పైలట్ ఉద్యోగం అంటే బయటి నుంచి చూసేవాళ్లకు భలే క్రేజ్ ఉంటుంది. ప్రతిరోజూ విమానాల్లో తిరగడం, అనేక దేశాలు చూడటం, మంచి జీతాలు.. ఇలాంటి అవకాశాలన్నీ ఉంటాయనుకుంటాం. కానీ.. ఎయిరిండియాలో బోయింగ్ 787 డ్రీమ్‌లైనర్లు నడిపే 24 మంది పైలట్లు ఒకేసారి ఈ ఉద్యోగం తాము చేయలేమంటూ నమస్కారం పెట్టేస్తున్నారు. తాము రాజీనామా చేయడానికి నిరభ్యంతర పత్రం (ఎన్ఓసీ) ఇవ్వాలంటూ దరఖాస్తు చేసుకున్నారు. కెరీర్‌లో ఏమాత్రం పురోగతి లేకపోవడంతో.. ఇక ఈ ఉద్యోగం చేయడం ఎందుకు దండగని అంటున్నారు. 2005 సంవత్సరంలో ఎయిరిండియా 27 డ్రీమ్‌లైనర్ల విమానాలకు ఆర్డర్ చేసింది. ఇప్పటివరకు 23 విమానాలు వచ్చాయి. ఇవి మంచి మైలేజి ఇస్తుండటంతో వీటిని బాగా ఉపయోగిస్తున్నారు. 
  
 ఈ విమానాల కోసం దాదాపు 300 మంది పైలట్లను తీసుకుంది. 2007-08 సమయంలో ఈ 24 మంది పైలట్లు ఇండియన్ ఎయిర్‌లైన్స్‌లో చేరారు. వీళ్లంతా ఎయిర్‌బస్ ఎ-320లు నడిపినవాళ్లు. 2012 సంవత్సరంలో డ్రీమ్‌లైనర్లు తమకు వస్తాయని ఎయిరిండియా వాటిని నడిపేందుకు వీళ్లను ఉద్యోగాల్లోకి తీసుకుంది. అయితే, అప్పట్లో కో-పైలట్లుగా చేరిన తామంతా ఇప్పటికీ బోయింగ్-787 విమానాలకు కో-పైలట్లుగానే ఉండిపోయాం తప్ప ఎలాంటి పదోన్నతులు ఇవ్వలేదని వాళ్లు మండిపడుతున్నారు. దాంతో తాము ఉద్యోగాలకు రాజీనామా చేసేస్తామని చెబుతున్నారు. ఇందుకోసం తమకు నో అబ్జెక్షన్ సర్టిఫికెట్లు ఇవ్వాలని కోరుతున్నారు.