బెంగళూరు: సాఫ్ట్‌వేర్‌ సేవలకు దేశంలోనే నంబర్‌ వన్‌ కంపెనీ టాటా కన్సల్టెన్సీ సర్వీసెస్‌(టీసీఎస్‌) గ్లోబల్‌ రీసెర్చ్‌ ఇన్నోవేషన్‌ 5వ సెంటర్‌ను కెనడాలో ప్రారంభించింది. టీసీఎస్‌ పేస్‌ పోర్ట్‌ టొరంటో పేరుతో 16,000 చదరపు అడుగుల విస్తీర్ణంలో ఏర్పాటు చేసిన ఈ కేంద్రంలో ఆధునిక టెక్నాలజీలను పొందేందుకు కంపెనీలకు వీలుంటుంది. టీసీఎస్‌ రీసెర్చ్‌ ల్యాబ్స్, స్టార్టప్‌లు, వీసీలు, ఎంటర్‌ప్రెన్యూర్స్‌తోపాటు టొరంటో యూనివర్శిటీవరకూ కొత్తతరహా ఆలోచనలకు ఈ కేంద్రం అవకాశాలు కల్పించనున్నట్లు టీసీఎస్‌ చీఫ్‌ టెక్నాలజీ ఆఫీసర్‌ అనంత్‌ కృష్ణన్‌ పేర్కొన్నారు.    ప్రపంచవ్యాప్తంగా 4,000 రీసెర్చర్లు, ఇన్నోవేటర్లు, 2,300 స్టార్టప్‌లు, 30 ఇన్నోవేషన్‌ ల్యాబ్స్, 67 అకడమిక్‌ భాగస్వాములకు ప్రధాన కేంద్రంగా సేవలందించనున్నట్లు వివరించారు.  

హైదరాబాద్, బిజినెస్‌ బ్యూరో: దేశంలో నియామకాలు కోవిడ్‌–19 ముందస్తు స్థాయికి చేరుకున్నాయని జాబ్‌ సైట్‌ ఇండీడ్‌ వెల్లడించింది. ఉద్యోగ వృద్ధిని మరింత ముందుకు తీసుకెళ్లడంలో వినియోగ ఆర్థిక వ్యవస్థ ముఖ్యమైన పాత్ర పోషిస్తోందని వివరించింది. ‘నియామకాలు 2020 ఫిబ్రవరి స్థాయికి చేరుకున్నాయి.  గతేడాదితో పోలిస్తే జూలైలో ఐటీ టెక్‌ సాఫ్ట్‌వేర్‌ ఉద్యోగాల కోసం ప్రకటనలు 19 శాతం అధికమయ్యాయి. ప్రాజెక్ట్‌ హెడ్, ఇంజనీర్‌ వంటి ఇతర ఐటీ ఉద్యోగాలకు ప్రకటనలు 8–16 శాతం పెరిగాయి. ఆర్థిక వ్యవస్థ తిరిగి ప్రారంభమవడం, కోవిడ్‌ –19 సవాళ్ల చుట్టూ పనిచేయడానికి వ్యాపార సంస్థలు చేసే ప్రయత్నాలు భారతీయ జాబ్‌ మార్కెట్‌ను రికవరీ వైపు నెట్టా యని ఇండీడ్‌ ఇండియా సేల్స్‌ హెడ్‌ శశి కుమార్‌ తెలిపారు. టెక్‌ జాబ్స్‌ జోరు ఎక్కువగా కొనసాగుతున్నప్పటికీ, రిటైల్, ఫుడ్‌ రంగంలో తిరిగి డిమాం డ్‌ రావడం వృద్ధిని మరింతగా పెంచడంలో వినియోగ ఆర్థిక వ్యవస్థ కీలకంగా  ఉందన్నారు.  ప్రాధాన్యతలలో మార్పు..   కంపెనీలు, ఉద్యోగార్ధులకు పరిశుభ్రత ప్రధాన ప్రాధాన్యతగా మారింది. హౌజ్‌కీపర్స్, కేర్‌టేకర్స్, క్లీనర్స్‌ ఉద్యోగాలు 60 శాతం దూసుకెళ్లాయి. వెటెరినరీ, థెరపీ, పర్సనల్‌ కేర్, చైల్డ్‌ కేర్‌ ఉద్యోగాల పట్ల ఆసక్తి ఎక్కువగా ఉంది. ఉద్యోగార్ధుల ప్రాధాన్యతలలో గణనీయమైన మార్పును సూచించే ధోరణి ఇది.  