లగ్జరీ కార్ల తయారీ కంపెనీ ‘ఆడి’ తాజాగా  ‘ఏ4’లో డీజిల్‌ వేరియంట్‌ను మార్కెట్‌లోకి తీసుకువచ్చింది. దీని ధర రూ. 40.2 లక్షలు (ఎక్స్‌షోరూమ్‌ ఢిల్లీ). ఈ కొత్త డీజిల్‌ ‘ఏ4’లో 2.0 లీటర్‌ 4 సిలిండర్‌ ఇంజిన్, 7 స్పీడ్‌ ఎస్‌ ట్రానిక్‌ ఆటోమేటిక్‌ ట్రాన్స్‌మిషన్‌ వంటి పలు ప్రత్యేకతలున్నట్లు కంపెనీ పేర్కొంది. ‘ఏ4 30 టీఎఫ్‌ఎస్‌ఐ (పెట్రోల్‌) వాహనానికి మంచి స్పందన వచ్చింది. ఇప్పుడు తాజాగా అందులో డీజిల్‌ వేరియంట్‌ను మార్కెట్‌లోకి విడుదల చేశాం. అప్‌డేటెడ్‌ టెక్నాలజీతో రూపొందిన ఈ వేరియంట్‌ గత జనరేషన్‌ వాహనాల కన్నా శక్తివంతమైనది’ అని ఆడి ఇండియా హెడ్‌ రహిల్‌ అన్సారి తెలిపారు. ఇది గరిష్టంగా గంటకు 237 కిలోమీటర్ల వేగంతో ప్రయాణిస్తుందని, కేవలం 7.7 సెకన్లలోనే 0–100 కి.మీ. స్పీడ్‌ను అందుకుంటుందని కంపెనీ పేర్కొంది.


 జర్మనీ లగ్జరీ కార్ల తయారీ సంస్థ బీఎండబ్ల్యూ తన ‘6 సిరీస్ గ్రాన్ కూపే’లో మరో అప్‌డేట్ వెర్షన్‌ను మార్కెట్‌లోకి విడుదల చేసింది. ఈ కారు ‘640డి ఎమినెన్స్’, ‘640డి డిజైన్’ అనే రెండు వేరియంట్లలో లభించనుంది. వీటి ధరలు (ఢిల్లీ ఎక్స్‌షోరూం) వరుసగా రూ.1.14 కోట్లు, రూ.1.21 కోట్లుగా ఉన్నాయి. ఈ ఏడాది 15 మోడళ్లను మార్కెట్‌లోకి తీసుకురావడానికి ప్రణాళికలను రూపొందిస్తున్నామని బీఎండబ్ల్యూ గ్రూప్ ఇండియా ప్రెసిడెంట్ ఫిలిప్ వాన్ తెలిపారు.     - న్యూఢిల్లీ