బావ చేసిన అప్పును తీర్చాలనే ప్రయత్నంలో ఓ బావమరిది ఏకంగా స్నేహితురాలి తమ్ముడినే హత్య చేశాడు. ముందుగా కిడ్నాప్‌ చేయాలని భావించినా, ఆ ప్రయత్నం బెడిసి కొట్టడంతో హత్యకు పాల్పడ్డాడు. ఆదాయపు పన్నుశాఖ అధికారిగా పనిచేస్తున్న నిరంజన్‌ కుమారుడైన శరత్‌ దారుణ హత్యకు గురయ్యాడు.  సాక్షి, బనశంకరి:  డబ్బు కోసం స్నేహితురాలి తమ్ముడినే అపహరించి దారుణంగా హత్య చేసిన నిందితులను ఇక్కడి జ్ఞానభారతి పోలీసులు శుక్రవారం అరెస్ట్‌ చేశారు. వివరాలు... కెంగేరి సమీపంలోని ఉల్లాళలో ఆదాయ పన్ను శాఖ అధికారి నిరంజన్‌ కుమారుడు శరత్‌ (19)ను కిడ్నాపర్లు దారుణంగా హత్య చేశారు. వివరాలు... శరత్‌ ఇక్కడి ఆచార్య కళాశాలలో డిప్లమో చదువుతున్నాడు. ఇతని సోదరి ఇంజినీరింగ్‌ చదువుతోంది. ఈమె క్లాస్‌మెట్‌ అయిన విశాల్, శరత్‌ కుటుంబానికి ఆత్మీయుడు. అప్పుడప్పుడు శరత్‌ ఇంటికి వచ్చి వెళ్లేవాడు. ఇదిలా ఉంటే విశాల్‌ తన బావ చేసిన అప్పు తీర్చడానికి శరత్‌ను కిడ్నాప్‌ చేయాలని పథకం పన్నాడు. తన స్నేహితులు వినయ్‌ ప్రసాద్, కరణ్, వినోద్‌ కుమార్, శాంత కుమార్‌లతో కలిసి ఈనెల 12న శరత్‌ను కారులో కిడ్నాప్‌ చేశారు. అనంతరం శరత్‌ను కిడ్నాప్‌ చేసినట్లు ఇంటికి వీడియో మెసేజ్‌ పంపించారు. తనను కిడ్నాప్‌ చేశారని, కాపాడాలని వీడియో సారాంశం. దీంతో శరత్‌ తండ్రి జ్ఞానభారతి పోలీసులకు ఫిర్యాదు చేశాడు. రూ. 50 లక్షలు ఇస్తారని కిడ్నాపర్లు భావించారు. అయితే పోలీసులకు ఫిర్యాదు చేయడంతో తమ బండారం ఎక్కడ బయటపడుతుందోనని కిడ్నాపర్లు శరత్‌ను కారులోనే గొంతుకు తాడు బిగించి హత్య చేశారు. అనంతరం  మృతదేహాన్ని కెంగేరి సమీపంలోని రామోహళ్లి చెరువులో పడేశారు. మరుసటి రోజు శవం చెరువులో తేలుతుండటాన్ని గమనించిన వారు మృతదేహాన్ని బయటకు తీసి ఓ చోట పూడ్చారు. అనంతరం ఎవరి దారినవారు వెళ్లిపోయారు.  క్లూ ఇలా బయటపడింది : విశాల్‌ అతని స్నేహితులపై పోలీసులకు ఎలాంటి అనుమానం రాలేదు. కానీ శరత్‌ కిడ్నాప్‌ కేసును ఛేదించడానికి ఏర్పాటు చేసిన నాలుగు ప్రత్యేక పోలీస్‌బృందాలు వివిధ కోణాల్లో విచారణ చేశారు. శరత్‌ బైక్‌లో విహార యాత్రకు వెళ్లి ఉండొచ్చని విశాల్‌ చెప్పడంతో అతడిని అదుపులోకి తీసుకుని విచారణ చేపట్టడంతో అసలు విషయం వెల్లడించాడు. దీంతో పోలీసులు ముగ్గురిని అరెస్ట్‌ చేశారు. పరారీలో ఉన్న శాంత కుమార్‌ కోసం గాలిస్తున్నారు. నింది తులను సంఘటన స్థలానికి తీసుకెళ్లి శరత్‌ను పూడ్చిన స్థలాన్ని గుర్తించి మృతదేహాన్ని బయటకు తీసి సమీపంలోని ప్రభుత్వ ఆస్పత్రికి తరలించారు. ఈ సందర్భంగా జ్ఞానభారతి పోలీసులను పోలీస్‌ కమిషనర్‌ సునీల్‌ కుమార్, అదనపు కమిషనర్‌ మాలిని అభినందించారు.  


 సాక్షి, బెంగళూరు : ఆదాయపు పన్ను శాఖకు చెందిన ఓ సీనియర్‌ ఆఫీసర్‌ కొడుకుని కిడ్నాప్‌ చేసి, దారుణంగా హత్య చేశారు దుండగులు. ఈ ఘటన బెంగళూరులో చోటుచేసుకుంది. ఐటీ శాఖలో సీనియర్ అధికారిగా ఉద్యోగం చేస్తున్న నిరంజన్ కుమార్ కుమారుడు శరత్ (19), కెంగెరీలోని తన ఇంటికి సమీపంలో సెప్టెంబర్‌ 12న కిడ్నాప్‌కు గురయ్యాడు. ఈ కిడ్నాప్‌ కేసు విచారణ చేపట్టిన పోలీసులు, శుక్రవారం రోజు శరత్‌ మృతి చెందినట్టు గుర్తించారు. నగర శివార్లలో రామోహల్లి సరస్సులో శరత్‌ మృతదేహం లభ్యమైంది. ఇప్పటికే ఈ హత్య కేసుకు సంబంధించి శరత్‌ స్నేహితుడు విశాల్‌తో పాటు మరో ఆరుగురిని పోలీసులు అదుపులోకి తీసుకుని విచారిస్తున్నారు. 
  
 సెప్టెంబర్‌ 12న కనిపించకుండా పోయిన శరత్‌, అప్పటి నుంచి ఫోన్‌కు కూడా దొరకకుండా పోయాడు. కిడ్నాప్‌ చేసిన నిందితులు శరత్‌ తల్లిదండ్రులను రూ.50 లక్షలు డిమాండ్‌ చేస్తూ.. అతని మొబైల్‌ నుంచే ఒక వాట్సాప్‌ వీడియోను పంపించారు. ఆ వీడియోలో శరత్ మాట్లాడుతూ మీరు ఐటీ దాడులు చేసిన బాధితులు నన్ను కిడ్నాప్ చేసి చిత్రహింసలు పెడుతున్నారని విలపించాడు. అంతేకాక తనను కిడ్నాప్‌ చేసిన వారు టెర్రరిస్టుల ఉన్నారని, వారి వల్ల సోదరికి కూడా ప్రమాదం ముంచి ఉన్నట్టు తెలిపాడు. ఒకవేళ శరత్‌ను విడుదల చేస్తే, ఇరకాటంలో పడతామని భావించిన కిడ్నాపర్లు అతని హత్య చేసినట్టు తెలిసింది. కిడ్నాపర్లు వాడిన కారును పోలీసులు స్వాధీనం చేసుకున్నారు. ప్రస్తుతం ఈ కేసు విచారణ కొనసాగుతోంది. .