అభ్యర్థుల్లో ఆసక్తి విషయంలో విమానయానం 25 శాతం, అకౌంటింగ్‌ 8, కస్టమర్‌ రిలేషన్స్‌ 7, అడ్మిన్‌ 6 శాతం తగ్గాయి. ఉద్యోగ వృద్ధి వేగవంతం అవుతూనే ఉంది. ఎక్కువ మంది కార్మికులు ఉద్యోగాలు వెతుకుతున్నారు. కార్మిక మార్కెట్‌ పునర్‌ ప్రారంభంతో ముడిపడి ఉన్న రంగాలు ముందంజలో ఉన్నాయి’ అని ఇండీడ్‌ వివరించింది. ఈ ట్రెండ్‌ రాబోయే నెలల్లో కొనసాగవచ్చన్న ఆశను కలిగిస్తున్నాయని టాలెంట్‌ అక్విజిషన్‌ అనలిస్ట్‌ రేచల్‌ స్టెల్లా రాజ్‌ తెలిపారు.  

హైదరాబాద్‌: కరోనా విసిరిన పంజాతో ఐటీ విద్యా రంగం ఏడాది కాలంగా కర్ఫ్యూలోనే కుదేలవుతుంది. సాఫ్ట్‌వేర్‌గా తమ లక్ష్యాన్ని చేరుకోవాలన్న పట్టుదలతో ఉన్న ఐటీ విద్యార్థులు సరైన శిక్షణలకు దూరమయ్యారు. ఐటీ శిక్షణ కేంద్రాలకు మే, జూన్, జూలై నెలలు అత్యంత కీలకం. ఎందుకంటే అకాడమిక్‌ ఇయర్‌ను పూర్తి చేసుకుని కళాశాల నుంచి బయటకు వచ్చిన విద్యార్థులు సాఫ్ట్‌వేర్‌ కొలువు కోసం ఇక్కడి శిక్షణ కేంద్రాల వైపు మళ్లుతారు. తెలుగు రాష్ట్రాల నుంచే కాకుండా దేశంలోని దాదాపు 18 రాష్ట్రాల నుంచి శిక్షణ తీసుకునేందుకు నగరానికి వస్తారు. ఎందుకంటే ఇక్కడ కాస్ట్‌ ఆఫ్‌ లివింగ్‌ తక్కువ కావడంతో పాటు ఐటీ కోర్సుల ఫీజులు చాలా తక్కువ. ఆ ప్రకారంగా ఏడాదికి దాదాపు ఐదు లక్షల మంది విద్యార్థులు తమ డ్రీమ్‌ జాబ్‌ను సాధించేందుకు అమీర్‌పేట కేంద్రంగా ఉన్న ఐటీ శిక్షణ కేంద్రాల్లో వాలిపోతుంటారు. కాని కరోనా దెబ్బకు ఏడాది కాలంగా సీన్‌ రివర్స్‌ అయ్యింది. విద్యార్థులు లేక శిక్షణ కేంద్రాలు బోసిపోయాయి. ఒక్క విద్యార్థి శిక్షణ కేంద్రం గడప తొక్కాడంటే.. అతన్ని ఏదో రకంగా తమ విద్యార్థిగా మలచుకునేందుకు నానా ప్రయత్నాలు చేస్తుంటారు. అలాంటిది సంవత్సరం పాటు విద్యార్థులు దూరమైతే పరిస్థితి ఏమిటో ఊహించుకోవచ్చు.    అమీర్‌పేట కేంద్రంలో 400 నుంచి 450 వరకు శిక్షణ కేంద్రాలు ఉంటే కరోనా దెబ్బకు అందులో 80 శాతం మేర దివాళా తీసి పెట్టేబేడా సర్దుకున్నాయి.   