పట్నా: బిహార్‌లో నితీశ్‌కుమార్‌ సర్కార్‌ ప్రమాణ స్వీకారం చేసిందో లేదో తీవ్ర విమర్శలు వెల్లువెత్తుతున్నాయి. నేరచరిత కలిగిన వారికి నితీశ్‌ కేబినెట్‌లో చోటు దక్కడంతో విపక్షాలు దాడికి దిగాయి. విద్యాశాఖ మంత్రిగా జేడీ(యూ)కి చెందిన మేవాలాల్‌ చౌధురిని నియమించడంతో రగడ మొదలైంది. గతంలో వ్యవసాయ యూనివ ర్సిటీ వైస్‌ చాన్స్‌లర్‌గా మేవాలాల్‌ అవినీతి ఆరోపణలు ఎదుర్కోవడంతో పార్టీ నుంచి సస్పెండ్‌ చేశారు. ఇప్పుడు ఆయనకు విద్యాశాఖ మంత్రి పదవి కట్టబెట్టడంతో విపక్ష ఆర్జేడీ కూటమికి ఒక ఆయుధం దొరికింది. కేబినెట్‌లో మరో ఏడుగురు నేర చరిత కలిగిన వారు ఉన్నారని అసోసియేషన్‌ ఫర్‌ డెమొక్రాటిక్‌ రిఫార్మ్స్‌ (ఏడీఆర్‌) తాజా నివేదిక వెల్లడించింది. నితీశ్‌ కేబినెట్‌లో బెర్త్‌ సంపాదించిన 14 మంది ఎన్నికల అఫిడవిట్‌లో సమర్పించిన వివరాలను విశ్లేషించిన ఆ సంస్థ ఎనిమిది మంది (57%) నేరచరిత్ర కలిగినవారని పేర్కొంది. వారిలో ఆరుగురు (43%)అత్యంత తీవ్రమైన క్రిమినల్‌ కేసుల్ని ఎదుర్కొంటున్నారు. ఎనిమిది మంది కళంకిత మంత్రుల్లో బీజేపీ నుంచి నలుగురు, జేడీ(యూ) నుంచి ఇద్దరు కాగా మిగతా ఇద్దరు కూటమి పార్టీలకు చెందినవారు.


 పట్నా: జేడీయూ అధినేత నితీశ్‌కుమార్ ముఖ్యమంత్రిగా ప్రమాణ స్వీకార వేడుకను అత్యంత అట్టహాసంగా నిర్వహించేందుకు సన్నాహాలు జోరందుకున్నాయి. ఇప్పటికే ఈ వేడుకకు హాజరయ్యేందుకు ఢిల్లీ, పశ్చిమ బెంగాల్ ముఖ్యమంత్రులు అరవింద్ కేజ్రీవాల్, మమతాబెనర్జీ అంగీకరించారు. పట్నాలో మధ్యాహ్నం 2 గంటలకు జరుగనున్న ముఖ్యమంత్రి, మంత్రుల ప్రమాణ స్వీకారోత్సవానికి ప్రధానమంతి నరేద్రమోదీతోపాటు సీనియర్ కేంద్రమంత్రులు రాజ్‌నాథ్‌సింగ్, అరుణ్‌జైట్లీ వంటివారిని ఆహ్వానించాలని బిహార్ ప్రభుత్వం భావిస్తున్నట్టు తెలిసింది.
 
 ఆర్జేడీ, జేడీయూతో కూడిన మహాకూటమిలో భాగంగా ఉండటంతో ఈ వేడుకకు కాంగ్రెస్ అధ్యక్షురాలు సోనియాగాంధీ, ఆమె తనయుడు రాహుల్‌గాంధీ హాజరుకానున్నారు. అదేవిధంగా నేషనల్ కాన్ఫరెన్స్ అధినేత ఫరుఖ్ అబ్దుల్లా కూడా హాజరుకానున్నారు. నితీశ్ స్వయంగా ఫోన్ చేసి ఆహ్వానిచండంతో.. వేడుకకు వచ్చేందుకు ఫరుఖ్ అంగీకారం తెలిపారు. బిహార్ ఎన్నికల్లో ఆర్జేడీ, జేడీయూ, కాంగ్రెస్‌తో కూడిన మహాకూటమి ఘనవిజయం సాధించగా.. బీజేపీ నేతృత్వంలోని ఎన్డీయే పరాభవాన్ని మూటగట్టుకున్న సంగతి తెలిసిందే.