వాషింగ్టన్‌: డిజిటల్‌ మీడియా దిగ్గజం, వాల్‌స్ట్రీట్‌ జర్నల్‌ మాజీ డిప్యూటీ మేనేజింగ్‌ ఎడిటర్‌ రాజు నరిశెట్టి... ప్రఖ్యాతి గాంచిన న్యూయార్క్‌లోని కొలంబియా జర్నలిజం స్కూల్‌ ప్రొఫెసర్‌(ప్రొఫెషనల్‌ ప్రాక్టీస్‌)గా నియమితులయ్యారు. అలాగే కొలంబియా జర్నలిజం స్కూల్‌లో అర్థశాస్త్రం, బిజినెస్‌ జర్నలిజం కోసం ప్రత్యేకంగా నిర్వహిస్తున్న ‘నైట్‌–బాడ్జెట్‌ ఫెలోషిప్‌’ కొత్త డైరెక్టర్‌గా కూడా నరిశెట్టి వ్యవహరించనున్నారు. మంచి దూరదృష్టిగల, అనుభవమున్న ఎడిటర్‌ నరిశెట్టి రాజు ‘నైట్‌–బాడ్జెట్‌  ప్రోగ్రాం’కు నేతృత్వం వహించేందుకు మేం ఉత్సాహంతో ఆహ్వానిస్తున్నామని కొలంబియా జర్నలిజం స్కూలు డీన్‌ స్టీవ్‌ కోల్, జర్నలిజం ప్రొఫెసర్‌ హెన్రీ ఆర్‌ ల్యూస్‌ పేర్కొన్నారు.  1975లో ప్రారంభించిన ‘నైట్‌–బాడ్జెట్‌  ప్రోగ్రాం’లో ఇంతవరకూ 430 మందికి ఫెలోషిప్‌లు ప్రధానం చేశారు. ‘జర్నలిజం స్కూలులో భాగస్వామినయ్యేందుకు, నైట్‌–బాడ్జెట్‌ ఫెలో షిప్‌ ప్రోగ్రాం డైరెక్టర్‌గా వ్యవహరించేందుకు నేను ఎంతో ఉత్సుకతతో ఉన్నాను’ అని నరిశెట్టి పేర్కొన్నారు. ఇటీవల వరకూ ఆయన గిజ్‌మోడో మీడియా గ్రూపు సీఈవోగా పనిచేశారు. 


 ముంబై: సీనియర్‌ జర్నలిస్టు, తెలుగువాడైన రాజు నరిశెట్టి గాకర్స్‌ మీడియా గ్రూపు సీఈవోగా నియమితులయ్యారు. దశాబ్దం క్రితం ఈ గ్రూపును ప్రారంభించిన నిక్‌ డెన్టన్‌ స్థానంలో నరిశెట్టి బాధ్యతలు స్వీకరించనున్నారు. ఈయన ప్రస్తుతం ముర్దోక్‌ కుటుంబానికి చెందిన ‘న్యూస్‌ కార్ప్‌’ వైస్‌ ప్రెసిడెంట్‌గా ఉన్నారు. జర్నలిజంలో అనుభవంతో పాటు డిజిటల్‌ మీడియాపైనా రాజు నరిశెట్టికి మంచిపట్టుంది.