ఇక మిగతా 20 శాతం సంస్థలు ‘ఆన్‌లైన్‌’ అనే వేదికతో బతికిబట్టకడుతున్నాయి. మారుతున్న సాంకేతికతను విద్యార్థులకు పంచినట్టుగానే.. ప్రస్తుతం నెలకొన్న పరిస్థితులను బట్టి తామూ మారక తప్పదన్న నిర్ణయానికి వచ్చి గత కొన్ని నెలలుగా ఆన్‌లైన్‌ తరగతులు నిర్వహిస్తూ వస్తున్నాయి. పాఠశాల విద్యార్థులకు ఆన్‌లైన్‌లో చెప్పేసినట్లుగా చెప్పేస్తే కుదరదు. ఐటీ శిక్షణ అంటే విద్యార్థిని ఉద్యోగ జీవితంలోకి ఆహ్వానించే ఒక వేదిక. అందుకు తగ్గట్టుగా విద్యార్థులకు ఐటీ విజ్ఞానాన్ని నూరిపోయాల్సి ఉంటుంది.  ఫిజికల్‌ తరగతులతోనే ఇది సాధ్యమయ్యే ప్రక్రియ. అలాంటిది ఆన్‌లైన్‌లో ఆ తతంగాన్ని పూర్తి చేయాలంటే పెద్ద సవాలే.  అందుకు తగ్గ ఇన్‌ఫ్రాస్ట్రక్చర్, సర్వెర్స్‌ను, ఆన్‌లైన్‌ సిమిలేటర్స్‌ను సమకూర్చుకోవాలి. ఐటీ శిక్షణ కేంద్రాలకు ఇది మరింత భారం. అయినప్పటికీ వేళ్ల మీద లెక్కించేంత సంఖ్యలో మాత్రమే రిస్క్‌ తీసుకుని ఆన్‌లైన్‌ తరగతులను నిర్వహిస్తున్నాయి. ఫిజికల్‌ క్లాసుల ద్వారా అందించే క్వాలిటీని ఇవ్వలేకపోయినా.. 70 శాతం మేర విద్యార్థులకు న్యాయం చేసేందుకు నానా తంటాలు పడుతున్నాయి. అలా ఉంటే తప్ప విద్యార్థులకు ప్లేస్‌మెంట్స్‌ను అందించలేమన్న నిర్ణయానికి వచ్చాయి. ఆయా సంస్థలు ఇస్తున్న భరోసాతోనే విద్యార్థులు ఆన్‌లైన్‌ తరగతుల వైపు మళ్లారు.  చాలా మంది ఉపాధిపై వేటు..  అది మైత్రీవనం భవనంలో కొనసాగుతున్న ఐటీ శిక్షణ కేంద్రం. కరోనాకు ముందు 80 మంది పనిచేసే వారు. ఆన్‌లైన్‌ శిక్షణ కొనసాగిస్తుండడంతో ఇప్పుడు కేవలం నలుగురితో నడిపిస్తున్నారు. ఇది మచ్చుకు ఒక ఉదాహరణ మాత్రమే.  ఆన్‌లైన్‌ తరగతులు నిర్వహిస్తున్న శిక్షణ కేంద్రాల్లో ఉద్యోగులను భారీగా కుదించుకోగా.. ఇక మూతపడ్డ శిక్షణ కేంద్రాల గురించి ప్రత్యేకంగా చెప్పనక్కర్లేదు.  వీరంతా ప్రత్యక్షంగా ఇక్కడి సెంటర్లను నమ్ముకుని జీవించే వారు. ఇక ఐటీ కేంద్రాల మాటున పరోక్షంగా ఆధారపడ్డ వారూ చాలామందే ఉన్నారు. టిఫిన్‌ సెంటర్లు, చాట్‌ బండార్లు, టీస్టాల్స్‌... ఇలా పదుల సంఖ్యలో చిరు వ్యాపారులు ఇక్కడ ఐటీ విద్యార్థులను నమ్ముకుని బేషుగ్గా బతికేసే వారు. కానీ ఇప్పుడు చాలా మంది చిరు వ్యాపారులు తమ అడ్డాలను మార్చేసుకున్నారు. అలాగే