రామాయంపేట(మెదక్‌): రోడ్డు పక్కన ఆగి ఉన్న లారీని ఆర్టీసీ వజ్ర మినీ బస్సు వెనుకనుంచి ఢీకొన్న ఘటనలో 15 మంది ప్రయాణికులు గాయపడ్డారు. బుధవారం మెదక్‌ జిల్లా రామాయంపేట శివారులో దామరచెరువు స్టేజీ వద్ద జాతీయ రహదారిపై ఈ ప్రమాదం జరిగింది. హైదరాబాద్‌ వైపు వెళ్తున్న లారీ చెడిపోవడంతో రోడ్డుపైనే ఆగిపోయింది. కాగా, నిజామాబాద్‌ నుంచి హైదరాబాద్‌ వైపు వేగంగా వెళ్తున్న మెహిదీపట్నం డిపోకు చెందిన ఆర్టీసీ వజ్ర బస్సు ప్రమాదవశాత్తు రోడ్డుపైన ఆగి ఉన్న ఆ లారీని వెనుక నుంచి ఢీకొంది. ఈ ప్రమాదంలో బస్సు డ్రైవర్‌ రవీందర్‌రెడ్డితో పాటు నిజామాబాద్‌కు చెందిన రమేశ్‌ జాదవ్, ఆయన భార్య మీరా, కూతురు శరణ్య, చంద్రకుమార్, సాయన్న, జానకంపేటకు చెందిన వీరేశం, బాన్స్‌వాడకు చెందిన విఠల్, బోధన్‌కు చెందిన నర్సింహారావు, ఆయన బంధువు సుబ్బయ్యకు తీవ్రగాయాలయ్యాయి. చికిత్స నిమిత్తం వీరందరినీ 108 అంబులెన్సుల్లో రామాయంపేట, బిక్కనూర్‌ ప్రభుత్వ ఆస్పత్రులకు తరలించారు. వీరిలో బస్సు డ్రైవర్‌ రవీందర్‌రెడ్డితో పాటు రమేశ్‌జాదవ్, సాయన్నను మెరుగైన చికిత్సకోసం హైదరాబాద్‌ తరలించారు. స్వల్పంగా గాయపడ్డ మరో ఐదుగురు ప్రైవేటు ఆస్పత్రిలో చికిత్స చేయించుకుని వెళ్లి పోయారు. ఈ ప్రమాదంపై కేసు నమోదుచేసి దర్యాప్తు చేస్తున్నట్లు స్థానిక ఎస్‌ఐ మహేందర్‌ తెలిపారు. 


 ► ఆర్టీసీ అధికారులకు ఫిర్యాదు చేసిన ప్రయాణికుడు
 ► సర్ది చెప్పి పంపించిన అధికారులు
 
 జనగామ:
 ఆర్టీసీ సంస్థ ఇటీవల ప్రవేశపెట్టిన మినీ వజ్ర బస్సులో డ్రైవర్‌ నీలి చిత్రాలు చూస్తూ నడుపుతున్నాడని ఓ ప్రయాణికుడు జనగామ డిపోలో మంగళవారం ఫిర్యాదు చేశాడు. వరంగల్‌–2 డిపోకు చెందిన టీఎస్‌ 03 జెడ్‌ 0340 నంబరు గల వజ్ర బస్సు హైదరాబాద్‌లోని కూకట్‌పల్లికి వెళ్తుంది.  ప్రయాణికుడు నాగలింగం ఫిర్యాదు మేరకు వివరాలు ఇలా ఉన్నా యి. బస్సు స్టేషన్‌ఘన్‌పూర్‌ దాటగానే కుదుపుకు లోనయిందన్నారు. అనుమానం వచ్చి చూడడంతో నావిగేషన్‌ కోసం ఉపయోగిస్తున్న ట్యాబ్‌లో నీలి చిత్రాలు చూస్తున్నట్లు గమనించడం జరిగిందన్నారు. వెంటనే బస్సు ఆపి డ్రైవర్‌ను నిలదీయడంతో తమనే బెదిరించే ప్రయత్నం చేయడంతో బస్సుతో సహా తీసుకెళ్లి జనగామ డిపోలో అధికారులకు ఫిర్యాదు చేశారు.
 
 డ్రైవర్‌ బుకాయించడంతో ట్యాబ్‌లోని యూ ట్యూబ్‌లో ఉన్న నీలి చిత్రాలకు సంబంధించి వీడియోలను చూపించారు. నావిగేషన్‌ కోసం ఆర్టీసీ సంస్థ ఏర్పాటు చేస్తే నీలిచిత్రాల కోసం వాడుకుంటున్నారని ఆగ్రహం వ్యక్తం చేశారు. నీలి చిత్రాలను చూడలేదని చెబుతున్న డ్రైవర్‌ యూ ట్యుబ్‌ తెరవగానే అవి మాత్రమే ఎందుకు కనిపిస్తున్నాయని అధికారులను ప్రశ్నించారు. ఫిర్యాదు అందుకున్న హెడ్‌కానిస్టేబుల్‌ ఆర్‌.ప్రకాష్‌ ఆర్టీసీ ఉన్నతాధికారులకు ఫోన్‌ ద్వారా విషయాన్ని వివరించారు. నాగలింగం తమకు ఫిర్యాదు చేశాడని  ప్రకాష్‌ తెలిపారు.
 
 ఆర్టీసీ అధికారులకు ట్యాబ్‌ను చూపిస్తున్న ప్రయాణికుడు