శిక్షణ కేంద్రాలకు ప్రచారం కల్పించేందుకు ఒక పెద్ద టీమ్‌ ఉంటుంది. ఇప్పుడు వారంతా అడ్రస్‌ లేకుండా పోయారు. ఆయా సంస్థలు అందించే కోర్సుల వివరాలతో భారీగా ప్రచార కరపత్రాలు ముద్రించే వారు. ఇప్పుడు ముద్రణ సంస్థల నిర్వాహకులు సైతం బిక్కమొహం వేసేశారు. ఇక అన్నింటి కంటే ముఖ్యంగా హాస్టల్స్‌ నిర్వాహకుల పరిస్థితి అగమ్యగోచరం. ఆన్‌లైన్‌ తరగతులతో చాలామంది విద్యార్థులు ఇంటి బాటపట్టగా కొద్ది మందితో హాస్టల్స్‌ నిర్వహణ కష్టతరంగా మారింది. ఇలా కరోనా ప్రభావంతో ఏడాది కాలంగా తమ లక్ష్యాలను చేరుకోలేక ఐటీ విద్యార్థులతో పాటు ఐటీ శిక్షణ కేంద్రాలు, వాటిలో పనిచేసే ఉద్యోగులు, వాటిని నమ్ముకొని వ్యాపారం సాగించే వారి ఉపాధిపై తీవ్రంగా వేటు పడింది.   అద్దెకట్టలేని పరిస్థితిలో ఉన్నాం  సాఫ్ట్‌వేర్‌ యువతను నమ్ముకుని తమ లాంటి వాళ్లు ఎంతోమంది వ్యాపారాలు పెట్టుకున్నారు. సాఫ్ట్‌వేర్‌ శిక్షణ కేంద్రాలు కొనసాగుతున్న సమయంలో వ్యాపారం బాగా సాగేది. కరోనా ప్రభావంతో ఇప్పుడు మరీ దారుణంగా పడిపోయింది. అద్దెలు కట్టలేని పరిస్థితిలో ఉన్నాం. కనీసం అద్దెలైనా తగ్గించడం లేదు. ఇంకా ఎన్నాళ్లు ఇలా ఇబ్బందులు పడాలో తెలియడం లేదు.  – ధన్‌రాజ్, హోటల్‌ నిర్వాహకుడు, అమీర్‌పేట ఆదిత్య ట్రేడ్‌ సెంటర్‌    హాస్టల్స్‌ నిర్వాహకులను ఆదుకోవాలి  కరోనాకు ముందు ఐటీ శిక్షణ కేంద్రాలకు వచ్చే విద్యార్థులతో హాస్టల్స్‌ అన్నీ కళకళలాడేవి. తాను నిర్వహించే హాస్టల్‌లో 150 మంది వరకు ఉండే వారు. ఇప్పుడు 15 నుంచి 20 మంది మాత్రమే ఉంటున్నారు. దీంతో కరెంటు బిల్లులు కూడా కట్టలేని పరిస్థితి ఏర్పడింది. ప్రభుత్వమే హాస్టల్స్‌ నిర్వాహకులను ఆదుకోవాలి.  – హరిబాబు, హాస్టల్‌ నిర్వాహకుడు, అమీర్‌పేట 


  న్యూఢిల్లీ: భారత్‌లో గతేడాది సాఫ్ట్‌వేర్ మార్కెట్ 10 శాతం వృద్ధితో 476 కోట్ల డాలర్లకు చేరిందని అంతర్జాతీయ రీసెర్చ్ సంస్థ, గార్ట్‌నర్ పేర్కొంది. క్లౌడ్ ఆధారిత సేవల జోరు పెరగడమే దీనికి కారణమని అంటోన్న ఈ సంస్థ భారత సాఫ్ట్‌వేర్ మార్కెట్‌పై వెల్లడించిన కొన్ని
 ముఖ్యాంశాలు...,
    2012లో భారత సాఫ్ట్‌వేర్ మార్కెట్ 433 కోట్ల డాలర్లుగా ఉంది.
 గత ఏడాది భారత సాఫ్ట్‌వేర్ మార్కెట్లో మైక్రోసాఫ్ట్ అగ్రస్థానంలో నిలిచింది. 2012లో 86.5 కోట్ల డాలర్లుగా ఉన్న ఈ కంపెనీ ఆదాయం 2013లో 11 శాతం వృద్ధితో 95.73 కోట్ల డాలర్లకు చేరింది. భారత సాప్ట్‌వేర్ మార్కెట్లో ఈ కంపెనీ వాటా 20 శాతంగా ఉంది.
  7 శాతం మార్కెట్ వాటా, 50 కోట్ల డాలర్ల ఆదాయంతో ఒరాకిల్ రెండో స్థానంలో ఉంది. బిజినెస్ ఇంటెలిజెన్స్, ఎనలిటిక్స్, డేటా బేస్ మేనేజ్‌మెంట్ సిస్టమ్స్‌పై వినియోగదారుల పెట్టుబడుల కారణంగా ఒరాకిల్ ఆదాయం పెరిగింది.
 
      44. 6 కోట్ల డాలర్లతో ఐబీఎం మూడో స్థానంలో నిలిచింది. ఆ తర్వాతి స్థానాల్లో సాప్(32.43 కోట్ల డాలర్లు), వివివేర్(9.44 కోట్ల డాలర్లు), సీఏ టెక్నాలజీస్(5.27 కోట్ల డాలర్లు), ఎడోబ్ (4.25 కోట్ల డాలర్లు)లు నిలిచాయి. సాస్, హెచ్‌పీలు కూడా చెప్పుకోదగ్గ ఆదాయాలను సాధించాయి.
  {బిక్స్(బ్రెజిల్, రష్యా, ఇండియా, చైనా, దక్షిణాఫ్రికా)దేశాల్లో భారత్‌లోనే సాఫ్ట్‌వేర్ మార్కెట్ అత్యధిక వృద్ధి సాధించింది. అంతేకాకుండా ఇతర అభివృద్ధి చెందుతున్న దేశాలతో పోల్చినా కూడా సాఫ్ట్‌వేర్ మార్కెట్ వృద్ధిలో భారతే ముందంజలో ఉంది.
 
 గత కొన్నేళ్లలో విదేశీ మార్కెట్లపైననే ఆధారపడిన భారత సాఫ్ట్‌వేర్ పరిశ్రమకు దేశీయంగా కూడా కొత్త అవకాశాలు లభిస్తున్నాయి.
 
  ఆర్థిక మందగమన పరిస్థితులున్నప్పటికీ, భారత వాణిజ్య సంస్థలు టెక్నాలజీపై సముచితంగానే పెట్టుబడులు పెడుతున్నాయి. భారీ సంస్థలే కాకుండా చిన్న, మధ్యతరహా వ్యాపార(ఎస్‌ఎంబీ) సంస్థలు కూడా టెక్నాలజీపై వ్యయాలను పెంచుతున్నాయి.